Доколку велосипедите се користат во остатокот од светот до степен до кој се користат во Холандија, глобалните емисии на јаглерод би се намалиле за дури 700 милиони тони годишно, покажуваат податоците добиени од една данска студија.

Универзитетот во Јужна Данска го спроведе ова истражување, чии резултати се објавени во научното списание Communications Earth & Environment. Холанѓаните секој ден возат во просек по 2,6 километри. Ако тоа беше случај во остатокот од светот, глобалните емисии на јаглерод би биле намалени за значителен број. Оваа бројка е поголема од онаа на Велика Британија, Канада, Саудиска Арабија и Австралија.

Авторите на студијата заклучија дека поради оваа причина е неопходно да се промовира велосипедизмот. Возењето велосипед е здраво и еколошки поприфатливо. Оние кои одат на работа со велосипед имаат 45 отсто помал ризик да добијат рак и 46 отсто помал ризик од кардиоваскуларни болести.

Според податоците на британската еколошка организација Hubbub, 50 отсто од дневните патувања се пократки од 3,2 километри, што значи дека за нив е многу прифатливо да бидат со велосипед.

Данското истражување, исто така, утврди дека производството на велосипеди е значително зголемено во последните 60 години. Во 2015 година биле произведени 123 милиони велосипеди, додека во 1962 година биле произведени 20,7 милиони велосипеди. Сепак, тоа не значи дека употребата на ова транспортно средство расте во светски рамки. На глобално ниво, стапката на дневно користење велосипед во споредба со другите превозни средства е само пет проценти.

Данска и Холандија се истакнати како добри примери како велосипедот да стане основно превозно средство, пренесува Еуроњуз. 

Ќе се сложиме, ова навистина звучи како идеална летна работа, зарем не?

Има ли нешто подобро од тоа да седите и да уживате во летното попладне со чаша квалитетно вино во рака? А што ако за тоа добиете и плата?

Ако овој опис на работната позиција ве привлече, ја имаме идеалната летна работа за вас.

Британскиот производител на вино Majestic бара кандидат кој ќе учествува во нивната „vinternship“ пракса – што вклучува патување во Португалија со цел дегустација на вкусни вина, директно во винаријата на производителот.

Освен што летот и сместувањето ќе му бидат платени, избраниот кандидат ќе добие 600 фунти за неговиот тридневен ангажман – а да напоменеме, ќе има можност да проба одлични вина во процесот на производство.

Кандидатот кој ќе биде избран ќе може да донесе и пријател за да го сподели искуството.

Работните обврски вклучуваат обиколка на лозјето со коњ и кочија, посета на винарската визба и просторијата со буриња пред да пробате голем избор на вина и маслинки од пет региони низ Португалија: Алгарве, Алентехо, Лисабоа, Дуро и Вињо Вердес.

Двајцата посетители, исто така, ќе бидат почестени со богат ручек.

Ќе се сложиме, ова навистина звучи како идеална летна работа, зарем не?

Сојузот на синдикати на Македонија бара Владата и работодавачите од приватниот сектор веднаш да пристапат кон зголемување на платите на работниците бидејќи, како што велат, и во време на ковид пандемија, работниците со својата работа помогнале да се зголеми капиталот на работодавачите, а државата наплаќала приходи по основ на даноци.

Стоте најголеми компании оствариле вкупна добивка од 735,5 милиони евра во 2021 година, додека во 2020 година, добивката на овие компании била 517,4 милиони евра, што значи дека за една година добивката се зголемила за 42 проценти. Тоа значи дека работниците само во овие 100 најголеми компании биле попродуктивни и на своите работодавачи им сработиле фантастична добивка за дополнителни 218,1 милиони евра за само една година, наведува ССМ.

Од ССМ посочуваат дека за разлика од зголемената добивка на капиталот на работодавачите, платите на работниците се зголемени за само 5,8 проценти колку што се зголемила просечната плата од декември 2020 до декември 2021 година според Државниот завод за статистика.

