Лондонскиот аеродром Хитроу соопшти дека ќе го ограничи бројот на појдовни патници на 100.000 дневно ова лето во обид да го олесни прекинот на линии додека се бори да се справи со зголемената побарувачка за авионски патувања.
Авиокомпаниите на најфреквентниот британски аеродром веќе одговорија на апелот на владата за намалување на капацитетот, но од Хитроу порачаа дека е неопходно да се оди чекор понатаму, пренесува Ројтерс.
Во соопштението се вели дека авиокомпаниите, персоналот за ракување со багажот и аеродромот заедно можат да се справат со 100.000 патници кои заминуваат, бројка што редовно се надминуваше во последните недели што резултираше со неприфатливо ниво на услуга.
Некои авиокомпании презедоа значителни мерки, но други не, и веруваме дека сега се потребни дополнителни активности за да се обезбеди патниците да имаат безбедно и сигурно патување - рече извршниот директор на Хитроу, Џон Холанд Кеј во денешното отворено писмо до патниците.
Тој додаде дека затоа аеродромот донел тешка одлука да воведе ограничувања на капацитетот од 12 јули до 11 септември.
Свесни сме дека тоа ќе значи дека некои летни патувања или ќе бидат преместени на друг ден, или на друг аеродром или ќе бидат откажани и им се извинуваме на оние чии планови за патување беа погодени - напиша тој.
Холанд-Кеј истакна дека прогнозите покажуваат дека и покрај оваа мерка, бројот на седишта на појдовните летови во текот на летото во просек ќе биде 104.000, што е за 4.000 над границата.
Според соопштението, околу 1.500 од планираните 4.000 дневни седишта веќе се продадени на патници, а од авиокомпаниите се бара да престанат да продаваат билети за летната сезона за да се ограничи влијанието врз патниците.