Во сила стапи Законот за измени и дополнување на Законот за возила со кој се предвидува субвенционирање на граѓаните што ќе набават ново или половно возило со EURO 5 или повисоки еколошки стандарди, субвенции за вградување на плински или метанов уред во возилата со EURO 4 и понизок стандард и воведување на еколошки налепнции за возилата. Сепак, условите и критериумите за субвенции за набавка на возило се уште не се утврдени, а одредбата за еколошки налепници има одложено дејство и ќе стапи на сила по 12 месеци, пренесе МИА.

-Условите и критериумите за субвенција на возила ќе се одредат во Програма за субвенционирање која ќе биде донесена и објавена од страна на Владата. Во нив ќе се прецизира колку пари ќе се субвенционира за набавка на возило со EURO 5 стандард и повеќе, дали висината на субвенцијата ќе зависи од набавната цена и како ќе се утврдува за половни возила, како и дали ќе се субвенционираат и граѓаните кои сами ќе набават возило од странство, велат од Министерството за економија.

Според нив, откупот на старо возило ќе биде единствен услов за добивање субвенција за ново возило и се уште не е прецизирано дали субвенционирањето ќе биде по принципот „прв дојден, прв услужен“ или ќе добива секој без разлика колку ќе купат нови возила. Во моментов во соработка со другите министерства, посочуваат, се разгледува и дали субвенцијата ќе се добива откако претходно граѓанинот целосно ќе го плати новото возило или на некој друг начин.

Во законското решение се предвидени 170 милиони денари за субвенционирање на вградување на плински и метанов уред во возилата со EURO 4 стандард и помалку, како и за купување на половно или ново возило со повисоки еколошки стандарди по системот старо за ново. Првично овие средства беа предвидени за субвенционирање на набавка на нови хибридни и електрични возила, но со амандманите решението се преиначи. Сепак, оние што ќе купуваат хибридни и електрични возила ќе можат да користат субвенции од програмата старо за ново возило.

Лани во земјава биле регистрирани 477.350 возила, од кои околу 60 отсто се дизел автомобили. Од нив 90 отсто се постари од 10 години.

Ќе се субвенционира и набавка на полвни возила со EURO 5 или повисок стандард

Министерот за економија Крешник Бектеши во интервју за ТВ Алсат најави дека се предвидува да се субвенионира и набавка на половни возила со EURO 5 и повисок стандард од салоните на импортерите на половни возила по принциопот старо за нова, а единствен услов за тоа е да се одјави претходното возило.

Тој неодамна ги презентираше измените во Законот за возила и посочи дека се плод на барањата на граѓаните за намалување на загадување на воздухот од страна на возилата и се однесуваат за две важни подрачја, сообраќајот и екологијата. Прецизира дека субвенционирањето се очекува да почне од наредната година, но додаде дека е можно да се случи и порано доколку се обезбедат средства со најавениот ребаланс на Буџетот.

Бектеши појасни дека со измените се воведуваат субвенции за вградување на уреди на течен нафтен гас (плин) или компримиран земјен гас односно метан, субвенции за купување на ново возило илиполовно возило што ги задоволува повисоките еколошки стандарди, ако претходно користеното се одјави. Се воведува и еколошка категоризација на возилата во зависност на стандардите кои ги исполнуваат. Тие доброволно ќе се одбележуваат со зелена, жолта и црвена налепница, а се воведуваат и жолти регистарски таблички за таксистите и унифицирана светлечка табла за такси возилата.

Со мерката за субвенционирање на трошоци за вградување на уред за погон на ТНГ, метан или друг вид на алтернативно гориво во постоечките возила се предвидува да се субвенцинира 50 отсто од цената на трошоците за набавка и вградување на уредот, но не повеќе од 300 евра во денарска противвредност за возило и се предвидува да бидат опфатени над 1.200 возила на годишно ниво, рече тогаш Бектеши.

За мерката за субвенционирање на купување на ново лили половно возило со одјава на старо возило, додаде, се предвидуваат субвенции од две до три илјади евра во денарска противвредност, како и во првата година да се субвенционира набавката на 200 до 500 возила. За еколошката категоризација на возилата истакна дека ќе биде на доброволна база и ќе има три категории со различни бои на налепници. На барање на здруженијата за автотакси превоз се воведуваат жолти таблици за такси возилата, со цел да се препознаваат лиценцираните и регистрираните такси возила, и да се спречи нелојалната конкуренција.

