Забрана на дрвата, на мазутот, на јагленот се мерките кои ќе ги предложи Владата против енормното загадување. Иако мерните станици покажуваат дека во Скопје, Битола, Тетово и други градови зголемено и повеќе од дозволеното присуство на ПМ10 честички има и во летниот период, според Заев повеќе од 90% причината за загадувањето се токму граѓаните и нивниот начин на греење.

Заев во вчерашното гостување во МРТ најави дека во среда ќе има специјална седница на Буџет, за носење на Буџетот на Влада, додека редовната е во вторник. На таа седница покрај Буџетот ќе има претходна точка и животна средина каде што најмногу ќе алудираат на воздухот, целта е за првпат им е да издвојат посебна програма во Буџетот за животна средина и да канализираме средства дел од постојните буџетски програми и дел да додадат одредени средства.

Заедно со министерот ќе ги релоцираат средствата, ама и другите министерства да покажат капацитетност.

Знаете дека загадувањето доаѓа од затоплувањето односно од загревањето на домовите. И тоа е преку 91 или 92% тука се причините. Трајното решавање е со гасификацијата и со други инструменти. Дел од дебатата ќе биде забрана на дрвата, на мазутот, на јагленот после 5-6 години, веројатно такви одлуки ќе мора да носиме -истакна Заев.

Пописот на населението во Македонија ќе се спроведе во април 2020 година. Планирано е да бидат ангажирани околу 5.000 попишувачи на осум јазици, при што ќе се користи комбиниран метод: податоци на терен и податоци од регистри, изјави на денешниот брифинг со новинарите директорот на Државниот завод за статистика, Апостол Симовски.

Комбинираниот метод, како што појасни тој, се базира на податоци добиени на терен преку индивидуално попишување со податоци од претпописна статистичка база на податоци добиени од постоечки регистри што се поврзани со користење единствен матичен број награѓаните.

За изградба на претстојната пописна база ќе се користат податоци од Министерството за информатичко општество и администрација, МВР, Агенцијата за катастар на недвижности, Агенцијата за вработување, Фондот за здравствено осигурување, Министерството за труд и социјална политика, Министерство за образование и наука, Централен регистар, УЈП, Министерство за здравство и Министерство за надворешни работи.

Според Симовски, пописот ќе чини 8,5 милиони евра, од кои 3,5 милиони евра ќе бидат за Пилот пописот што ќе биде спроведен во април 2019 година и за набавка на опрема, а пет милиони евра за лицата што ќе бидат ангажирани за спроведување на пописот во 2020 година.

На предлог од Државниот завод за статистика во нацрт верзијата на законот за попис се бара да нема прашање за етничка и за верска припадност за пописот да се заштити од политизација, туку да има прашање за јазикот, односно за јазикот што вообичаено се зборува во домаќинството и за мајчиниот јазик.

Податокот за етничка припадност нема никаква употребна вредност, туку само се злоупотребува за политички цели и поради тоа стојам на ставот дека тој не треба да биде дел од пописот, рече Симовски.

Нацрт законот за попис најдоцна во понеделник ќе биде ставен на Единствениот национален електронски регистар на прописи на РМ (ЕНЕР) со цел да се добијат забелешки доколку има по текстот на законот, до крајот на годинава се очекува законот да ја помине владината процедура, а во февруари идната година да биде донесен и од Собранието.

Пробниот пописот ќе биде спроведен во април 2019 година во 32 пописни подрачја, а ќе бидат опфатени четири пописни кругови во осум региони. Како што рече Симовски, пробниот попис ќе се спроведе во Гостивар, Зелениково, Кисела Вода и во Свети Николе, а ќе опфати 3.000 домаќинства.

Со пописот во 2020 година ќе се попишува населението кое е во Македонија, како и странците кои се со подолг престој од една година во земјава, но ќе се врши попис и на отсутно население, кое е надвор од земјава повеќе од една година.

Директорот на ДЗС посочи дека попишувачи ќе бидат лица од локалното население, добро обучени, кои ќе треба да имаат познавање на ИТ технологијата, бидејќи попишувањето ќе се врши на лаптоп, а не со хартиени прашалници.

Со попишувањето на овој начин, како што посочи Симовски, ќе се намали времето за прибирање на податоците, ќе се намалат трошоците за пописна операција, како и времето потребно за обработка на податоците. На претходните пописи податоците биле обработувани за една до една ипол година, а сега се планира тоа да се заврши за не повеќе од три месеци.

Меѓунродниот експерт за попис Вернер Хауг на брифингот со новинарите ги презентираше меѓународните стандарди спроведување на попис на населението.

За да се подобри животната средина и новиот возен парк во земјава, Министерството за економија готви предлог што ќе биде дел од Законот за возила каде се предвидува Програма за субвенционирање на трошоци за вградување на уред за погон на ТНГ, метан или друг вид на алтернативно гориво во постоечките возила.

Во програмата се предвидува да се субвенцинира 50% од цената на трошоците за набавка и вградување на плински уред, но не повеќе од 300 евра во денарска противвредност за возило. Предвидено е да бидат опфатени над 1200 возила на годишно ниво, а мерката ќе стартува од 2019 година иако се уште не е прецизиран точниот датум.

