Од први јануари ќе се применуваат измените на Законот за данок на личен доход со кои се става во мирување примената на прогресивниот данок на личен доход. Следните 36 месеци доходот од работа, доходот од самостојна дејност, доходот од авторски и сродни права како и доходот од продажба на сопствени земјоделски производи ќе се оданочува со стапка од 10 проценти. Во мирување ќе биде ставена и стапката од 15 проценти, што значи дека стапка од 10 проценти ќе се применува и за оданочување на доходот од права на индустриска сопственост, закуп и подзакуп, капитал, капиталните добивки, од осигурување и другиот доход, соопшти Министерството за финансии.

Министерката за финансии Нина Ангеловска, кога ги најави измените на Законот за данок на личен доход, рече дека не станува збор за негово укинување и дека став на Владата е дека прогресивен данок може да ја подобри распределбата на доходот во  системот и да даде добри општествени ефекти што би резултирало со поправедно и поразвиено општество. 

„За да се постигне ваков ефект, прогресивниот данок треба да има оптимален дизајн во чиј центар е домаќинството, да биде донесен во консултативен процес со сите засегнати страни, да постојат ефикасни механизми за елиминирање на сивата економија и да има зајакната доверба во институциите како и да се воспостават ефикасни и ефективни процеси со искористување на потенцијалот од технологијата, со цел намалување на административниот товар, кој ќе биде распореден на сите“, рече тогаш Ангеловска.   

Oдлуката за ставање во мирување на прогресивниот данок е донесена врз основа на анализа на големи податоци, кои овозможуваат да се извлече тенденцијата и да се донесе заклучок врз основа на електронско пријавување и наплата на данокот на личен доход. Според анализата, приходите кои можеле да се приберат од прогресивното оданочување и повисоката стапка на личен доход се помали за 51,2 отсто во однос на потенцијалот. 

Вкупно изгубените приходи што можеле да се приберат, а не се прибрале, се оценети на 6,5 милиони евра, тоа се средства кои буџетот можел да ги има, но не ги добил поради промената во однесувањето на даночните обврзници, покажува анализата.

Од први јануари се зголемува и прагот за ДДВ обврзник од еден милион денари на два милиони денари. Со измените во Законот за данок на додадена вредност се менува и периодот во кој обврзникот е должен да остане во системот на ДДВ и истиот се скратува на три години од тековните пет години. Со тоа сите правни и физички лица кои во 2019 година не го надминале новопоставениот праг, ќе може доброволно да се дерегистрираат од системот. 

Од први јануари се одложува примената на две даночни решенија. Нема да стартува оданочувањето на капиталните добивки од хартии од вредност. Новото решение што ќе стапи на сила од 2023 година ги вклучува во оданочување и уделите од инвестициските фондови, кои со досегашното решение беа изоставени. Се воведуваат 2 даночни стапки, зависно од периодот на поседување на хартиите од вредност и уделите, односно, стапка од 15 проценти за сите оние кои шпекулативно тргуваат на пазарите на капитал, односно истите ги држат кај себе до една година и стапка од 10 проценти со која ќе биде даночен доходот од капиталните добивки од хартии од вредност и удели издадени од инвестициски фонд, кои инвеститорите ги чуваат од 1 до 10 години. Ослободени од овој данок ќе бидат долгорочните инвеститори кои хартиите од вредност и уделите издадени од инвестициски фонд ги чуваат повеќе од 10 години од денот на продажбата, но и хартиите од вредност стекнати од иницијална јавна понуда, со цел охрабрување на компаниите за првично отварање кон јавноста преку издавање на акции по пат на иницијална јавна понуда. Спроведувањето на одредбите од Законот нема да биде оставено на товар на граѓаните и данокот автоматски ќе биде пресметуван и уплатуван во Буџетот. 

Од први јануари 2020 нема да стартува и примената на данок на камати од депозити. Одлуката за одложување се базира на потребата од нормативно доуредување за известување од страна на банките и штедилниците, како и поедноставување на администрирањето на данокот. Дополнително, со одложениот старт на оданочувањето на капиталните добивки и каматите на заштедите, од 2023 ќе се изедначи третманот на заштедите со долгорочното инвестирањето на граѓаните на пазарот на капитал, велат од рфесорот на министерката Ангеловска.

Со амбициозен бизнис план Алкалоид влегува во новата 2020 година. Според проекциите, компанијата предвидува раст на продажбите од над 190 милиони евра, што претставува раст од 7 отсто во однос на очекуваните за 2019 година. Растот на инвестициите е позициониран за 14 отсто, додека согласно бизнис планот компанијата планира раст на добивката од десет проценти.

Во планот стои дека планирано е 86 отсто од консолидираните продажби да реализира ПЦ Фармација, а 14 отсто ПЦ Хемија Козметика Билкарство. 

Ако се анализира по пазари, се очекува 35 проценти од консолидираните продажби да бидат остварени на домашен пазар додека 65 отсто од извоз. Во планираниот биланс на успех проектиран е раст од 10 отсто на консолидираната добивка пред финансиски трошоци, даноци и амортизација (EBITDA). 

