Денес во Скопје почнува шестиот по ред регионален бизнис САМИТ 100 на лидери од Југоисточна Европа. На дводневниот самит ќе учествуваат над 150 бизнис лидери од Словенија, Хрватска, Македонија, Црна Гора, Босна и Херцеговина, Албанија, Србија и Косово.

Според програмата на самитот, вториот ден е предвиден премиерски панел, на кој ќе учeствуваат премиерите: Зоран Заев од Македонија, Денис Звиздиќ од БИХ, Душко Марковиќ од Црна Гора, Рамуш Харадинај од Косово, Еди Рама од Албанија, а можно е да дојде и Андреј Пленковиќ од Хрватска.

Премиерот на Македонија Заев ќе има свое излагање на тема: „Нов договор за новото време, или, дали регионот е подготвен за натпревар на глобалната сцена“. На самитот ќе се зборува за енергијата, за економиите засновани на знаење, за брендирањето, за дигиталната економија и за стратегиите за поврзување на регионот и за заеднички иницијативи во областа на туризмот.

Официјално самитот ќе го отвори Живко Мукаетов, генерален директор на „Алкалоид АД“ Скопје и претседател на управниот одбор на САМИТ100 и претседателот на Македонија Ѓорге Иванов.

Клучна тема на годинешниот самит на бизнисмени од Западен Балкан ќе биде поврзувањето во различни области и на различни нивоа, а еден од главните говорници ќе биде еврокомесарката за транспорт Виолета Булц.

Живко Мукаетов на прес конференцијата, што се одржа минатата недела во Скопје, најави дека на овој самит ќе се разговара и за реализација на Едисон проектот, кој бил договорен на претходниот самит, лани во Сараево. Тој објасни дека со овој проект се предвидува на патиштата во регионот да се стават полначи за електромобили за да може да се воведуваат електрични автомобили, а со тоа да се исфрлат од употреба автомобилите кои користат дизел и други горива кои ја загадуваат животната средина.

Возачите кои заради брзо возење или возење под дејство на алкохол ќе предизвикаат сообраќајка со смртни последици ќе добијат доживотен затвор. 

Ваква одлука донесе Владата на Велика Британија. Казната за ова дело од 14 години колку што изнесува сега ќе биде зголемена на доживотен затвор. 

Со ова казната ќе биде изедначена како онаа за извршено убиство. 

Индипендент пишува дека лани 157 лица се осудени заради предизвикување на сообраќајни несреќи со смртни последници, но не е објавено за колкави затворски казни станува збор.

Вкупниот ефект од зголемувањето на минималната плата и покачувањето од два процента кај вработените во градинките ќе биде до 2.040 денари во зависност од нивното работно место.

Основната бруто плата пред зголемувањето од два процента за септември за одредено работно место би изнесувало 15.090 денари, со зголемувањето од два отсто на бруто платата добиваме сума од 15.392 денари, а со зголемувањето на минималната плата за истата бруто плата добиваме 17.130 денари. Тоа значи дека зависно од одредено работно место ефектот од зголемувањето од два процента и зголемувањето на минималната плата за вработените во градикните ќе изнесува до 2.040 денари, рече на денешната прес-конференција министерката за труд и социјална политика Мила Царовска.

Додаде дека овие средства на вработените во градинките им се исплатени со септемвриската плата која се исплаќа во октомври.

Минималната плата во иднина ќе мора да се исплаќа бидејќи, како што рече министерката, тоа е регулирано преку Управата за јавни приходи, каде нема да можат да поминат плати пониски од законски предвидената минимална плата од 12 илјади денари.

Првата зголемена минимална плата е септемвриската, исплатена овој месец.

Земјите во светот страдаат од последиците од зголемената внатрешна нееднаквост и треба сериозно да размислат за прераспределба на богатството преку даночна политика и трансфер исплати, соопшти Меѓународниот монетарен фонд (ММФ), цитиран од агенциите.

Иако генерално глобалната нееднаквост како да е намалена во последните децении поради економскиот раст на земјите како Кина и Индија, нееднаквоста во некои земји се зголемила нагло, особено во големите како САД и Кина. Фондот предупреди дека прекумерната нееднаквост може да го намали економскиот раст.

Прогресивните плаќања за оданочување и трансферите се клучните компоненти на ефективната фискална редистрибуција, се вели во извештајот „Фискален монитор“ на ММФ.

Препораките на ММФ изгледа се разминуваат со ставовите на администрацијата на американскиот претседател Доналд Трамп, чии нови даночни предлози се базираат главно на намалување на даноците за компаниите и на богатите.

Во извештајот ММФ наведува дека падот на вкупната светска нееднаквост во последните 30 години, кој е резултат на глобализацијата и технолошкиот напредок, ги прикрива длабоките проблеми во земјите.

Во истиот период, 53 отсто од земјите известуваат за зголемување на нееднаквоста во приходите, објави ММФ. Латинска Америка останува со најголемата нееднаквост во светот.

Особено е силен порастот на нееднаквоста во развиените економии, но се шири низ целиот свет.

Во многу развиени економии, како САД на пример, зголемувањето на нееднаквоста е резултат на поголемата концентрација на богатство во најбогатиот еден процент од населението.

ММФ, исто така, препорачува стеснување на празнините во образованието за да се елиминираат нееднаквостите во приходите.

Во исто време, Фондот предупреди за засилени ризици за финансиската стабилност на Кина во врска со големината, комплексноста и динамиката на растот во финансиската сфера на земјата. Ова е наведено во Извештајот за глобалната финансиска стабилност.

„Постојаниот раст во Кина и цврстите политики во финансискиот сектор во последните квартали ја намалија загриженоста во врска со можното забавување на растот во краткорочна перспектива и негативните секундарни ефекти за светската економија. Димензиите, комплексноста и динамиката на раст во финансиската сфера на Кина сепак покажуваат зголемување на ризиците за финансиска стабилност“, истакнаа експерти од ММФ.

Тие објаснуваат дека средствата на кинескиот банкарски сектор се зголемија од 240 отсто од БДП-то на крајот на 2012-та година на 31 отсто од БДП-то од оваа година.

„Покрај тоа поширокото користење на краткорочното финансирање на големо и „сивото кредитирање“ доведе до зајакнување на ранливоста на банките“, забележуваат авторите на извештајот.

Според нив Пекинг се судрил со потребата „точно да балансира стврднување на политиката во финансискиот сектор и забавување на економскиот раст“. „Одложувањето на темпото на раст на „сивото кредитирање, иако умерено, ќе се одрази негативно на профитабилноста и поширокото обезбедување на кредити од малите и средните банки“, заклучува извештајот на ММФ.