„Европскиот извештај – Извештај за сообраќајна незгода“ е образец изготвен од Националното биро за осигурување. Истиот се добива бесплатно од друштвото за осигурување при склучување договор за задолжително осигурување (полиса) и на неговата задна страна содржи упатство за употреба во кое детално се наведени начинот и условите за негово користење.

Многу често возачите се во дилема: „Дали да се повика полиција или да се пополни Европски извештај? Дали, кога и како се користи Европскиот извештај? Прашањето е често пати поставувано, па токму затоа, РСБСП со појаснување за најголемите дилеми на возачите поврзани со Европскиот извештај.

Европски извештај се пополнува само во случај на сообраќајна незгода со мала материјална штета и го пополнуваат учесниците во сообраќајната незгода. Европски извештај не се пополнува во случај на сообраќајна незгода во која има повредени лица, загинати лица и во сообраќајна незгода во која настанала голема материјална штета. Под „мала материјална штета во сообраќајна незгода“ се подразбира штета настаната на објекти и на возила на кои не им се оштетени виталните делови за управување и за запирање, а возилата можат самостојно да се движат по патот.

Возачите - учесници во сообраќајна  незгода во која е предизвикана мала материјална штета, откако ќе го пополнат и потпишат Европскиот извештај за сообраќајна незгода, се должни веднаш да ги отстранат возилата од коловозот и да овозможат непречено одвивање на сообраќајот. Прекршочен платен налог во износ од 250 евра, во денарска противвредност, ќе му се издаде на возачот-учесник во сообраќајна незгода кој постапува спротивно од наведената одредба.

Возачите-учесници во сообраќајна незгода во која е предизвикана мала материјална штета, кои пополниле и потпишале Европски извештај за сообраќајна незгода, не се должни за истата да го известат Министерството за внатрешни работи.

Европскиот извештај не претставува признавање вина и не значи дека меѓу возачите е постигната согласност за вината во сообраќајната незгода, ниту дека со потписот се признава вина, туку служи единствено за утврдување на фактичката состојба.

Полициските службеници на Министерството за внатрешни работи се должни да излезат на местото на сообраќајната незгода (Европски извештај не се пополнува во сообраќајна незгода) во која е предизвикана мала материјална штета, ако тоа го бара едниот од учесниците во сообраќајната незгода и тоа во случај кога:

eдно од возилата нема регистарски таблици или не е осигурано

eдно од возилата има странска регистарска таблица

е очигледно дека еден од возачите е под дејство на алкохол, дрога или други психотропни супстанции

еден од возачите не поседува возачка  дозвола од соодветната категорија

на еден од возачите му е запишана прекршочна санкција во возачката дозвола – забрана за управување со моторно возило

еден од возачите одбива да даде свои лични податоци, односно податоци за возилото

еден од возачите го напуштил  местото на сообраќајната незгода

ако возачот сам учествува во сообраќајна незгода

Сопственикот на возилото е должен да го извести друштвото за осигурување со кое склучил договор за осигурување од автомобилска одговорност за настанувањето на сообраќајната незгода и да достави пополнет Европски извештај во рок од 30 дена од настанувањето на незгодата.

Учесниците во сообраќајната незгода,  на барање на одговорното друштво за осигурување, се должни опширно да известат за околностите под кои се случила сообраќајната незгода, во спротивно, се должни да ја надоместат штетата настаната од неисполнување на обврската за известување.

Во случај на сообраќајна незгода со мала материјална штета во која учествуваат две возила, се пополнува само еден комплет Европски извештај. Доколку во незгодата учествуваат три возила, се пополнуваат два комплета, четири возила – три комплета, итн. Притоа, воопшто не е важно чиј примерок се пополнува, ниту кој го пополнува.

При пополнувањето на Европскиот извештај  важно е да се користи хемиско пенкало. 

Во  случај на сообраќајна незгода со мала материјална штета се препорачува учесниците во сообраќајната незгода да направат фотографии од  поголема и непосредна оддалеченост,  да се фотографира состојбата на возилата, оштетувањата, отпаднати делови, местото на незгодата,  трагови на кочење, итн.

Придобивките од  користење на  „Европски извештај “ се повеќекратни и тоа:

Намалување на сообраќајниот метеж после случена сообраќајна незгода со мала материјална штета

Побезбедно одвивање на сообраќајот

Брзо и ефикасно обесштетување на оштетените странки

Помалку административни процедури и заштеда на време и пари

Намалување на можноста за дополнителни санкции, итн.

РСБСП со апел до учесниците во сообраќајот: Возете внимателно и бидете  одговорни учесници во сообраќајот. Бидете одговорни и во случај на сообраќајна незгода и постапувајте согласно законот и принципите на хуманост и солидарност.

