Како мал бил пациент на Онкологија, а девет години подоцна е студент по Информатика. Приказната на Бојан Ристовски од Скопје, младо момче кое има 21 година, ја пренесува Телеграф.мк. 

Бојан сега има 21 година. На 11 години, на летување со родителите, случајно забележале топче на десниот бут. По низа прегледи, испитувања, биопсија, била потврдена страшната дијагноза - Бојан имал не-Хочкинг лимфом, вид канцер. Му била направена операција, следувала хемотерапија. Лекувањето го заковало девет месеци за болнички кревет.

Јас тогаш и не знаев колку сум бил болен. Дури пред неколку години открив што всушност е оваа болест. Ми се чинеше дека објаснувањето на „Гугл“ е многу пострашно од тоа на што јас се сеќавам. Сега, кога ги гледам родителите на децата болни од рак, сфаќам колку им било тешко и на моите родители - вели тој.

Терапијата ја поднесувал како и сите мали пациенти - некогаш добро, некогаш лошо. 

Кога ќе ја слушне дијагнозата, родителот веднаш паѓа во очај, мисли само на лошото. Нема потреба од депресија, ниту од прашањето „зошто баш мене да ми се случи“. Мора да се соочиме со болеста и да собереме сили да поминеме низ неа. Да, исходот е неизвесен, но треба да се биде позитивен и да се има надеж. Тоа е мојот рецепт - вели Бојан.

Покрај битките со болеста, по оздравувањето има и други битки - оние со средината. Како детето ќе се врати во одделението во кое учело, како ќе го гледаат другарите, колку последиците од терапиите ќе влијаат врз формирањето семејство. Ова се прашања што загрижени родители му ги поставуваат и нему, кога секој 15 февруари (Меѓународниот ден на децата болни од рак) со својата мајка носи кошници со слатки и им ги дели на децата што се лекуваат на Клиниката за детски болести.

На децата треба да им се објасни дека околината може да ги избегнува, дека нивните врсници или наставници може нема да имаат разбирање за нив. Во прв момент, тоа ќе им падне многу тешко. Но, трпението е клучно во такви моменти. Со тек на време, сè си доаѓа на свое место - го споделува Бојан своето искуство.

Годишно по 30-40 деца се лекуваат на хематоонколошкиот оддел на Клиниката за детски болести. Меѓу нив има и новороденчиња. Најчести видови тумори кај децата се леукемиите, лимфомите, невробластомот и туморите на централниот нервен систем.

Бизнис ангелите се успешни претприемачи, сопственици или менаџери на големи компании, со чија финансиска моќ, искуство, знаење, мрежа на контакти… поддржуваат старт – ап бизниси. Бизнис ангелите ја пополнуваат празнината во финансирање на идеи или стартапи во рана фаза, коишто во очите на банките и другите финансиски институции се високоризични.

Профитот е “ѕвезда водилка“

Профитот е крајната цел на секој бизнис ангел, кога одлучува дали ќе инвестира во некој старт – ап. Тој се води од идејата дека вложува пари за да создаде успешна и профитабилна компанија, што е самоодржлива на пазарот и отпорна од голем број притисоци. Тие инвестираат, креираат, поттикнуваат раст и развој и на крајот може да го напуштат бизнисот.

Инвестираат во успешен тим

Бизнис ангелите најчесто ги избегнуваат поединците и нивните идеи. Гледаат потенцијал во тим што има капацитет и способност да расте и се развива во иднина.

Бараат големи и уникатни идеи

Во светот постојат безброј идеи и мали стартапи коишто нудат исти или слични решенија, производи и услуги. Вниманието на бизнис ангелите може да им го привлече некоја голема идеја што отскокнува од останатите, нуди поголема вредност, има поголем потенцијал и јасна насока за развој на пазарот. Инсистираат идејата да биде поткрепена со факти, а не со празни зборови или ветувања.

Неопходна е доверба во идниот бизнис партнер

Бизнис ангелите развиваат релација на доверба со својот потенцијален партнер. Никогаш не донесуваат одлука од прво гледање, бидејќи им е потребно повеќе време, неколку средби, подобро запознавање за да може да ја создадат целосната слика.

