Регулаторната комисија за енергетика донесе одлука за нови цени на горивата кои ќе важат од полноќ.

Цената на дизелот од полноќ се намалува за два денари.

Цените на бензините, на Екстра лесното масло за домаќинство на (ЕЛ-1) и на мазутот М-1 НС не се менуваат.

Ова се цените на горивата кои ќе важат од полноќ:

Моторен бензин ЕУРОСУПЕР БС – 95 84,50 (денари/литар), Моторен бензин ЕУРОСУПЕР БС – 98 86,50 (денари/литар), Дизел гориво ЕУРОДИЗЕЛ БС (Д-Е V) 84,50 (денари/литар), Масло за горење Екстра лесно 1 (ЕЛ-1) 82,50 (денари/литар) и Мазут М-1 НС 41,810 (денари/килограм).

Уставниот суд на денешната седница одлучи да не поведе постапка за предметот во кој беше оспорено работењето во недела, информира на прес-конференција портпаролката на Уставниот суд, Христина Беловска.

Тоа, како што појасни таа, значи дека во правниот поредок останува Законот кој го уредува правото на работниците да не работат во недела, освен во дејностите кои се исклучоци, а секако се предвидени со сегашното законско решение.

За Уставниот суд неосновани се наводите на Стопанската комора на Северна Македонија која е подносител на оваа иницијатива и која бараше да се запре извршувањето на овој Закон. Оваа одлука е конечна и секој мора да ја почитува, нагласи Беловска.

Уставниот суд расправаше за овој случај на седница што се одржа на 14 септември годинава, но одлука не беше донесена поради недоволно мнозинство гласови.

На денешната 38-ма седница на дневен ред беа закажани осум иницијативи по кои се разгледуваше и оценуваше уставноста и законитоста. 

Приватните превозници од „Слобода превоз“ и „Макекспрес“ утре од шест часот ќе го блокираат сообраќајот во Скопје на десната лента на ул. „Илинден" на потегот од Владата до МИ-ДА, а околу 200 автобуси ќе бидат паркирани пред бараките на Град Скопје, најави директорот на „Слобода превоз", Ленин Јовановски.

Тој на денешната прес-конференција рече дека не е постигнат договор со градоначалничката на Град Скопје, Данела Арсовска и директорот на ЈСП Александар Стојковски за исплата на долгот што го побаруваат превозниците.

Утрешниот ден ќе покаже дали ќе има некаков исод или блокадата ќе продолжи и во текот на викендот и почетокот на следната недела, рече Јовановски.

Доколку и во меѓувреме нема резултати ќе бидат блокирани крстосниците кај ТВ Мавровка, Црвен Крст и ул. „Илинденска".

Германската економија со години не може да привлече доволно квалификувани работници, а овој проблем наскоро ќе стане поакутен со пензионирањето на бејби бумер генерацијата. Владата вчера претстави план со кој пошироко ги отвора вратите за работната сила од земјите надвор од Европската унија, јавува ДПА.

Според нацртот, странците повеќе нема да бидат ограничени само на професијата, па така, на пример, механичар ќе може да работи како магационер или полицаец како келнер.

При разгледување на апликацијата за работна виза, искуството ќе добие тежина, а преводот на квалификации на германски ќе изгуби важност за влез во Германија. Планот вклучува и иновативен систем за бодување за работници од трети земји, вклучувајќи ги и земјите од Западен Балкан.

Министрите се согласија за основните принципи, дека „критериумите можат да бидат квалификации, јазични вештини, работно искуство, семејни врски со Германија и возраст“.

Прашањето за бодување на небулозните категории на познавање на јазикот и семејните врски штотуку доаѓа на дневен ред на дискусија во трипартитната коалиција на канцеларот Олаф Шолц.

Очигледно, службите за странци поповолно ќе ја проценат способноста за интегрирање со претходните престои во Германија, работа кај германски работодавач, но и доколку кандидатот има роднини во Германија.

Нацртот сè уште не дефинира каков статус треба да имаат тие роднини, на пример, дали се вработени.

Полесната имиграција е дел од планираната реформа на законот за азил и миграција што министерката за внатрешни работи Ненси Фезер сака да ја иницира до крајот на годината.

Во петок, Бундестагот треба да гласа за таканаречената можност за право на престој, односно за отворање перспектива за престој за добро интегрираните странци кои подолго време живеат во Германија без безбеден статус.

Почнувајќи од 31 октомври 2022 година, секој што живеел во земјата најмалку пет години и не сторил кривично дело, треба да добие 18 месеци за да ги исполни условите за долготраен престој - тука се вклучени јазичните вештини и сопствените средства за егзистенција.

Фото: unsplash

Извор: блиц