Ова е периодот за кој Државниот завод за ревизија во извештајот за преземените владини мерки и политики за поддршка на вработувањето и професиите погодени од ковид-пандемијата констатира намалени приходи во Буџетот на РСМ во вкупен износ од 1 437 005 илјади денари, односно околу 23 милиони евра, а голем дел од тие средства не ни стигнаа до сметките на работниците, а за што ССМ предупредуваше дека ќе се случи, велат од ССМ. 

Од денес во ваши раце ќе биде сигурноста и безбедноста на целата заедница, во ваши раце ќе биде зачувувањето на мирот во земјата и спокојниот живот на граѓаните. Без разлика на родовата, етничката или верска припадност, Вие носите иста униформа, дел сте од истата институција и заеднички ќе се борите против заедничкиот непријател на нашата заедничка држава, а тоа е криминалот, порача денеска претседателот Стево Пендаровски на промоцијата на 590 нови полициски службеници – генерација 2021-2022 година, која се одржа во Центарот за обука на МВР во Идризово.

Припадниците на Министерството за внатрешни работи се гарант за јавниот рeд и мир, за нашата безбедност и сигурност. Во изминатите три децении изградивме високо професионална полиција во чии редови се најдобрите и најподготвените, кои професионално, достоинствено и со личен интегритет ги извршуваат своите задачи, секогаш ставајќи се на располагање на граѓаните и нивните потреби, истакна Пендаровски.

На новите полицајци им порача дека граѓаните токму во нив гледаат мотивирани, посветени професионалци кои одговорно и доследно ќе ги извршуваат своите задолженија, ќе ѝ служат на својата земја и ќе го штитат животот и имотот на своите сограѓани.

Министерот за внатрешни работи Оливер Спасовски на новите полициски службеници кои денеска дадоа свечена изјава им честиташе за успехот и нагласи дека оваа генерација полицајци го има остварено најдобриот резултат во последните 10 години.

Поминавте една година на патеката што ви овозможи да направите, би рекол, еден мал увид во тоа што значи да се биде полициски службеник. Имавте можност да си ги тестирате границите, да ги надминете своите и очекувањата на другите. Да увидите дека полициската професија се соочува со секојдневни предизвици на кои треба веднаш да се одговори, но и носи огромно задоволство со секој постигнат резултат како сервис на граѓаните, со секоја успешна реализација како гарант на безбедноста, истакна Спасовски.

Потсетувајќи се на неодамнешните насилни протести го потенцираше значењето на полициската професија за безбедноста на институциите, граѓаните и државата.

Полициските службеници кои беа на браникот на државните институции, меѓу кои, за жал, имаше и повредени, најпластично ја демонстрираа непоколебливоста, подготвеноста, храброста и жртвата за заштита на државата и за гарантирање на безбедноста на граѓаните, нагласи министерот Спасовски.

Потенцираше дека успешното функционирање на безбедносниот систем е основа за функционирање на правната држава.

Токму затоа наш врвен приоритет беше создавањето модерна, опремена, стручна, ефикасна, но и задоволна полиција, која на законит, стручен, транспарентен и одговорен начин ќе одговори на работните задачи. За остварување на тој наш приоритет многу работи направивме, а резултатите, меѓу другото се видливи во сите 75 реконструирани објекти на МВР ширум државата, во кои имплементиравме и мерки за енергетска ефикасност. Покрај ова, инвестиравме над 10 милиони евра во нови униформи за секоја организациона единица, истакна Спасовски.

На промоцијата се обрати и помошник министерот на Центарот за обука, Сузе Трајковска, која посочи дека обуката се состоела од теоретска настава и ситуациони вежби и од практичен дел.

Информираше дека од вкупно пријавените 625 кандидати, обуката успешно ја завршиле 590 кандидати, од кои 487 машки и 103 женски со среден успех на генерација од 523 бодови од можни 600.

На церемонијата беа доделени плакети за 18 најдобри кандидати од оваа генерација, а за најдобар од генерацијата 2021/2022 беше прогласен Стефан Митаноски, на кого му беше доделена свечена плакета од претседателот на државата.