Со вчерашното изгласување на измените на Законот за минимална плата станува реалност барањето на синдикатите за зголемување на минималната плата на 18.000 денари. Со тоа, околу 80.000 работници во земјава со мартовската исплата во април ќе земат повисока минимална плата за околу 2.800 денари.

Законските измени добија поддршка од сите пратеници, иако во текот на тридневната дебата можеа да се слушнат различни мислења од пратениците од партиите на власт и од опозиција. За првите, законското решение е добро бидејќи со него се подобрува животниот стандард на околу 80.000 работници кои земаат мининална плата, додека ставот на опозицијата е дека ќе дојде до урамниловка ако се зголеми само минималната, а не и останатите плати.

Изгласувањето на законското решение го поздрави премиерот Димитар Ковачевски, кој преку Фејсбук оцени дека зголемувањето на минималната плата ќе придонесе кон подобрување на животниот стандард на граѓаните.

Минималната плата од 18.000 денари која ја ветивме, денес е реалност! За многу кратко време, од 4,25 минимални плати кои беа потребни во 2016 да се покрие потрошувачката кошничка, денес стигнавме до момент кога со 2 минимални плати се покрива целата потрошувачка кошничка. Нам како Влада ни е најважно сега, во услови на криза, секој денар од буџетот ефикасно да го користиме и да го пренасочиме кон граѓаните и стопанството, напиша Ковачевски, најавувајќи зголемување  и на пензиите.

Од Министерството за труд и социјална политика очекуваат дека зголемувањето на минималната плата позитивно ќе влијае и на останатите плати, а со променетата методологија на усогласување на минималната плата ќе се гарантира одржливост и континуиран раст на минималната плата. Усогласувањето ќе се врши според следните критериуми – 50 проценти од годишниот раст на просечната плата и 50 проценти од трошоците за живот, а висината на минималната плата нема да смее да биде пониска од 57 проценти од просечната плата.

Очекуваме ова законско решение да влијае позитивно и на останатите плати во другите индустрии, со што се подобрува стандардот на граѓаните. Од 2017 година имаме континуирано зголемување на минималната плата и тоа  во  2017/2018 година на 12.000 ден, во  2019 година на 12.507 ден, во 2020 на 14.500 денари и во 2021 на 15.194 ден. Сега со новиот предлог, од март 2022 година, минималната плата ќе изнесува 18.000 денари за разлика од 2016 кога минималната плата изнесуваше 10.080 денари. Со оглед на тоа дека методологијата е промената очекуваме и зголемување на продуктивноста на трудот, изјави вчера министерката за труд и социјална политика Јованка Тренчевска.

Зголемувањето на останатите плати, според Тренчевска, не е предмет на овој закон, туку на матичните закони и на колективните договори.

И од СДСМ го оценија како позитивен чекор зголемувањето на минималната плата во услови на економска и енергетска криза. Пратеничката Санела Шкријељ во изјава за медиумите го поздрави потегот на опозицијата да даде поддршка на законското решение и ги повика да гласаат и за Предлог-измените на Законот за наставници и стручни соработници.

Грижата за работниците е наш врвен приоритет бидејќи тие се наша најголема вредност. Затоа за само четири и пол години успеавме двојно да ја зголемиме минималната плата, којашто во 2017 година изнесуваше само 8.800 денари. Растот на минималната плата ќе доведе до раст и на останатите плати во сите сектори. Го поздравувам потегот на пратениците од опозицијата кои го поддржаа ова законско решение и ги повикувам да ги поддржат и Предлог-измените во Законот за наставници и стручни соработници кој овозможува повисока плата за уште 27.000 наши граѓани, изјави Шкријељ.

Зголемувањето на минималецот ќе биде потпомогнато од страна на државата која ќе одвои пари од Буџетот за да ја покрие разликата во придонесите до крајот на годината.

Објавени се првите снимки од нападот на Русија врз Украина. Нападот започна во 4 часот по средноевропско време. Во неколку града на Украина се слушаат сирени за предупредување од воздушен напад.

Иако 9 недели по ред цената на горивата во Македонија расте, по последните светски случувања и наредниот понеделник можеме да очекуваме ново поскапување на цената.

Имено, цената на суровата нафта на светско ниво и натаму останува висока по еска лацијата на тензиите меѓу Украина, Русија и западот.

По вчерашниот рекорд кога барел нафта на берзата во Лондон се продаваше по над 99 долари, денеска цената и натаму останува на ниво над 96 долари за барел што гарантира дека и во иднина ќе имаме исклучително високи цени на горивата во Македонија.

Евентуална ескалација на тензиите дополнително може да ја зголеми побарувачката на нафта што дополнително ќе ја зголеми нејзината цена на берзите.

За нас во Македонија тоа значи дополнителен раст на малопродажните цени. Доколку продолжи овој тренд на забрзан раст на цената на суровата нафта на светските берзи и во текот на неделата, не се исклучува можноста од понеделник да имаме уште едно значително зголемување на малопродажните цени.

Ние и во моментов плаќаме рекордно висока цена. Литар бензин чини 84 денари за 98 октанскиот и 82 денари за 95 октанското гориво, Дизелот во моментов чини 74 денари за еден литар.

Србија официјално ја доби првата компанија која работи четири дена во неделата. По пробниот период кој траеше цели пет месеци, компанијата ManpowerGroup, која работи и во Србија, вчера официјално објави дека во иднина вработените ќе работат четири дена во неделата. Петти ден ќе има смени, каде вработените ќе се менуваат.

Во меѓувреме, неколку компании ја тестираа оваа можност. Резултатите покажале дека вработените станале попродуктивни бидејќи поминувале помалку време на социјалните мрежи и со неработни активности. Еден анкетиран вработен од Нов Зеланд рече дека престанал да ги гледа пораките што му ги праќала неговата сопруга бидејќи бил многу фокусиран на работата. Многу компании си го поставија прашањето: „Зошто да не платите за резултатите од работата, наместо за деновите поминати во канцеларија?“

Во текстот се потсетува дека работниците на Јавор од Ивањица, компанија која во времето на СФРЈ беше позната како еден од најголемите извозници во областа на текстилната индустрија, основана во 1948 година, добро се сеќаваат на намаленото работно време. Во осумдесетите имаа 3.700 луѓе на платен список, правеа повеќе од 10 милиони парчиња годишно… И не само тоа, го направија тоа што денес го прават многу големи светски компании – го скратија работното време и покажаа дека тоа е добар избор.

Епидемиите и искуствата ширум светот покажаа дека пократките работни недели и четиридневното работно време не значат дека работата би страдала. Напротив, практиката и истражувањата на големите компании го покажаа спротивното.

Имаме најнови примери, каде што старски и геронтолошки центри го скратиле работното време за два часа, а ја зголемиле продуктивноста за 38 отсто“, велат од компанијата.