До неодамна можеше да се купи нов компактен семеен автомобил за нешто повеќе од 13.000 евра, а денес речиси и да нема автомобили за поприфатлива цена.

Цените на автомобилите скокнаа и до 30 отсто, а судејќи според последните информации, поскапувањата ќе продолжат.

Главен виновник за натамошното поскапување би можело да биде екологијата, односно се построгите стандарди за емисија на штетни гасови. Воведувањето на стандардот Еуро 7 за 2025 година практично значи дека адаптацијата на класичните бензински и дизел мотори би можела да се одрази со поскапување на автомобилите за 3.000 до 5.000 евра.

И тука не станува збор за медиумски шпекулации, туку за оценка на директорот на Фолксваген, Томас Шефер. „Евтините автомобили наскоро целосно ќе исчезнат од пазарот. Со мали автомобили речиси е невозможно да се апсорбираат овие дополнителни трошоци“, изјави Шефер за Welt am Sonntag. И навистина, доколку се оствари ваквото поскапување, тоа би значело дека некои помали автомобили би поскапеле и до 30% само поради стандардот Еуро 7.

Нов автомобил од 10.000 евра веќе е минато, а се предвидува дека во иднина во понудата ќе доминираат електричните автомобили. Фолксваген таму подготвува мал ID.2, а наводно неговата почетна цена нема да надмине 25.000 евра.

Расте бројот на нови позитивни случаи на Ковид-19 во државата. Комисијата за заразни болести напладне ќе одржи состанок на кој ќе се дискутира за моменталната епидемиолошка состојба, како и за евентуалните препораки.

Комисијата за заразни болести ќе се состане во 12 часот и на состанокот. Ќе се дискутира за епидемиолошката состојба или препораките ќе бидат донесени на утрешниот состанок, во форма на препораки или заклучоци и ќе бидат споделени веднаш по состанокот, изјави вчера за МИА д-р Злате Мехмедовиќ, портпарол на Комисијата.

Веќе неколку дена по ред, бројот на новозаразени е над 700, а само вчера од 1.774 тестови се регистрирани 792 нови случаи на Ковид-19. Речиси половина од новозаразените во Скопје. Бројот на активни случаи во моментов е 3.595. Во синоќешниот ковид билтен не беа регистрирани починати лица, но претходниот ден од Ковид-19 починаа две лица, од кои едното на 23-годишна возраст од Свети Николе.

Комисијата за заразни болести на последната седница не донесе дополнителни рестриктивни мерки.

Остануваат да важат мерките за задолжително носење заштитна маска во јавниот превоз, здравствените установи, аптеките и установите за згрижување на возрасни лица и лица со попреченост.

Од Комисијата апелираат до граѓаните да внимаваат на сопственото здравје, да избегнуваат посети во затворени и непроветрени простории, освен кога тоа е неодложно. Во такви случаи се препорачува носење заштитна маска и одржување дистанца.

Министерството за здравство минатата недела препорача носење маски во затворени простории при подолг престој и редовно проветрување.

При престојување во затворена просторија подолго време да се носат маски, а лицата од ризичните категории маска минимум ФПП2 или Н95 или ФФП3. Просториите во кои се престојува подолго (канцеларии, занимални во градинки, сали за состаноци и слично), како и спортски објекти, редовно да се провертуваат и да се дезинфицираат. Да се избегнува непотребно собирање во големи групи и секогаш кога може да се одржува растојание од два метра, соопшти Министерството.  

Владата на вчера одржаната седница ја усвои Информацијата за исплата на пензии за јули 2022 година со задолжување на Фондот на пензиското и инвалидското осигурување да ги достави податоците за пензиите до деловните банки најдоцна до 26 јули, а деловните банки од 27.07.2022 година да обезбедат пензионерите да може да располагаат со јунските пензии преку мрежата на банкомати и трговската мрежа.

Како што соопштија од владиниот Сектор за односи со јавноста, готовинската исплата на пензиите, за клиентите кои не користат картички, според постигната согласност од банките ќе се спроведе во четири групи (4 денови) во сите отворени филијали и експозитури на банките, согласно следниот распоред.

За пензии со висина до 11.000 денари, исплатата да се изврши на 27.07.2022 година (среда); за пензии со висина 11.001-14.000 денари, исплатата да се изврши на 28.07.2022 година (четврток); за пензии со висина 14.001-18.000 денари, исплатата да се изврши на 29.07.2022 година (петок), и за пензии со висина над 18.001 денари, исплата да се изврши на 01.08.2022 година (понеделник), се наведува во соопштението од владината прес-служба.  

Македонскиот пасош е на 33-то место во светот и со него може да се патува во 124 земји без виза. Индексот на пасоши „Артон Капитал“, кој ги зема предвид пасошите на 193 земји членки на Обединетите нации и шест територии објави дека С. Македонија е на 33-та позиција. 

Косово е на 82. место, а Србија на 25. место, затоа што нејзините граѓани можат да посетат 134 земји без визи, а Босна и Херцеговина е на 41. место (во 116 земји без виза).

Јапонија, Сингапур и Јужна Кореја се трите земји со најмоќни пасоши, затоа што нивните граѓани можат да патуваат во сите земји во светот без виза. 

Држави со најмоќни пасоши на европско тло се Германија и Шпанија (190 земји без виза), а зад нив се Финска, Италија и Луксембург со 189. Нов Зеланд и САД се на седмото место, веднаш до Белгија, Норвешка и Швајцарија. Граѓаните на Авганистан повторно се на дното на листата со најслаби пасоши и можат да влезат во само 27 земји по поднесување на барање за виза.

Индексот за пасоши на „Хенли“, објавен на почетокот на оваа година покажува дека германскиот и јужнокорејскиот пасош се на второ место, а третото место го делат Финска, Италија, Луксембург и Шпанија, чии граѓани можат без виза да одат во 189 земји, а јапонскиот и тогаш беше на врвот.