Привремено се ограничува распределбата и исплатата на дивидендите во банките.

Оваа одлука вчера ја донел Советот на НБМ.

Советот на Народната банка денес одржа редовна седница на којашто донесе Одлука за привремено ограничување на распределбата и исплатата на дивиденда на акционерите на банките. Оваа одлука се однесува и на штедилниците.

Како што беше истакнато на седницата, со појавата на пандемијата на ковид-19, Народната банка донесе повеќе мерки за монетарно олабавување и регулаторна флексибилност, како поддршка на банкарскиот систем и економијата во целина, во услови на криза. Најновите показатели потврдуваат дека банкарскиот систем успешно ја одржува својата стабилност, при што кредитите и натаму растат, а капиталните позиции на банките се стабилни. Сепак, неизвесноста од корона-кризата сè уште трае. Поради тоа, со Одлуката донесена на денешната седница, којашто е времена мерка, се делува превентивно, за натамошно зголемување на отпорноста на банкарскиот систем и одржување на стабилноста, во услови на неизвесност околу понатамошниот тек на здравствената криза, соопштија од НБМ.

Одлуката е од привремен карактер и ќе важи до крајот на оваа година, а Народната банка, најдоцна до 30 септември, повторно ќе ги оцени околностите со пандемијата поради кои е донесена одлуката. Во зависност од оцената, Народната банка може предвремено да го укине ограничувањето од оваа одлука.

Како што беше нагласено на седницата, токму поради неизвесноста којашто сѐ уште постои, се очекува дека банките, како и досега, и натаму претпазливо ќе ги планираат своите капитални потреби и ќе му дадат приоритет на зачувувањето и на натамошното јакнење на капиталните ресурси. Ова е од исклучително значење за натамошно зачувување и јакнење на стабилноста на банкарскиот систем, како и за обезбедување натамошна солидна кредитна поддршка за граѓаните и компаниите. Заради корона-кризата, вакви привремени ограничувања во однос на дивидендите се воведени и во земји од регионот и пошироко.

Советот ги разгледа и ги усвои Финансиските извештаи на Народната банка и Годишната сметка за 2020 година, коишто беа предмет на ревизија на независно друштво за ревизија. 

Согласно со мислењето на независниот ревизор, коешто беше презентирано на седницата, Финансиските извештаи ја прикажуваат објективно, во сите материјални аспекти, финансиската состојба на Народната банка на 31 декември 2020 година, како и резултатите од работењето и паричните текови за годината што тогаш завршува, во согласност со Меѓународните стандарди за финансиско известување, велат од НБМ.

На 26 февруари 2020 во Македонија беше регистриран првиот случај на коронавирус, кај патничка која пристигна од Италија патувајќи со комбе, но и покрај тоа, не е регистриран ниеден позитивен сопатник.

До овој ден, коронавирусот ни се чинеше како нешто што се случува далеку од нас, иако дури и во најблиското соседство имаше потврдени случаи, а границите на државата и понатаму беа отворени, што значи дека секојдневно заминуваа и пристигнуваа голем број луѓе. Но, кога одекна веста за првиот потврден случај, стравот и неизвесноста станаа поголеми, бидејќи веќе сите знаевме дека таа бројка ќе расте. Само неколку денови подоцна беа регистрирани уште два нови случаи, сопружниците од Дебар кои исто така допатувале од Италија.

Иако првото искуство со вирусот беше дека позитивната пациентка не „создаде“ кластер, со сопружниците од Дебар не беше така. Секој ден растеше бројот на заразени во градот, луѓе кои имале директни контакти, а имаше и неколку медицински лица кои беа позитивни на коронавирусот, по што се воведе кризна состојба во Дебар и Центар Жупа и беше ангажирана Армијата.

Но, она што ја разбранува јавноста и предизвика голем бес и лутина беше неодговорното однесување на докторката Нина Цаца, која во тоа време беше и директорка на Клиниката за кожни болести. Таа исто така се врати од Италија од скијање и беше официјално четвртиот регистриран позитивен случај на коронавирус во државата. Меѓутоа, наместо да се изолира и покрај симптомите, таа одела на работа и во меѓувреме одржала стручна конференција со голем број присутни лица од фелата.

Вонредна состојба на цела територија

Сериозноста на ситуацијата беше клучна за да се воведат препораки за намалено користење на јавниот превоз, привремено распуштање на учениците од физичка настава додека да се најде друго решение, препораки за работа од дома за хронично болните и високоризичните лица (во оние професии каде тоа е возможно), но и затворање на кафулињата и угостителските објекти, кои беа први на удар на кризата која започнуваше.

