Биткоинот, најпознатата криптовалута се тргува по цена од 32.193 долари денеска, а во последните 24 часа е забележан раст од 4,2 проценти. Растот доаѓа по изјавата на Илон Маск дека Тесла најверојатно повторно ќе започне да прифаќа биткоин како средство за плаќање, кога ќе изврши длабинска анализа на количината на обновливи извори на енергија што се користат „за ископување“ на таа валута.

Тој предизвика пад на цените на биткоинот во мај, кога рече дека неговата компанија ќе престане да прифаќа криптовалути како средство за плаќање, бидејќи огромни количини на електрична енергија, претежно произведена од фосилни горива, се користат во „рударењето“ на биткоин, потсетува британскиот весник „Гардијан“.

Сепак, коментарите на Маск на вчерашната конференција предизвикаа скок од осум проценти на биткоинот на 32.160 долари.

Ethereum исто така се опорави. Во моментов се тргува по 1.995 американски долари, што е пораст од 6,3 проценти во последните 24 часа.

Останатите криптовалути на пазарот исто така бележат подобри резултати.

Град Скопје во рамки на кандидатурата за Европска престолнина за културата за 2028 година назначува два легални ѕидови за слободно користење од уличните уметници за пишување и цртање графити, сликање мурали, тагови и слично. Тоа се потпорниот ѕид на улица „Војвода Васил Чакаларов“ („Адолф Циборовски“) по „Реплек“ и ѕидовите од двете страни на булеварот „Гоце Делчев“ под поранешна Стоковна куќа „Мост“, денес Универзитет на Југоисточна Европа.

Како што соопшти денеска тимот на Скопје 2028 – Кандидат за Европска престолнина на културата, легалните ѕидови ќе бидат означени со табли со кои се потврдува слободата и безбедноста за нивно користење за креативен израз од страна на уличните уметници.

Легалните ѕидови ќе бидат назначени и слободни за користење на 26 јули 2021 година, на Денот на солидарноста, како сеќавање на катастрофалниот земјотрес во Скопје. По тој повод тимот на Скопје 2028 – Кандидат за Европска престолнина на културата, кој е иницијатор на идејата за назначување на легални ѕидови во Скопје организира и акција на цртање на графити на легалниот ѕид на улица „Војвода Васил Чакаларов“ на тема „Солидарност“. Како што е најавено ќе учествуваат седум домашни улични уметници: Ертунч Сали, Давор Кешќец, Марко Вујисиќ, Драган Китановски – Драж, Дејан Давчевски, Блаже Атанасков и Ермал Криезиу.

Акцијата на цртање графити ќе се реализира викендов, на 24 и 25 јули. Акцијата е организирана во партнерство со Младинскиот културен центар.

Тимот на Скопје 2028 на почетокот на 2021 година на предлог на улични уметници од Градот покрена инцијативата за именување на првиот „Легален ѕид – Legal Wall“ во Скопје. Град Скопје ја прифати иницијативата. Со тоа, како што се наведува, Градот во рамки на кандидатурата за Европска престолнина на културата на уште една начин покажува дека ја поддржува урбаната култура и уличната уметност и овозможува разновиден културен израз на различни локации во градот.

Уличната уметност, пред сѐ, пишувањето/цртањето графити во поголем дел од светот вклучувајќи и кај нас е нелегална, многу градови именуваат и креираат легални ѕидови со што им овозможуваат слободен и безбеден простор за креација и уметничко изразување на уличните уметници.

Легален ѕид/Legal Wall е дефиниран ѕиден простор од поголем размер на одредена локација, кој е одобрен од страна на сопственикот или локална власт/јавната институција за слободно користење за уметничка креација. Како слободен простор за креација легалниот ѕид овозможува на секој заинтересиран уличен уметник да може да создава уметност без временско одредено или законско ограничување. Ова е особено важно за младите улични уметници кои ќе имаат простор да ја развиваат својата креативност и способности за цртање.

Министерството за внатрешни работи набави нови 40 етилометри (познати уште и како дрегери) кои ќе бидат предадени на сообраќајната полиција за санкционирање на возачите што управуваат возила под дејство на алкохол. По неодамнешната набавка на 50 модерни, технички високо-софистицирани радарски уреди, од МВР, информираат дека продолжуваат со опремувањето на сообраќајната полиција со цел уште поголемa безбедност на патиштата.

Токму возачите кои управуваат возило под дејство на алкохол се причинители на голем број тешки сообраќајни незгоди и затоа нивното санкционирање е еден од приоритетите на сообраќајната полиција. Сега сообраќајната полиција има 145 етилометри, за разлика од само осум етилометри во 2017 година, информираат од МВР.

Постојаното вложување во сообраќајната полиција и професионалното работење на полициските службеници придонесуваат за континуирано намалување на бројот на жртви во сообраќајни незгоди. Со новата опрема дополнително ја зголемуваме безбедноста на патиштата, а и во наредниот период продолжуваме со сите потребни набавки за да обезбедиме максимални услови за сообраќајната полиција. Како резултат на посветеноста за создавање безбедни средини за граѓаните, минатата 2020 година е година со најмал број на жртви, а од 2017 година наваму бројот на жртви континуирано се намалува, велат од МВР.   

Епл го одложи планот за враќање на вработените во канцелариите поради наглото зголемување на бројот на заразени со сојот Делта на коронавирусот. Компанијата планираше вработените да доаѓаат на работа најмалку трипати неделно почнувајќи од септември, но сега тој рок е продолжен за најмалку еден месец.

Значителен број вработени се спротивставија на враќањето на работа. Илјадници потпишаа писмо до извршниот директор Тим Кук и остатокот од управата на компанијата, во кое се наведува дека треба да прифатат пофлексибилна политика за работа од дома.

Менаџментот одговори дека „личната соработка е од суштинско значење за нашата култура и нашата иднина“. „Епл“ беше суштински против концептот на работа-од-дома пред пандемијата, така што дозволувањето на вработените да работат два дена во неделата од дома се смета за голема промена.

Другите големи технолошки компании од Силиконската долина, како што е Фејсбук, најавија дека половина од своите вработени ќе ги пренасочат кон постојана работа од дома. Гугл соопшти дека очекува 20 проценти од вработените да работат од дома кога канцелариите ќе се отворат повторно.

„Епл“ е една од првите компании што реагираа на новиот бран на ширење  на Ковид-19 и ги сменија плановите за враќање во канцелариите. Вработените во Епл ќе бидат известени најмалку еден месец пред да се вратат во деловните простории.