Консолидиранaтa нето добивка е предвидена со раст од најмалку 7 отсто во однос на очекуваната за 2019 година. 

„Бизнис планот за 2020 година предвидува инвестирање на околу 14 отсто од консолидираните приходи од продажби во материјални и нематеријални средства. Во 2019 година започнаа инвестициите во новите производни одделенија што ќе се простираат на површина од 7.000 квадратни метри и кои како и останатите, ќе се изведуваат во согласност со строгите барања, стои во бизнис планот на Алкалоид.

Компанијата предвидува зголемување на капацитетите за производство за најмалку 50отсто, односно од сегашниот капацитет од речиси 2 милијарди таблети и капсули годишно, на повеќе од 3 милијарди парчиња цврсти фармацевтски форми. Вкупниот износ на инвестицијата е проценет на 11 милиони евра. 

„Комплетирањето на оваа инвестиција, планирано за првата половина од 2020 година, ќе создаде услови за реализирање на околу 200 нови вработувања во сегментот Фармација. Во 2020 година предвидена е и финализација на проектот за гасификација на локалитетот Алкалоид - Ѓорче Петров со цел подобрување на енергетската ефикасност и намалување на штетни емисии во воздухот. Природниот гас претставува исклучиво вредна енергетска и хемиска суровина која поседува значајна технолошка, економска и еколошка вредност во однос на останатите горива, истиот е идеално гориво кое лесно се меша со воздухот, има исклучителна брзина на согорување без дим, ги согорува цврстите остатоци и не ја загадува околината. Проектот е вреден над 1 милион евра. Согласно со растот на деловните операции на пазарот во САД, планот предвидува зголемување на капацитетите во сегментот Билкарство преку набавка на нова машина за пакување на филтер чаеви во вредност од 1,3 милиони евра, пишува во бизнис планот.

Се планираат во 2020 година околу 100 нови вработувања во Алкалоид АД Скопје како и 50-тина вработувања во друштвата во странство. Пазарната капитализација на компанијата во 2019 надмина 16 милијарди денари.

Како приоритети за 2020 година се наведуваат инвестициите во производствените капацитети и во современите технологии, во човечките ресурси и во заедницата воопшто. 

„Прв приоритет и понатаму останува регионот, втор приоритет се земјите од ЕУ, САД, Русија и земјите од ЗНД, а трет приоритет се останатите пазари, планира Алкалоид во бизнис планот за 2020 година.

44.940 работници во реалниот сектор добиле зголемена плата, односно за нив била искористена мерката за субвенционирање на придонесите.

Ова субвенционирање на придонесите за здравствено и пензиско осигурување за зголемена плата од 600 до 6.000 денари го оцени како позитивно министерката за труд и социјална банка Мила Царовска по еден месец од воведувањето на мерката.

- Просечното зголемување на платите кај овие овие 44.940 била 4.100 денари. Во реалниот сектор има 490 илјади работници, така што овде зборуваме за зголемување на платите кај 9 отсто од нив, рече Царовска.

Таа очекува дека до февруари бројката на работници кај кои е зголемена платата да се искачи на 20 проценти од вкупно вработените во бизнис-секторот.

422 работодавачи во УЈП за октомври пријавиле зголемување на платите за своите работници за 6.580 куца користеле субвенции од 6,474 милиони денари. 7.613 работодавачи искористиле субвенции од 77,5 милиони денари за месец ноември за 44.940 работници. 

Директорката на Управата за јавни приходи, Сања Лукаревска, рече дека одобрувањето на субвенциите било мошне едноставно за работодавачите преку поднесувањето на МПИ-образецот.

- За месец октомври просечната плата во земјата е зголемена на 25.726 нето, а за месец ноември со оваа субвенција ќе има видно покачување, додаде Царовска.

По повод претстојните новогодишни празници, утре отворените паркиралишта со кои стопанисува ЈП „Паркинзи на Општина Центар“ (ПОЦ) ќе работат до 15 часот, затворените паркиралишта и катната гаража до 18 часот, а шалтерите за издавање на договори во Дирекцијата на претпријатието ќе работат до 16 часот. Сите паркиралишта со кои стопанисува претпријатието на 1 јануари ќе бидат бесплатни за сите граѓани.

Како што соопшти ПОЦ, редовната наплата за паркирање на паркиралиштата и издавање на договори во Дирекцијата на ЈП ПОЦ ќе продолжи на 2 јануари (четврток) со вообичаено работно време.

За време на божиќните празници на 6 јануари (понеделник) и 7 јануари (вторник) сите паркиралишта со кои стопанисува ЈП ПОЦ ќе бидат бесплатни за граѓаните.

Редовната наплата за паркирање на паркиралиштата и издавање на договори во Дирекцијата на ЈП ПОЦ ќе продолжи на 8 јануари (среда) со вообичаено работно време.

Тимот на ЈП „Паркинзи на Општина Центар“ на сите граѓани им посакува убави новогодишни и божиќни празници, се додава во соопштението.