Добро разработен бизнис план е од клучно значење

Некој старт – ап би можел да позајми пари од блиски луѓе без да им прикаже бизнис план, но тоа не поминува кај бизнис ангелите. Професионалните инвеститори знаат дека претприемачите кои започнуваат бизнис без соодветен план се осудени на неуспех.

Извор - БизнисИнфо

Можете ли да замислите да работите постојано, без никаков одмор или слободен ден? Не, нели? Е, не таков е случајот со 61-годишната Донг Минжу, која се смета за најуспешна бизнис дама во Кина. За целиот свој работен стаж од 27 години таа не искористела ниту еден ден одмор.

Донг е на чело на компанијата за климатизација Gree Electric, чиј бизнис е во вредност од 22 милијарди долари. Родена е во 1954 година и е најмала од 7те деца во семејството.

По завршувањето на образованието во 1975 година, започнала со работа во државната администрација, поточно во хемиска лабораторија. Таа работи таму 15 години.

Во 1990 година, кога има 36-годишна возраст и неодамна станува вдовица, одлучува да се пресели во Зухај – поразвиениот економски дел на Кина, за да бара подобра работа. Тогаш започнува работа во компанијата Haley, која потоа се претвора во Gree Electric и од овој ден е секогаш на работното место – буквално и фигуративно.

Таа се искачува на хиерархиска скала од најниско до највисоко ниво. Во 1994 година е раководител на продажба на компанијата. Кога во 1996 година Gree Electric излегува на берзата, Донг веќе е потпретседател.

Под нејзино раководство продажбата на компанијата минува онлајн, што се одразува силно на профитот. Откако е на чело, акциите на компанијата се зголемиле за 2.300%, што носи 12 милијарди долари приходи годишно.

Паралелно со работата, таа успеала да издаде и 2 книги. Автобиографијата ја има издадено во 2006 година, која го носи името Relentless Pursuit (тежнение), каде потоа прераснува во во популарна телевизиска серија.

А за паузата, тврди дека ќе има доволно време за неа, кога ќе се повлече од бизнисот и се пензионира.

Почна нов циклус на бришење фирми од евиденцијата на Централниот регистар. Од февруари институцијата ги брише трговските друштва или трговците поединци кои заклучно со 2015 година не доставиле годишна сметка за претходната 2014 година или не поднеле пријава за упис на адреса на електронско сандаче.

Во следните неколку месеци на таков начин ќе престанат да постојат над 6.500 фирми. Во меѓувреме од крајот на минатиот месец Централниот регистар состави нова листа од неактивни фирми кои до крајот на минатата година не доставиле годишна сметка за 2015 година. На овој список моментно има над 4.300 фирми, а дали сите ќе бидат избришани во февруари в година ќе зависи од тоа дали во текот на оваа година газдите ќе ја регулираат обврската или, пак, самите или некој доверител не отвори постапка за стечај.

Од Регистарот неодамна информираа дека е составена листата и дека сопствениците имаат повеќе опции на располагање.

- Доколку во рок од една година Централниот регистар на Република Македонија не добие писмено известување за поднесен предлог за ликвидација, односно предлог за отворање стечајна постапка од страна на овластен подносител, го брише субјектот и бришењето го објавува на својата веб-страница - велат од Централниот регистар.

Во меѓувреме институцијата ќе го ажурира списокот или ќе ги отстрани фирмите потенцијални кандидати за бришење ако се тргнат и причините поради кои биле ставени на списокот. Сепак, некои од газдите со кои разговаравме сакаат да им бидат избришани фирмите оти станува збор за неактивни компании кои само трупаат долгови, а не функционираат. Со бришењето се бришат и долговите за фирмарина или за радиодифузна такса.

Kаква ќе биде динамиката на бришење на овие 6.500 фирми за кои истече рокот ќе се види во следните месеци. Во 2015 година кога се бришеа фирми што не доставиле пријава за 2013 година тој процес траеше до мај до кога беа избришани 34.260 компании. Најмногу бришење имало во април - речиси 20.000. Во февруари од евиденцијата снема 5.296, во март нешто над 9.000, а во мај осум правни субјекти.