„Редовно мијте ги рацете, доколку нема услови за тоа користете средство за дезинфекција, носете маска и ракавици, не допирајте го лицето и очите“ беа само дел од препораките на СЗО кои важеа и тука. Но, преку ноќ цените на овие средства за заштита нагло пораснаа, поради големата побарувачка, но и неможноста на аптеките и продавачите да се снабдат со доволно роба. Ситуацијата не ја олеснуваше ниту паничното купување на големи залихи од овие средства, што во даден момент продавниците и аптеките беа принудени да ги ограничат купените количини по лице.

Министерот за здравство Венко Филипче на секојдневни прес-конференции известуваше за тековната состојба и заштитните мерки кои беа носени во консултација со претседателот Стево Пендаровски, со оглед на тоа што парламентарните избори беа одложени, а техничката влада ги нема истите ингеренции како регуларно избраната.

После Дебар, полициски час беше прогласен за викенди и во Скопје и Куманово, за после извесно време истото да важи за целата територија. Учениците не посетуваа редовна настава, туку таа се изведуваше онлајн, угостителските објекти се одржуваа со помош на подготовка на храна за носење, доколку имаа дозвола за тоа. Но, дали овие мерки дадоа резултати? Кај оние кои одговорно ги почитуваа, да, но сведоци сме дека многупати беше прекршуван полицискиот час, а и до ден-денес, една година подоцна, полицијата постојано изрекува казни за неносење на заштитна маска.

Каква е ситуацијата денеска?

По велигденските празници имаше нагло паѓање на бројките на новозаразени лица, а со доаѓањето на потоплите месеци, разбирливо беше дека сите луѓе сакаат да излезат и да се прошетаат, да се видат со оние со кои со месеци контактирале само преку телефон или видео-повик, но и да се вратат на секојдневните животни навики.

Сепак, сè уште сведочиме на грубо непочитување на најосновните заштитни мерки - одржување разумно растојание и носење маска.

Во меѓувреме, угостителските објекти започнаа со работа, обложувалниците, казината, одредени бизниси и стопанства, но и покрај тоа, последиците од нагло создадената криза се сè уште видливи. Голем број луѓе останаа без работа или пак земаат намалена плата, малите бизниси се соочуваат со неисплатливост... Бројот на новозаразени варира, има периоди кога се намалува, а потоа нагло расте, а Министерството за здравство веќе одамна не ги одржува редовните прес-конференции, туку известува за состојбата преку веб-страницата и официјалните профили на социјалните мрежи.

За жал, сведочиме како секојдневно грубо се крши заштитниот протокол, а одговорноста никој не ја бара кај себе, туку секогаш кај некој друг.

Вакцина против КОВИД-19 и различните мутации

Голема доза на надеж дава создавањето на вакцината, со која би запрела пандемијата. Во многу држави низ светот веќе се изведува вакцинација според национален план изготвен од властите, а се набавуваат вакцини од повеќе производители. Секако, дури и овој процес е опкружен со голем број контроверзии, но и теории на заговор кои масовно се шират токму со помош на социјалните мрежи.

Сосема очекувано е што постојат и неколку мутации на коронавирусот, бидејќи тој веќе предолго постои и се задржува меѓу луѓето и истиот (како и сите вируси) има способност да мутира, за да може да се адаптира на средината.

Што и да се случи, сепак не можеме да го заборавиме фактот дека од еден локален пазар во Вухан, во далечната Кина, започна нешто што го смени начинот на живеење и функционирање на луѓето во целиот свет.

За жал, голем број лица ги изгубија животите бидејќи не се изборија против заразата. Меѓу нив имаше и медицински персонал, лица со хронични болести, со нарушено здравје, но и целосно здрави и млади личности кај кои заразата со овој вирус беше фатална.

А што се однесува на заштитните маски, дезинфекциските средства и ракавиците, тие веќе се достапни и по различни цени, со најразлични модели и дезени, бои, мириси, буквално како да станаа најнормален дел од секојдневниот живот.

Нагло паднаа цените на нафтата. Светските цени на нафтата се намалуваат по ненадејниот пораст на залихите на сурова нафта во САД.

Во Њујорк цената на лесната сурова нафта беше пониска за 56 центи или 0,9 проценти и сега е 61,11 американски долари за барел. Во Лондон цената на суровата нафта „Брент“ од Северното Море падна за 35 центи или 0,5 проценти и се тргува за 65,02 долари за барел.

Во почетокот  на месецот, цените на нафтата растеа. Лани годината беше турбулентна за нафтата.