Документ поврзан со Ковид-19, пополнет PLF формулар и задолжително тестирање при пристигнувањето во земјата за оние кои од Северна Македонија патуваат во Грција со негативен тест, се актуелните мерките за влез кај јужниот сосед, што се продолжени за уште една седмица со одлука на грчката Влада, јави дописничката на МИА од Атина.

Новата министерска одлука „Предуслови за влез во земјата за да се ограничи ширењето на Ковид-19“ е веќе објавена во Службен весник на Грција, стапи во сила во 6 часот утрово, а е со важност до 10 септември 2021 година.

Продолжени се и воведените промени минатата седмица, што се однесуваат на патниците кои немаат сертификат за вакцинација со поминати 14 дена од имунизацијата или потврда за прележан Ковид-19, односно патуваат со негативен ПЦР или рапид тест, а во Грција влегуваат од одредени земји, меѓу кои и Северна Македонија, која беше додадена на листата.

Овие патници, задолжително ќе бидат тестирани при пристигнувањето, а негативниот резултат е предуслов за влез во Грција.

Сите посетители „независно од државјанството и начинот на влез во земјата“, исто како и во изминатите речиси четири месеци имаат четири опции, во однос на документите што треба да ги приложат и се поврзани со Ковид-19, а МИА детално ги пренесува сите предуслови за патување кај јужниот сосед.

Првата опција е целосно да ја имаат завршено вакцинацијата 14 дена пред патувањето и да достават сертификат за вакцинација на грчки, англиски, француски, германски, италијански, шпански или руски јазик, издаден од јавна установа и да ги содржи податоците: име и презиме, како што се заведени во пасошот, вид на вакцина и бројот на дози, заедно со датуми кога се примени.

Втората можност е со негативен тест: или ПЦР направен во последните 72 часа пред патувањето или антигенски (брз) тест направен 48 часа претходно. И за двете опции, тестирањето треба да биде во одобрена од државата на потекло приватна или државна лабораторија, а потврдата да биде на грчки, англиски, француски, германски, италијански, шпански или руски јазик, а исто како и за сертификатот, треба да ги содржи и името и презимето на лицето кое патува, онака како што се заведени во пасошот.

Во однос на оваа категорија се воведените промени од минатата седмица, односно задолжителното тестирање при влезот.

Поконкретно, за „сите патници, независно од државјанството и начинот на влез, кои во Грција пристигнуваат од државите: Египет, Албанија, Аргентина, Северна Македонија, Бугарија, Бразил, Грузија, Куба,  Обединетите Арапски Емирати, Индија, Кина, Либија, Мароко, Пакистан, Русија и Турција“, кои патуваат со негативен тест, предуслов за влез е да добијат  негативен резултат од задолжителното тестирање со ПЦР и рапид тест на влезните точки во Грција.

Задолжителното тестирање не важи за патниците кои имаат валиден сертификат за вакцинација со поминати 14 дена од втората доза или потврда за прележана болест во изминатите шест месеци.

Третата опција се однесува на оние кои прележале Ковид-19 во изминатите шест месеци и може да достават потврда за прележана болест по лабораториско тестирање со ПЦР или антигенски (брз) тест, а сертификатот се издава 30 дена по првиот позитивен тест и неговата важност е до 180 дена подоцна.

Документот треба да биде од јавна установа или од лаборатории одобрени од државата на потекло, да ги содржи податоците од пасошот и повторно, може да биде на неколку јазици, односно на грчки, англиски, француски, германски, италијански, шпански или руски јазик.

Европскиот дигитален Ковид сертификат е четвртата алтернативна можност за влез во Грција.

Конкретните обврски за патување важат за лица со наполнети 12 години.

Дополнително, за патување, задолжителен е и електронскиот формулар PLF (Passenger Locator Form), кој треба да биде пополнет преку интернет страницата https://travel.gov.gr, по што се добива потврда со QR-код и се смета за неопходен документ за влез во Грција.

Сите посетители на Грција, независно од земјата на потекло, може да бидат подложени на тестирања, а селекцијата се врши согласно здравствениот алгоритам и со помош на кодот од PLF формуларот.

Тестирањето, веќе е задолжително за патниците кои доаѓаат од Северна Македонија, а патуваат со негативен тест.

Оние кои ќе бидат тестирани, ќе треба да ги почекаат резултатите.

Ако резултатот е позитивен, предвиден е десетдневен карантин во соодветен простор укажан од надлежните органи, а во случај да се работи за лица кои 14 дена претходно ја завршиле вакцинацијата, тогаш задолжителната изолација е седум дена.

На последниот ден од карантинот, оние кои биле позитивни, без разлика дали се вакцинирани или не, потребно е да направат ПЦР тест.

Лицата што патуваат заедно со потврдените случаи, односно блиските контакти на оние кои се позитивни на Ковид-19, имаат можност да се вратат во нивната земја истиот или следниот ден, под услов да добијат два негативни резултати од два теста (ПЦР или рапид) направени во текот на 24 часа и да носат маска Н95 додека патуваат.

