Еден од најголемите предизвици со кои се соочуваат младите луѓе и оние што сакаат да направат промена во кариерата е добро познатото прашање: „Како да стекнам искуство ако никој не ми даде шанса?“

Иако многу огласи бараат претходно работно искуство, вистината е дека сè повеќе компании се подготвени да инвестираат во кандидати кои покажуваат потенцијал, мотивација и желба за учење. Денес, добриот став и подготвеноста за развој често имаат поголема вредност од долгогодишното искуство.

Фокусирајте се на вашите вештини

Дури и ако никогаш не сте биле во редовен работен однос, тоа не значи дека немате што да понудите. Размислете за:

• студентски проекти;
• волонтерски активности;
• курсеви и сертификати;
• практикантства;
• хонорарни ангажмани;
• лични проекти или хоби што развиле конкретни вештини.

Секоја од овие активности може да покаже дека знаете да работите во тим, да решавате проблеми, да комуницирате со луѓе или да управувате со задачи.

Направете CV што ќе го истакне вашиот потенцијал

Кога немате богато работно искуство, CV-то треба да го насочи вниманието кон вашите знаења и способности.

Наведете ги:

• Образованието;
• Техничките и дигиталните вештини;
• Познавањето странски јазици;
• Сертификати и обуки;
• Волонтерско искуство;
• Релевантни проекти и постигнувања.

Избегнувајте празни страници. Наместо тоа, покажете што сте научиле и како тоа може да биде корисно за идниот работодавач.

Не аплицирајте само на позиции што бараат „нула искуство“

Многу кандидати автоматски ги прескокнуваат огласите во кои се наведува една или две години искуство. Сепак, тоа често претставува посакувана, а не задолжителна квалификација.

Ако ги исполнувате поголемиот дел од условите и верувате дека можете брзо да се вклопите во улогата, вреди да аплицирате.

Напишете персонализирано мотивациско писмо

Мотивациското писмо е одлична можност да објасните зошто сакате да работите токму во таа компанија и што можете да придонесете.

Наместо да се извинувате што немате искуство, истакнете:

• Желба за учење;
• Мотивираност;
• Одговорност;
• Иницијативност;
• Подготвеност за професионален развој.

Позитивниот пристап остава многу подобар впечаток од фокусирањето на она што ви недостасува.

Подгответе се за интервју

Работодавачите знаат дека кандидатите без искуство немаат богато професионално портфолио. Наместо тоа, тие сакаат да видат:

• Дали сте љубопитни;
• Дали сакате да учите;
• Како комуницирате;
• Дали знаете да работите во тим;
• Дали покажувате професионален однос.

Подгответе конкретни примери од факултет, училиште, волонтерски активности или лични проекти кои покажуваат како сте решиле проблем, организирале задача или презеле иницијатива.

Искористете ги платформите за вработување

Редовно следете ги новите огласи и поставете ажурирано CV на платформите за вработување. Многу компании активно пребаруваат кандидати и директно контактираат профили кои одговараат на нивните потреби.

Исто така, поставете професионална фотографија, точни информации и јасен опис на вашите вештини. Комплетниот профил ја зголемува веројатноста да бидете забележани.

Продолжете да учите

Во денешниот пазар на трудот, учењето не завршува со дипломирањето. Бесплатни онлајн курсеви, вебинари, работилници и сертификати можат значително да го подобрат вашиот профил.

Покажувањето дека постојано инвестирате во своето знаење им испраќа јасна порака на работодавачите дека сте личност која сака да напредува.

Не се откажувајте по првите одбивања

Речиси секој успешен професионалец добил негативен одговор пред да ја добие својата прва работа. Одбивањето не значи дека не сте доволно добри често едноставно значи дека не сте биле најсоодветниот кандидат за конкретната позиција.

Продолжете да го подобрувате вашето CV, стекнувајте нови знаења, барајте повратни информации и аплицирајте на позиции што одговараат на вашите интереси и вештини.

Првата можност е најважниот чекор

Ниту еден професионалец не започнал со долгогодишно искуство. Секој некогаш ја барал својата прва шанса. Компаниите не бараат само луѓе со богато CV тие бараат и кандидати кои покажуваат потенцијал, одговорност и желба да учат.

Доколку вложувате во себе, внимателно ги подготвувате апликациите и не се откажувате по првите неуспеси, вашата прва работна можност ќе дојде. Најважно е да запомните дека кариерата не започнува со години искуство туку со првиот чекор што ќе одлучите да го направите денес.

