Министерот за економија, Крешник Бектеши, денеска изјави дека до петок, односно до крајот на неделата, ќе бидат исплатени парите од јавниот повик за субвенционирање на купувањето, односно вградувањето на уредите за погон на плин.

Средства на сметките ќе им легнат на над 750 граѓани, според податоците од секторот кој му биле доставени на министерот.

Рокот за јавниот повик е веќе завршен, а до крајот на неделава, односно до петок на сите што аплицирале и ги исполниле условите ќе им бидат исплатени парите од субвенциите, рече денеска Бектеши.

Јавниот повик беше објавен на 1 ноември. Станува збор за субвенции до 50 отсто од фактурата, но не повеќе од 18.000 денари. За оваа цел министерството имаше буџет од 15 милиони денари. Возилото не смее да е постаро, односно произведено пред 2005 година, а повикот важу за само еден член, односно автомобил од едно семејство.

Истовремено Бектеши рече дека се подготвува и моделот за субвенционирана набавка на возило со ЕУРО 5 или повисок еколошки стандард.

– Ќе одиме со уредба во која најглавно е што ќе го имаме предвид еколошкиот аспект, додаде тој.

Владата ќе донесе одлука за репрограмирање на долговите и отпис на каматите на задожените граѓани. Според информации на Фактор решението во посебна одлука ќе биде усвоено на владината седница која ќе се одржи во петок или на следната која ќе биде последна за годинава, а која е можно да биде и викендов. Нема детали кои долгови ќе се бришат, до колкава сума и кон кои доверители, но најверојатно ќе бидат опфатени повеќето јавни претпријатија.

Во меѓувеме за утре е најавен протест на извршителите во земјава кои негодуваат на новиот предлог тарифник според кои најголемата награда која може да ја земе еден извршител, ќе биде максимум 300 евра наместо, како што е уредено досега, 1000 евра.

Со протестот извршителите сакаат да го кажат својот став дека ако се опстои во намерата да стапи на сила овој тарифник, тие нема да работат повеќе и ќе настане хаос во наплатата. Бараат да се слушне и нивниот глас во носењето на регулативата.

Од Министерството за правда кои се предлагачи на тарифникот за Фактор велат дека Комората на извршители е автономна во одлучувањето и дека тие ги разгледуваат сите опции. Тврдат дека во моментов се прават анализи и дека ќе се оди на законски измени, кои ќе се очекуваат на последната владина седница. Потврдуваат дека ќе има одлука – решение за каматите односно отпис на камати на граѓаните.

Од Здружението на граѓани кои протестираат против работата на извршителите велат дека треба да се стави крај на самоволието на извршителите. Се мислеле да има контрапротест но најверојатно нема да се одржи за да не се прават проблеми.

- Со новиот тарфиник им се намалува најгоелмата награда која можат да ја земат, па се лутат. Најверојатно Владата конечно се освести, го слушнаа нашиот глас. Проектот им заврши, доста го плачкаа народот, ама си собраа бостанот па може да си одат, да си се вратат во судовите, вели Марјан Ристески. 

Голем јаз има помеѓу највисоката и најниската плата во државата. 

Ова го поткрепуваат статистичките податоци. Според Државниот завод за статистика во компјутерското програмирање, консултантските и сродните дејности во октомври е исплатена просечна плата од 60.899 денари. Просечната нето плата по вработен во државата во октомври е 25.726 денари, односно компјутерџиите за еден месец заработиле скоро 2,4 просечни плати.

Најмала просечна плата е регистрирана во секторот заштитата и истражување, односно вработените во овој сектор добивале само 13.707 денари.

Од владејачката СДСМ се пофалија дека за 2.5 години минималната плата се зголемила за 5.500 денари. 

Рокот за исплата на регресот за годишен одмор истекува на 31 декември. Работодавците од приватниот сектор имаат уште една недела да ја исполнат задолжителната законска обврска за исплата на регрес за годишен одмор или популарно наречен К-15.

Износот на К-15 се утврдува врз основа на просечната нето, односно бруто плата исплатена на ниво на држава во последните три месеци.

Доколку се’ уште не сте добиле регрес за годишен одмор треба да знаете дека неговиот износ е поголем во однос на износот што вработените го добиле пред 20-ти декември откако ДЗС ги објави новите податоци за движењето на платите во Македонија.

Според најновите податоци, износот на К-15 треба да се движи од 10.171 до 15.112 денари.

К-15 не им следува на сите вработени

Исплата на К-15 не треба да очекувате доколку е исполнет еден од следните услови:

1. Вработени сте во некоја јавна институција, односно во јавниот сектор. Вработените во јавниот сектор се уште немаат право на К-15 бидејќи тоа не е пропишано со нивниот Колективен договор.

2. Имате стаж во компанија кој не е подолг од шест месеци со што автоматски не ви следува исплата на регрес за годишен одмор бидејќи К-15 им се исплаќа само на вработени кои се пријавени кај ист работодавач најмалку шест месеци.

3. Доколку работите кај еден ист работодавач подолг временски период од шест месеци, но имате прекин во работен стаж.