Инфлацијата, растот на платите и другите макро и микроекономски влијанија ја направија Црна Гора најскапата дестинација за живеење во регионот, ако ги исклучиме Хрватска и Словенија, кои се членки на Европската унија, покажуваат податоците на веб-страницата Numbeo.

Според овие податоци, индексот на потрошувачките цени во Црна Гора е 42,4, што е највисок пресметан индекс за Балканскиот Полуостров. Индексот ги вклучува трошоците за домување, облека, храна, превоз, интернет, комунални услуги, намирници, како и бројни други параметри. Како параметар беа земени трошоците за живот во Њујорк и односот на цените на истите производи и услуги.

Индексот на трошоците на животот е теоретски индекс на цени што ги мери релативните трошоци на живот низ времето или регионите. Тоа е индекс што ги мери разликите во цените на стоките и услугите и овозможува замена со други ставки бидејќи цените варираат.

Така, на пример, Црна Гора има индекс од 15,7 кога станува збор за цените на изнајмување станови, додека индексот на киријата комбиниран со останатите животни трошоци е 29,7, што ја рангира меѓу поскапите дестинации во јужноевропскиот регион. Тоа значи дека цените за изнајмување станови во Црна Гора се за 70 отсто пониски отколку во Њујорк, но според индексот на кирии е дури и пред Хрватска и Грција. Меѓутоа, просечната месечна плата во Њујорк е околу 4.500 евра, додека во Црна Гора е околу 800 евра, пренесува Дан.

Минималната потрошувачка кошничка за четиричлено семејство во септември годинава изнесува нешто повеќе од 847 евра, покажуваат податоците на Монстат, што претставува зголемување од дури 201 евро во однос на истиот период во 2020 година, како што претходно пишуваше „Дан“.

Кога минималната плата беше 250 евра, минималната кошничка беше 646 евра, додека по зголемувањето на минималната плата на 450 евра, минималната кошничка исто така се зголеми за 200 евра, поточно за 201 година, на 847 евра.

Според последните податоци, расходите за храна и безалкохолни пијалоци изнесуваат 397,5 евра, а за непрехранбени производи и услуги 449,9 евра. Потрошувачката кошничка се зголемила за 23 евра само од јули кога изнесувала 824 евра.

Според информациите од Државниот завод за статистика, просечната месечна исплатена нето-плата по вработен во септември годинава изнесувала 37 876 денари.

Тоа претставува зголемување од 16.4 отсто во однос на истиот месец 2022 година.

Анализите на ДЗС покажуваат дека ваквото зголемување се должи, пред сѐ, на растот на просечната месечна исплатена нето-плата по вработен во секторите: Снабдување со електрична енергија, гас, пареа и климатизација (25.8 %), Јавна управа и одбрана; задолжително социјално осигурување (24.8 %), Снабдување со вода; отстранување на отпадни води, управување со отпад и дејности за санација на околината (20.5 %).

Просечната месечна исплатена бруто-плата во септември 2023 година изнесувала 56.896 денари.

Ќе се прошируваат тарифниот блок 3 и 4 за струјата како одговор на владата на забелешката на ММФ дека земјава многу пари троши на субвенционирање на електричната енергија, ова го потврди вчера и вицепремиерот за економски прашања Фатмир Битиќи.

Тој меѓутоа рече дека тие што трошат помалку ќе плаќаат и помалку.

Ќе го прошириме тарифниот блок 3, најверојатно и тарифниот блок 4 со што опфатот да биде поголем, за тие што трошат повеќе. А за најранлиците категории на граѓани, за луѓето кои што штедат вистински електрична енергија да останат ист тарифен модел и цената на електричната енергија или евентуалната промена на цената да не падне на товар на тие што се во првиот или вториот блок – изјави Битиќи.

Во тарифниот блок 3 спаѓаат потрошувачите кои трошат од 631 до 1.050 киловатчасови струја, а во тарифниот блок 4 сите кои трошат повеќе од 1.050 KWh.

Не е познато како ќе изгледаат границите на тарифниот блок 3 и дали во него ќе влезат домаќинствата кои трошат под 631 киловат струја месечно.

Регулатроната комисија за енергетика допрва ќе треба да прави пресметки како би требало да изгледа новиот распоред на потрошувачката на струја и која распон би требало да го имаат блокот 3 и 4.

Минатата година субвенционирањето на електричната енергија за домаќинствата и за малите потрошувачи беше до 80%, а тоа според Битиќи, е неиздржливо за една мала земја како нашата.

Годинава субвенционирањето е намалено на некаде 60%.

Општина Центар распишува Јавен повик за доделување еднократна финансиска поддршка наменета за пензионери со пензии до 20.122 денари, кои се жители на Општината. Јавниот повик е отворен од денеска 21.11.2023 година, заклучно до 06.12.2023 година.

Градоначалникот на Општина Центар Горан Герасимовски појасни дека висината на еднократната финансиска поддршка изнесува вкупно 3.500.000 денари односно по 2.000,00 денари од корисник, а исплатата ќе биде по принципот „прв дојден – прв услужен“, се до исцрпување на средствата во Буџетот на Општина Центар, Скопје за 2023 година.

Во пресрет на претстојните новогодишни празници и семејни слави верувам дека овие средства ќе им помогнат на нашите повозрасни сограѓани да ја збогатат трпезата или да ги олеснат семејните трошоци. Општина Центар втора година по ред обезбедува поддршка за повозрасните граѓани во општината, пензионерите. Искрено верувам дека оваа помош ќе биде добредојдена. Затоа ги повикувам граѓаните кои ги исполнуваат условите да аплицираат на Јавниот повик и станат корисници на мерката, изјави Герасимовски.

За остварување на правото на користење на финансиската поддршка, заинтересираните граѓани треба да бидат корисници на старосна, семејна или инвалидска пензија не повисока од 20.122,00 денари и да бидат жители на Општина Центар-Скопје. Граѓаните кои ги исполнуваат овие услови ќе треба да поднесат: Барање за доделување на финансиска поддршка на пензионери во социјален ризик, копија од лична карта, копија од трансакциска сметка и доказ од последна примена пензија (потврда/чек издаден од Банката во која се прима пензијата, за последните 2 месеци, односно за септември или октомври 2023 година). Барањето за доделување на финансиска поддршка за пензионери во социјален ризик е достапно во просториите на Општина Центар-Скопје (архива на Општина Центар-Скопје, барака 6) и на веб страната на Општина Центар-Скопје https://www.centar.gov.mk/?p=19130. Потребната документација може да се достави секој работен ден во барака 6 (Сала на Совет на Општина Центар – Скопје), од 09.00 до 14.00 часот.

Комисијата за селекција, формирана од Градоначалникот на Општина Центар-Скопје, ќе ги разгледува и ќе одлучува по поднесените барања за остварување на правото за финансиска поддршка. На пензионерите што аплицирале и ги исполниле потребните критериуми, Општина Центар-Скопје ќе изготви Решенија за доделување на финансиска поддршка. Исплатата на предвидениот износ за финансиска поддршка (во висина од 2.000,00 денари), ќе ја изврши Секторот за финансиски прашања на Општина Центар-Скопје, директно на трансакциските сметки кои барателите ги доставиле како потребна документација. Исплатата ќе биде реализирана до крајот на 2023 година.

Општина Центар ги повикува сите пензионери, кои се корисници на старосна, семејна или инвалидска пензија и ги исполнуваат потребните критериуми, да аплицираат и да го остварат правото за доделување на финансиска поддршка.