Прочитајте и за: Работно место што инспирира: Практики кои носат подобри резултати

Тагови: нова работа работа совети за работа

Во последните неколку години, сè почесто се зборува за таканаречените „дух“ или лажни огласи за работа – огласи кои се активни, но зад нив не стои реална намера за вработување. Иако на прв поглед изгледаат како обична можност за нова работа, тие можат да создадат разочарување кај кандидатите и да ја нарушат довербата во целиот процес на регрутација.

За кандидатите, искуството е добро познато. Поминуваат време во подготовка на CV, мотивациско писмо и апликација, а потоа никогаш не добиваат повратен одговор. Во некои случаи, огласот останува активен со недели или месеци, без да биде избран кандидат или без компанијата да комуницира дека процесот е завршен.

Но, не секој оглас што долго време е активен е нужно лажен.

Постојат голем број легитимни причини поради кои една компанија може да има подолг процес на регрутација. Некои позиции се тешко пополнливи поради недостаток на квалификувани кандидати, други бараат повеќе кругови интервјуа или дополнителни интерни одобрувања. Компаниите понекогаш објавуваат и континуирани огласи за позиции за кои постои постојана потреба од кадар, како што се продажба, производство, угостителство или корисничка поддршка.

Од друга страна, постојат и ситуации кога огласите се објавуваат без непосредна потреба од нов вработен. Причините можат да бидат различни: градење база на потенцијални кандидати за идни потреби, тестирање на состојбата на пазарот на трудот, проценка на достапните плати и квалификации или одржување впечаток дека компанијата расте. Иако овие практики не се секогаш злонамерни, тие можат да создадат погрешни очекувања кај кандидатите.

Последиците не ги чувствуваат само барателите на работа. Кога кандидатите повеќепати ќе аплицираат без никаква повратна информација, тие почнуваат да ја губат довербата не само во одредена компанија, туку и во платформите на кои се објавуваат огласите. Намалената доверба значи помал интерес за идни апликации, што на долг рок им отежнува регрутација и на компаниите кои навистина бараат нови вработени.

Затоа, транспарентноста станува една од најважните вредности во современиот процес на вработување. Компаниите можат значително да го подобрат искуството на кандидатите доколку:

• Објавуваат огласи само кога постои реална потреба од вработување;
• Редовно ги ажурираат или затвораат огласите кога процесот е завршен;
• Испраќаат повратна информација, дури и кога кандидатот не е избран;
• Јасно наведуваат кога станува збор за континуирана или идна потреба од кадар.

И кандидатите можат да бидат повнимателни при аплицирањето. Доколку забележат дека истата позиција постојано се објавува без промени, нема информации за процесот или компанијата нема никаква комуникација со кандидатите, вреди дополнително да се информираат пред да инвестираат време во апликацијата.

Онлајн платформите за огласување исто така имаат важна улога. Со редовна проверка на објавените огласи, јасни правила за користење и соработка со проверени компании, тие придонесуваат за поквалитетен и потранспарентен пазар на трудот.

На крајот, довербата е темелот на секое успешно вработување. Кога компаниите комуницираат отворено, платформите обезбедуваат квалитетна услуга, а кандидатите имаат точни информации, процесот на регрутација станува поефикасен и покорисен за сите. Лажните или неажурирани огласи можеби носат краткорочни придобивки за поединци, но на долг рок ја нарушуваат довербата што е неопходна за здрав и функционален пазар на трудот.

Прочитајте и за: Компаниите штедат часови работа: AI го менува начинот на вработување

Тагови: HR трендови

 

Порше на годишното собрание првпат објави прецизни податоци за платите на своите вработени, откривајќи дека речиси половина од 23.000 вработени добиваат повеќе од 100.000 евра годишно. Според објавените информации, околу 9.000 вработени влегуваат во оваа група, додека 201 службеник заработува повеќе од 300.000 евра, а 28 лица имаат годишна плата повисока од половина милион евра.

Уште повисоко на листата се само тројца вработени кои не се членови на управниот одбор, а чии примања надминуваат еден милион евра годишно. Овие податоци, објавени од германскиот специјализиран медиум „Аутомобилвохе“, покажуваат дека значителен дел од кадарот во Порше е платен далеку над германскиот просек, кој според статистиката лани изнесувал 54.066 евра.