Американскиот Стејт департмент ги објави податоци за американската лотарија. Речиси 84.000 апликанти се избрани случајно од системот, од околу 15 милиони апликации за програмата „ДВ 2020“.

Според бројот на оние кои добиле позитивен одговор на прво место е Русија со 5.118, а веднаш зад неа е Албанија со 3.603, потоа следуваат Украина со околу три илјади и Турција со 2.709.

Нашите соседни земји се чини дека имаат помал интерес за американскиот сон, бидејќи избрани се 260 граѓани од Косово, 249 од Македонија и само 35 од Црна Гора, објавија албанските медиуми.

Дизелот поскап за половина денар, бензините со непроменета цена. Ова е одлуката на Регулаторната комисија за енергетика неделава.

ЕУРОСУПЕР БС-95 изнесува 69,50 ден/лит, а на ЕУРОСУПЕР БС-98 71,50 денари за литар.

ЕУРОДИЗЕЛ (Д-Е V) се продава за 62 денари, а Екстра лесното масло за домаќинство (ЕЛ-1) сега се продава за 52 денари за литар.

Малопродажната цена на мазутот М-1 НС се зголеми за 1,162 денари и килограм од тој енергенс ќе чини 35,343 денар.

РКЕ ја донесе одлуката врз основа на цените на нафтените деривати на светскиот пазар и курсот на денарот во однос на доларот во тек на изминатата недела. Утре нова цена на горивата, па останува да видиме дали ќе возиме поскап или поевтин безнин и дизел.

Иницијативата НаТочак преку соопштение прашуваат дали донесувачите на одлуки од локалната власт, сообраќајните инженери и урбанистите би пешачеле или возеле точак на асфалт жежок 58.9 степени?

„Ако не, зошто очекуваат другите да го прават тоа? Тротоарите и велосипедските патеки не треба да се декор на коловозите за автомобили. Тие треба да се во функција на оние кои ги користат. На луѓето на овој град“, се вели во сопштението на иницијативата на Фејсбук.

Преку објавените фотографии, иницијативата прикажува измерена температурата на асфалтот, на пешачките премини, велосипедските патеки и пешачките острови.

​ ​

Вело-активистите потенцираат дека создавањето улици не е само просто фрлање асфалт, туку создавањето улици е создавање на живот во еден град.

Од НаТочак препорачуваат дека е неопходно планирање на зеленило во склоп на улиците, особено позиционирано да им прави сенка на оние кои не се климатизирани, пешаците и велосипедистите.

„Лошиот дизајн на улиците во еден град ги поттикнува луѓето на своја рака да наоѓаат решенија. Пешаците и велосипедистите прават прекршоци (движејќи се по туѓи патеки или во обратна насока) затоа што бараат сенка и ја избегнуваат екстремната загреаност на патеките изложени на сонце. Луѓето се однесуваат како луѓе, а планерите треба да планираат град според потребите на луѓето, а не според потребите на автомобилите“, стои во соопштението.

Дополнуваат дека пешаците и велосипедистите го извлекуваат „подебелиот крај“ при чекање на семафори кои се изложени на сонце и програмирани да им служат само на автомобилите. Велат дека е фасцинантно тоа што температурата на зелениот простор, дури и кога е изложен на сонце е блиска и пониска од амбиенталната температура,  за разлика од асфалтот кој е 20 степени повеќе.

„Од сето ова заклучуваме дека во следните правилници, планови за Скопје-вело-град, генерален план за Скопје, планови за зеленило и за справување со климатските промени, проекти за сообраќајници итн. мора да има задолжително планирање на богато зеленило на улиците и особено булеварите (па и по цена на скратување коловозни ленти) и соодветно позиционирање за да биде од најголема корист. Не смее да има патеки кои во текот на целиот ден се изложени на сонце. Како што рековме лани на една критична маса: Дрвјата се наша клима!“, констатираат од НаТочак.