Првиот вицепремиер Артан Груби откако Владата на вчерашната седница го утврди текстот на Предлог законот за преземање на административни службеници вработени преку Програмата за соодветна и правична застапеност, вели дека откако ќе биде изгласан ќе следува план на распоредување на 1.200 кадри, а Министерството за информатичко општество и администрација ќе направи трансфер листа.

Овие луѓе воопшто не се виновни што биле вработени, а никој 10 години не ги земал да работат. Дузина министри, вицепремиери, градоначалници, директори се извртеа, секој си вработувал свои луѓе, овие останале. Со законот Владата на почеток ќе треба да усвои план за распоредување на овие околу 1.200 кадри каде што има празни места, а има потреба од вработување во 2021 година. Ќе се земат систематизациите на институциите, да се види каде фалат кадри. Во МИОА ќе се направи трансфер листа од овие вработени по Рамковниот договор. Институциите на кои им треба вработувања, ако звањето и квалификацијата на кадарот што го бараат го има на трансфер-листата, обврзувачко ќе биде од неа да вработи. Се разбира, ако се совпадне со местото на живеење на вработениот, зашто со сила никој никого не тера да се сели од еден во друг град, вели Груби за СДК.

Целта на овој закон е да се распоредат нераспоредените административни службеници од Министерството за политички систем и односи меѓу заедниците, вработени преку оваа програма во органите на државната и на локалната власт и други државни органи основани согласно со Уставот и со закон и во институциите кои вршат дејности од областа на образованието, науката, здравството, културата, трудот, социјалната заштита и заштитата на детето, спортот, како и во други дејности од јавен интерес утврден со закон, а организирани како агенции, фондови, јавни установи и јавни претпријатија основани од државата или од општините, од градот Скопје, како и од акционерски друштва во државна сопственост.

Министерот за политички систем како предлагач на овој закон вели дека фалат кадри и со средно образование насекаде, а најмногу по шалтерите во МВР, во ПИОМ, Катастар, а со овој закон, вработените „По Рамковен“ доколку не им се допадне тоа што е мала почетна плата или слично, го губат трајно правото да се вработат по истиот.

За 100% ќе поскапат месечните карти за вработени за во катните гаражи со кои стопанисува Јавното претпријатие „Градски паркинг“ во Скопје. Според новиот ценовник што треба да биде одобрен на седницата на Советот на Град Скопје в среда, се предвидува цената за месечните паркинг карти во катните гаражи наместо 1.000 да биде 2.000 денари, дознава Република. 

Со новиот предлог-ценовник се предвидува и поскапување за по пет денари на сите паркинзие со кои стопанисува ЈП „Градски паркинг“, како за зонските паркиралишта, така и за отворените со рампа.

Еден час паркирање во зона А наместо 45 ќе биде 50 денари, во зона Б наместо 35 ќе биде 40 денари, додека во зоните Ц и Д каде досега еден час чинеше 25 сега ќе биде 30 денари.

Причина за зголемување на цената за паркирање е поради зголемените трошоци за одржување на јавните паркинзи и катните гаражи со кои стопанисува претпријатието. Зголемени се трошоците за вода, струја, одржување на лифтовите и опремата инсталирана на паркиралиштата – соопштуваат од „Градски паркинг“.

Дали вакцина против Ковид ќе биде услов за патување во друга земја?

И во Македонија секој кој ќе се вакцинира и ќе побара може да добие сертификат, бидејќи најверојатно без ваков документ нема да може да влезе во многу држави. За ова треба да прецизираат министрите за земјите членки на ЕУ.

-Може некои земји ќе им побараат документ за да може да се влезе на нивна територија, ова допрва ќе се организира. И ние најверојатно ќе издаваме таков сертификат односно документ за да може граѓаните оние кои сакаат да патуваат, рече д-р Исјановски за Сител. 

Инаку вакцинацијата против Ковид ќе се закажува преку “Мој термин” и целиот процес ќе се следи преку него. Во меѓувреме секој Здравствен дом треба да пополни прашалник и детално да го наведе бројот на кадар кој ќе ја спроведува имунизацијата, дали се соодветно обучени, колку вакцинални пунктови имаат и дали персоналот поминал обука за одржување на “студениот синџир”за вакцини. Ова било разговарано на денешниот состанок на министерот за здравство и претседателката на Комитетот за имунизација со директорите на сите Здравствени домови во земјава на кој биле посочени неколку клучни сегменти за вакцинацијата против коронавирусот. Ќе се спроведува во сегашните пунктови, а вработените ќе поминат соодветна едукација. Еден од предизвиците ќе биде чувањето,доколку во Македонија дојде вакцината на Фајзер и Бионтек која се одржува на -70 степени и затоа министерството најави донација која ќе стигне во јануари.

 -Ние како Здравствен дом Скопје немаме такви фрижидери на -70, не верувам дека и помалите здравствени домови имаат. Ќе почекаме да видиме дали министерството ќе ги набавува, а ние сме подготвени како Здравствен дом Скопје да набавиме, изјави д-р Виктор Исјановски, директор на Здравствен дом Скопје.

И додека во некои земји денови се во прашање за почеток на вакцинацијата  против Ковид, кај нас ќе почне најрано во првото тримесечје од 2021. Според најавите од здравствените власти планирано е да се набават 2.4 милиони дози за 60 до 70 проценти од населението. Вакцината ќе биде бесплатна и личен избор на секој граѓанин.

Новогодишната елка што е поставена на плоштадот „Македонија“ ќе светне вечер во 19 часот, како предвесник на новогодишното празнување во Скопје.

Поради пандемијата од корона вирусот, оваа година светнувањето на новогодишната елка во центарот на градот ќе биде симболично. Градот Скопје апелира до граѓаните кои ќе бидат затекнати на плоштадот, да ги почитуваат препорачаните мерки за заштита, да носат маски и да го одржуваат пропишаното растојание.

На плоштадот „Македонија“ вечер ќе присуствува и градоначалникот Петре Шилегов.