Сепак, постојат големи разлики меѓу секторите. Според порталот Кунуну, проект менаџерите во Порше во просек земаат 91.800 евра, инженерите 83.400 евра, HR менаџерите 80.000 евра, вработените во набавки 75.600 евра, службениците 61.700 евра, производствените работници 58.200 евра, а логистиката 51.300 евра. Платите на управниот одбор се посебна категорија: поранешниот шеф Оливер Блуме лани добил 1.901.051 евра, додека најплатен бил директорот за развој Михаел Штајнер со 2.122.412 евра.

Тагови: автомобили вработени Порше

Првиот локално развиен и целосно независен AI модел за HR процеси носи нов стандард во регрутацијата

Пронаоѓањето на вистинскиот кандидат никогаш не било поважно  ниту покомплексно.

Компаниите секојдневно добиваат десетици, па и стотици CV-а, апликации и профили од различни канали. HR тимовите треба брзо да препознаат кој кандидат има вистинско искуство, вистински вештини и вистински потенцијал за конкретната позиција.

Во време кога пазарот на труд се движи побрзо од кога било, класичната регрутација повеќе не е доволна.

Затоа го создадовме Kariera AI,  паметна алатка базирана на вештачка интелигенција, создадена да ја направи регрутацијата побрза, појасна, поефикасна и потранспарентна.

Паметна селекција. Подобар преглед. Побрзи HR одлуки.

Kariera AI автоматски ги анализира биографиите и ги препознава најважните информации: образование, работно искуство, технички вештини, квалификации, seniority ниво и други релевантни параметри.

Наместо рачно прегледување на голем број апликации, HR тимовите добиваат јасна слика за тоа кои кандидати најмногу одговараат на конкретната позиција.

Алатката ги рангира кандидатите според барањата на огласот и критериумите поставени од компанијата, овозможувајќи побрза селекција и посигурна основа за носење кадровски одлуки.

Еден систем за сите кандидати

Kariera AI овозможува сите кандидати да бидат разгледани на едно место.

Покрај апликациите пристигнати преку платформата, компаниите можат да додадат и CV-а добиени преку е-пошта, препораки или други канали. Така, сите кандидати се анализираат според исти критериуми, без разлика од каде пристигнала нивната апликација.

Тоа значи подобра организација, поголема транспарентност и појасен увид во целиот процес на селекција.

Подобри огласи за подобри кандидати

Kariera AI не помага само при изборот на кандидати. Алатката дава и паметни препораки за подобрување на огласите за работа.

Системот може да укаже кои информации недостасуваат, што треба да се дополни и како описот на позицијата да биде појасен, поконкурентен и попривлечен за кандидатите.

Ова е особено важно денес, кога квалитетните кандидати не избираат само работно место, туку и компанија која јасно комуницира што нуди, какви услови обезбедува и каков профил бара.

Локален AI модел. Локална инфраструктура. Целосна контрола на податоците.

Ова решение не е создадено преку ноќ.

Целиот процес се развивал со години, преку практично искуство, анализа на реалните потреби на компаниите и континуирана работа на дигитализација на HR процесите.

Во соработка со Pikasa, развивме локален AI модел кој работи на локална инфраструктура. Тоа значи дека личните податоци не се изнесуваат надвор од екосистемот на Кариера и Pikasa, не се споделуваат со AI модели на интернет и не се користат надвор од контролираното локално окружување.

Со Kariera.AI поставуваме нов стандард во дигитализацијата на HR и регрутациските процеси  прв локално развиен и целосно независен AI модел, создаден според потребите на домашниот пазар, а во чекор со глобалните технолошки трендови.

AI што му помага на HR тимот – не го заменува.

Kariera AI не ја заменува човечката проценка. Напротив, ја зајакнува.

Вештачката интелигенција во HR индустријата не значи помалку човечност. Таа значи повеќе време за вистинска проценка, подобра комуникација со кандидатите и попаметни одлуки.

Работодавачите добиваат побрза селекција, подобар преглед на апликациите и поефикасен процес. HR тимовите добиваат повеќе време за интервјуа, комуникација и проценка. Кандидатите добиваат поголема можност нивните вештини, искуство и потенцијал да бидат правилно препознаени.

Паметното вработување започнува тука

Со Kariera AI ја отвораме новата ера на регрутацијата.

Побрза. Попрегледна. Попаметна.

Иднината на вработувањето веќе не е далечна визија. Таа започнува со локално развиени решенија, паметни алатки и подобро поврзување на компаниите со вистинските луѓе.

Kariera AI е новиот стандард за модерна, одговорна и паметна регрутација.

Тагови: HR аналитика Pikasa Analytics вештачка интелигенција човечки ресурси Kariera.AI