Анализите покажуваат дека Авто ТНГ горивото или популарно наречен плин за возила веќе со децении наназад претставува најпопуларно алтернативно гориво за возилата на македонскиот пазар. Во моментов цената е 35 денари за литар, што е предност во споредба со останатите видови моторни горива, а тоа овозможува брзо враќање на вложените средства за вградување на уредот на плин.
Во земјава се возат нешто повеќе од 400.000 од кои околу 60% се дизел автомобили, а од останати кои се бензинци, пак половина имаат вградено плински уред. Тоа покажува дека околу 100.000 автомобили возат на плин.
Од Новус велат дека еден плински уред што се вградува чини од 300 до 1.100 евра во зависност од видот на возилото.
Според Џулијано Петров менаџер во плинскиот оддел на Новус плиност според неговата цена дефинитивно е најевтино и најекономично гориво.

Интересот за врградување на плински уреди е голем. Во Новус тие се местат за еден ден, а на секои 15.000 километри вршиме контрола и сервис – појаснува Петров.

Тестирање на плински уред се врши на Машинскиот факултет во Скопје, но има и неколку станици за технички преглед и регистрација на возила кои прават Атест на плинските уреди.
Исто така во предложените измени на Законот за возила што Владата ги достави до Собранието предвидени се и субвенции за купување електрични и хибридни возила, како и за купување ново возило, но доколку старото се одјави. Според предлогзаконското решение, во наредните три години за оваа намена од државната каса ќе се одлеат 12 милиони евра. Само за идната 2019 година се наменети 2,8 милиони евра, за 2020 година – 4 милиони евра, а за 2021 година – 5,2 милиони евра.
Како што информираат од ресорното министерство во Програмата за субвенционирање на купување нови хибридни и електрични се предвидува субвенција од 5.000 евра за набавка на електрично возило, а за набавка на хибридно возило субвенцијата е 3.000 евра. Во првата година е предвидено да се опфатат набавки на повеќе од 200 електрични и хибридни возила.
Во првата половина од 2018 година од вкупно 1.755 продадени нови возила само три се електромобили, а 27 хибриди.

До 2035 година во Македонија 40% од возилата ќе бидат електрични

Истражувачкиот центар за енергетика и одржлив развој при Македонската академија на науките и уметностите (МАНУ) изработи интересна студија за транспорт, анализа на политики и мерки, што предвидува до 2035 година во земјава за 35 отсто да се намали емисијата на јаглероден диоксид од транспортот.

За да се дојде до тоа Студијата предлага намалување на акцизата и ДДВ при увоз на хибридни возила од 18 на пет проценти и да нема акциза за електрични возила, како и постепено изедначување на акцизата за дизелот и бензините и зголемување на еколошката такса за горивата од сегашните 0,08 отсто од продажната цена за литар бензини и 0,03 отсто за литар дизел на 0,3 отсто.
Според студијата разликите од таксите да се користат за субвенционирање на купување на хибридни и електрични возила. Според нив власта за да стимулира еколошки возила треба да обезбеди субвенции од 5.000 евра за набавка на електрично возило и 1.000 евра за плуг-ин возила. До 2035 се предвидува да има промена на целиот возен парк во земјава и претежно да има електрични или хибридни возила, односно 40 отсто од возилата да бидат електрични од кои 25 отсто чисто електрични, а 16 отсто плуг-ин електрични возила.

Повисоки плати за лекарите специјалисти за 10% од јануари 2019 година и за 5% повисоки плати за вработените во здравството, образованието, градинките, одбраната, државната администрација, полицијата и правосудството од септември 2019 година. Ова е предвидено со Предлог-Буџетот за 2019, кој денеска во Министерството за финансии беше јавно презентиран пред синдикатите, коморите, невладиниот сектор, експерите и медиумите.

Вложуваме во подобро јавно здравство. Целта е најдобрите лекари, граѓаните да ги бараат во јавното, а не приватното здравство. Целта е да обезбедиме подобри здравствени услуги за сите. Сакаме да ги мотивираме здравствените работници. Знаеме дека работите не се менуват од денес за утре, но мора да се започне. Ние започнавме оваа година и продолжуваме посилно во 2019 година. Во Буџетот за 2019 година имаме обезбедено и средства за покачување на платите во образованието, како и вработените во градинките и детската заштита. Со цел градење на поефикасна и помотивирана јавна администрација планирано е покачување на 5% на платите на администрацијата, од септември 2019 година. Планирана е и реформа на јавната админстрација во 2019 година. Целта е да се подобрат јавните услуги. Јавната администрација ќе биде клучен носител на преговорите за присапување кон ЕУ и НАТО-рече министерот за финансии Драган Тевдовски.

Министерот за финансии истакна дека Буџетот за 2019 година е социјален, но и развоен. Во Буџетот е предвидена реформа во системот на социјалната заштита преку воведување на Минимален гарантиран приход и Семеен пакет на права. Со ова се олеснува пристапот до социјален надоместок на постојните 24.000 домаќинства кои во моментот се приматели на социјална помош, но се создава можност и за дополнителни 11.000 домаќинства. Предвидено е и воведувањето социјална пензија која ќе опфати околу 6.000 лица кои имаат барем еден работен ден стаж и наполнети 65 години и која ќе изнесува 40% од просечната исплатена пензија.