Регулаторната комисија за енергетика и водни услуги на Република Северна Македонија на 14.03.2022 година, одржа седница на која донесе Одлуката за утврдување на највисоки малопродажни цени на нафтените деривати и горива за транспорт, со која одлучи малопродажните цени на нафтените деривати да не се променуваат, односно да останат на исто ниво како што се утврдени согласно одлуката за утврдување на највисоки малопродажни цени на нафтените деривати и горива за транспорт на Регулаторната комисија за енергетика и водни услуги на Република Северна Македонија од 12.03.2022 година. 

Согласно денешната Одлука, малопродажната цена на ЕУРОСУПЕР БС-95 изнесува 86,50 ден/лит, малопродажната цена на ЕУРОСУПЕР БС-98 изнесува 88,50 ден/лит, малопродажната цена на ЕУРОДИЗЕЛ (Д-Е V) изнесува 88,00 ден/лит, малопродажната цена на Екстра лесното масло за домаќинство (ЕЛ-1) изнесува 83,50 ден/лит, додека малопродажната цена на Мазутот М-1 НС изнесува 60,914 ден/кг. 

Највисоките малопродажни цени на нафтените деривати и горива за транспорт, изнесуваат: 

• Моторен бензин - ЕУРОСУПЕР БС - 95 - 86,50 (денари/литар) 
• Моторен бензин - ЕУРОСУПЕР БС – 98 - 88,50 (денари/литар) 
• Дизел гориво - ЕУРОДИЗЕЛ БС (Д-Е V) - 88,00 (денари/литар) 
• Масло за горење - Екстра лесно 1 (ЕЛ-1) - 83,50 (денари/литар) 
• Мазут М-1 НС - 60,914 (денари/килограм)

За патување во Грција, од утре, повеќе нема да биде потребно да се пополнува формуларот ПЛФ (Passenger Locator Form), што веќе 20 месеци беше задолжителен и неопходен документ за влез во земјата, а важеше и за државјаните на Северна Македонија кои патуваат кај јужниот сосед, јави дописничката на МИА од Атина.

Министерот за туризам на Грција, Василис Кикиљас пред десет дена соопшти дека „по препорака од Комисијата на епидемиолози од Министерството за здравство, од 15 март 2022 година се укинува пополнувањето на формуларот Passenger Location Form (ПЛФ) за сите посетители од сите земји за влез во Грција“ и додаде дека укинувањето го олеснува процесот за влез на туристи и акцентот ќе биде на контролата на сертификатите.

Измените се вклучени и во последната министерска одлука „Предуслови за влез во земјата за ограничување на ширењето на Ковид-19“ што е во сила до 21 март 2022 година, а како што веќе објави МИА минатата седмица, предвидува дека „сите патници во Грција, без разлика на националноста и начинот на влез во земјата до 14 март 2022 година, го пополнуваат електронскиот формулар ПЛФ“.

Задолжителното пополнување на ПЛФ формуларот, Грција го воведе на 1 јули 2020 година кога по првиот бран на Ковид-19 и првиот карантин постепено почна да ги отвора границите за странски државјани.

Министерството за внатрешни работи во текот на вчерашниот ден (13.03.2022) продолжи со засилените акциски контроли во областа на сообраќајот.

На територија на град Скопје изречени се вкупно 185 мерки, меѓу кои за возење повеќе од дозволената брзина 81 санкција, 32 мерки за возење под дејство на ал* охол, 13 санкции за возење без возачка дозвола.

Изречени се пет мерки за користење мобилен телефон, седум санкции за возач почетник, пет мерки за нерегистрирани возила..

Засилените акциски контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта.

Веќе трета недела цените на прехранбените намирници се во фокусот на секој еден Македонец.

Речиси секојдневно има зголемување на цените, па и самите продавачки и менаџментот на маркетите велат дека се уморни од секојдневно менување на налепниците со цени на рафтовите.

По поевтинувањето на горивата, се очекува од денеска да има корекции и на цените на основните прехранбени производи, односно нивно поефтинување.

За цените на лебот, брашното, шеќерот, сончогледовото масло, кравјото млеко, месото, оризот, јајцата стапката на ДДВ е намалена од 5 на 0 проценти и оваа мерка ќе трае до крајот на мај.

Паралелно со ова, замрзнати се маржите за некои производи, и укинати царинските давачки за увозот на основните прехранбени продукти.

Маслото за јадење, дефинитивно, претрпе најмногу ценовни шокови. Во моментов, различни маркети и продавници го нудат по различни цени. Најевтиниот е од 87 денари, а најскапиот 102 денари за литар.

Шеќерот речиси секаде е со цена од 40 денари за 800 или 900 грама, односно едно пакетче.

Табла јајца веќе чини над 200 денари, однсоно од 215 денари па нагоре.

Килограм кашкавал, зависно од производителот и маркетот, чини околу 350 денари, чајната за килограм е над 400 денари во повеќето маркети.

Килограм банани во маркетите се продаваат по цена од над 70 денари, а се почесто не може да се најдат јаболка поевтини од 20 денари. Компирот за килограм чини околу 20 денари.