Платите во БМВ се меѓу најдобрите во германската и европската автомобилска индустрија. На баварскиот производител на автомобили му оди добро, а тоа се одразува и на финансиските резултати. Поради ова, тие великодушно ќе ги наградат своите работници.

Порталот Kununu ги проценува приходите на работниците во индустријата, а таму може да се најдат и бројките за БМВ.

Луѓето кои работат на работи за одржување во BMW добиваат просечна годишна бруто плата од 36.400 евра, додека квалификуваните работници во производството може да сметаат на 42.100 евра.

Логистичарите имаат плата од 52.000 евра.

Од друга страна, програмерите и инженерите заработуваат меѓу 77.200 и 88.900 евра бруто годишно. За лидерот на тимот бруто годишната плата е околу 114.500 евра, а практикантите се платени 17.300 евра бруто. За менаџерски плати нема да зборуваме бидејќи тие се изразени во милиони евра.

Но, тоа не е се, ако се земе предвид дека покрај синдикалните надоместоци и годишните одмори, вработените во БМВ земаат околу 13,7 плати годишно. И тоа не е се, бидејќи БМВ ја дели добивката со работниците во еднократна сума од 9.175 до 15.700 евра – податоците се за 2019 година.

Профилот на Инстаграм наречен „Landgeist Maps“ неодамна сподели мапа на која е прикажано колку шеќер консумираат Европејците.

Луксембург со 10,8 килограми шеќер и Кипар со 17,6 килограми шеќер по лице se најмалите конзументи.

Првото место го зазеде Белгија, каде просечниот внес на шеќер е 48,3 килограми по човек. Второто место го зазеде Полска со 45,7 килограми, а на трето е Малта со 43,8 килограми шеќер по лице.

Кога станува збор за земјите од регионот, Албанија е со 18,6 килограми, Словенија со 19,4 килограми, Црна Гора со 21,2 килограми и Србија со 22,4 килограми шеќер по лице.

Хрватска е нешто повеќе од 10 килограми над другите земји во регионот со 33,8 килограми, но рекордот во регионот убедливо го држи Македонија со 36,7 килограми шеќер по лице.

Грејната сезона завршува утре, а со тоа и кризната состојба во енергетиката што ја прогласи Владата во септември лани, со цел да се обезбеди непречено снабдување со електрична енергија во текот на целиот зимски период, како и топлинска енергија на жителите на Скопје кои се приклучени на системот за централно греење.

Во текот на целата грејна сезона имаше струја и парно, рестрикции немаше. Зголеменото домашно производство, донесе стабилна цена. Планот даде резултат. Тоа е најдобар демант за критичарите и квази експертите кои во текот на последниот квартал минатата година предвидуваа најцрни сценарија и го вознемируваа народот, истакна премиерот Димитар Ковачевски при неодамнешната посета на РЕК Битола, заедно со министерот за економија Крешник Бектеши и генералниот директор на АД ЕСМ Васко Стефанов.

Енергетската транспарентност, додаде, ја издигнавме највисоко на листата на приоритети и цели шест месеци во текот на грејната сезона секој ден објавуваме информации за состојбата со производството на електрична енергија.

Покажавме како транспарентно и успешно се справуваме со економско–енергетската криза од светски размери. Токму поради стручноста и напорот кој го дадоа сите вработени во ЕСМ имавме непречено снабдување со топлинска и електрична енергија во текот на целата зимска сезона. Во услови на најголема светска енергетска криза, кога дел од земјите го пролонгираа стартот на грејната сезона, нашите  граѓани имаа сигурно и стабилно снабдување со струја и парно кое стартуваше во точно пропишаниот рок и беше без проблеми во текот на цела грејна сезона, рече Ковачевски.

Тој нагласи дека со зголеменото домашно производство, ЕСМ во целост, односно 100 проценти, обезбеди струја за домаќинствата и за малите потрошувачи. Паралелно го презеде греењето со топлинска енергија во главниот град Скопје и таму обезбеди непречено снабдување со топлинска енергија.

Министерот за економија Крешник Бектеши, информира дека Министерството за економија како надлежна институцијата за енергетскиот сектор во државата од почетокот на грејната сезона работеше секојдневно со сите надлежни институции од енергетскиот сектор и носеше мерки се со цел успешно пребродување на енергетската криза.

Можам да кажам дека сите заедно успеавме во тоа. Сега пред нас стојат нови предизвици, а тоа е пред се енергетската трансформација и зголемување на енергетската независност. Во наредниот период ќе продолжиме да работиме засилено и посветено во зголемување на производството на електрична енергија од обновливи извори што ќе донесе поголема независност. Фокус исто така ќе биде и подготовка на следната грејна сезона која сум сигурен дека со новиот менаџмент на ЕСМ успешно ќе ја поминеме, посочи Бектеши.

Од Стопанската комора неделава порачаа дека државата покрај поддршката на домаќинствата и компаниите кои се на регулираниот пазар треба да ги поддржи и компаниите кои се на слободниот пазар на електрична енергија, а не да ги остава сами да се снаоѓаат и да си ги решаваат проблемите.

Според Комората, доколку државата до јуни не им даде конкретни гаранции, големите компании треба сами да се здружат и да набават електрична енергија. Како што посочи претседателот на Стопанската комора, Бранко Азески, доколку лани не и верувале на Владата и компаниите сами се здружеле и набавеле електрична енергија таа ќе ги чинела по 118 евра за мегават час просечно. Тој побара конечно да има одговорност од Владата и најави дека една од можностите што им стои на располагање на компаниите, е по судски пат да бараат надомест за штетите што ги претрпеле од неисполнетите владини ветувања.

Одговорност, како што кажа, треба да се побара и од Регулаторната комисија за енергетика и водни услуги (РКЕ) заради издавањето на лиценци за трговија со електрична енергија на фирмите со само 5.000 евра гаранција и дозволувањето трговците со струја да немаат никаква одговорност ако ги прекинат договорите за снабдување што ги имаат потпишано со компаниите. Од Комората укажуваат дека РКЕ треба да ја намали и маржата што се наплаќа за пренос на електрична енергија, бидејќи таа е пресметана во моментот кога цената на струјата беше од 400 до 500 евра за мегават час и не соодветствува на сегашните стабилизирани цени на берзата кои се движат од 120 до 150 евра за мегават час.

Резултатите од  спроведената анкета на Стопанската комора за загубите кои ги претрпеа компаниите членки во енергетската криза во 2022 година покажуваат дека никаква државна поддршка не добиле 100-те компании од различни сектори кои беа на слободниот пазар на електрична енергија во кои има преку 100.000 вработени и кои генерираат најголем дел од БДП на државата.

Просечната цена на електричната енергија која ја плаќале била повисока од 180 евра за мегават час и тоа придонело да им се зголемат трошоците. Во компаниите во земјоделскиот и прехранбениот сектор за 100 отсто биле зголемени трошоците во делот на електричната енергија кои влегуваат во финалната цена на производот, во хемискиот сектор до 250 отсто, во металуршкиот сектор до 470 отсто и во угостителството и туризмот од 80 до 340 отсто. Единствено во текстилната и кожарската индустрија влијанието било до 25 отсто.

Најголем дел од компаниите  укажуваат дека ќе им се намали обемот на работа, ако и годинава има криза која ќе им ги зголеми трошоците за електрична енергија, а дел дури и не би можеле да функционираат воопшто. Укажуваат и на намалување на конкурентноста во споредба со регионот, бидејќи во регионот има субвенционирана цена на електричната енергија за стопанството. 

Пописот покажа дека во Србија има помалку од 15.000 Македонци. 

Според резултатите од пописот кој се одржа лани, во Србија живеат 6.647.003 лица, од кои како Македонци по националност се декларирале 14.767 лица, јави дописникот на МИА од Белград.

Во 2011 година како Македонци се изјасниле 22.755 лица, на пописот во 2002 имало 25.847 македонци, а во 1991 имало 45.068 Македонци. Тоа покажува дека континуирано се намалува број на граѓани во Србија кои се изјаснуваат како припадници на македонското малцинство.

Неофицијалните податоци со кои располагаат Македонците во Србија, како што јави дописникот на МИА, и неофицијалните податоци од ОБСЕ говорат дека во Србија живеат околу 150.000 до 200.000 Македонци.

Македонците во Србија ги имаат сите права, дури и поголеми права во однос на Македонците од остатите републики на Балканот, со истакнување на остварените резултати во образованието, културата, информирањето и службената употреба на јазикот и писмото и дека македонците можат слободно да се изјаснат за својата национална припадност, затоа загрижува опаѓањето на нивниот број, или безмалку половина за десет години, ако во 2011 имало 22.755 Македонци, а во 2022 само 14.767, пренесува дописникот на МИА.

Треба да се посочи дека во Србија на последниот попис за првпат како Горанци (област Гора на Шар Планина-Косово) се изјасниле 7.700 лица.