Во случај лицата кои патуваат заедно со потврдените случаи да останат во земјата, а не се вакцинирани или немаат прележано Ковид-19 во изминатите шест месеци, тогаш треба да бидат во 14-дневна изолација по последниот контакт со позитивното лице, без да се тестираат или седум дена карантин и на седмиот ден да направат ПЦР тест.

Доколку блиските контакти се вакцинирани или прележале Ковид-19 во изминатите шест месеци, тогаш не е потребен карантин, но задолжително се тестираат со ПЦР тест при влезот во земјата.

За прекршување на законските мерки и обврски, предвидени се парични казни од 500 до 5.000 евра.

За влез во Грција, отворени се сите копнени гранични премини кои работат 24 часа, со исклучок на Мерѕани кон Албанија, што е со работно време од 8 до 20 часот, а од Турција преку Кастањес и Кипи дневно, дозволен е влез на 1.500 лица.

Од Северна Македонија кај јужниот сосед може да се патува преку Евзони (Богородица), преку Ники (Меџитлија) и Дојран, без никакви ограничувања во однос на бројот на посетители или во однос на работното време.

Во одлуката, како што пренесува МИА, посочено е дека туристите, за време на нивниот престој во Грција, мора да ги почитуваат мерките што важат и за Грците.  

Филијалата на Мекдоналдс во Орегон нема доволно работна сила и ги повикува 14 и 15-годишниците да аплицираат за работа во ресторанот.

Франшизата „Бидл Роуд“ во Медфорд пред две недели поставиле транспарент пред својата продавница со кој ги повикуваат помладите граѓани да аплицираат за работа.

Филијалите што продаваат брза храна, како и другите ресторани во Соединетите држави, веќе некое време имаат проблеми со наоѓање вработени, и покрај олеснувањето на рестриктивните мерки, пишува Би -Би -Си.

Хедер Кенеди, шеф на ресторанот Медфорд, за Business Insider изјавила дека немало таков недостаток на работна сила во 40-годишната историја на нејзиното семејство, кое ја води франшизата Мекдоналдс.

Првично се обиделе да привлечат повеќе работници со зголемување на минималната плата во ресторанот на 15 долари на час, но тоа не предизвикало премногу интерес. Но, кога побарала работници на возраст под 16 години, веднаш добила повеќе од 25 нови апликации.

Мекдоналдс одбил да го коментира потегот на франшизата.

Американските закони за работни односи се разликуваат од држава до држава, но во Орегон е дозволено да вработува луѓе на возраст од 14 години и постари во не-физички опасни места, како што се работа во ресторани, се додека работното време им дозволува да го продолжат своето образование.

Во САД постои голем недостиг на работна сила поради стравувањата од инфекција со ковид. Покрај тоа, училиштата се уште се затворени и многу родители остануваат дома да се грижат за своите деца. Особено е тешко да се најдат работници за помалку квалификуваните и пониско платени работни места.

Министерството за здравство објави табела и информира дека за време на четвртиот ковид бран, во период од јули до крајот на август, епидемиолошките анализи покажуваат дека најголема смртност кај пациенти со ковид имало во градовите каде имало најнизок процент на вакцинирано население. 

Во градовите како Гевгелија, Кавадарци, Ресен и Берово кадешто опфатот со вакцинација е помеѓу 54-61%, бројот на починати е најмал, односно има по еден починат. Тетово, го пречека бранот само со 19%   вакцинирани граѓани во јули, таму имаше најголем притисок врз болниците, најголем број хоспитализирани пациенти и најголем број смртни случаи, 106 до крај на август. Последните недели драстично е зголемен интересот за вакцинација во Тетово и изнесува скоро 37%. Слична е состојбата и во Гостивар каде исто така имаше мал опфат на вакцинирано население, во овој град опфатот на вакцинирани полнолетни граѓани до крај на август е под 30%, а бројот на починати со ковид е 73, пренесуваат од министерството.

Од таму велат дека ова е доказ колку се значајни и ефикасни вакцините  и дека же се живее без ограничувања и без рестрикции само со целокупна имунизација на населението.

На кејот на реката Вардар во Општина Карпош вчера беше отворен Адреналинскиот парк, финансиран од ЕУ и локалната самоуправа. Овој Спортско рекреативен парк е прв од ваков вид во главниот град.

Зоната е на површина од 10.000 метри квадратни има адреналински дел, игралиште за фудбал и одбојка на песок со трибини, реконструиран скејт парк, сквер, детско игралиште, а поставена е и соодветна урбана опрема. Во склоп на паркот и неговата околина засадени се нови 80 високоизраснати дрвја, нова тревна површина, а поставен е и систем за неговор наводнување и одржување.

На отворањето на Адреналинскиот парк, единствен во градот Скопје, присуствуваа премиерот Зоран Заев, заменик претседателот на Владата задолжен за економски прашања, координација на економските ресори и инвестиции, Фатмир Битиќи и градоначалниците на главниот град Петре Шилегов и на Карпош Стефан Богоев.

Адреналинскиот парк е изграден со грант од ЕУ преку Светска банка во рамки на проектот за „Локална и регионална конкуретност, а финансиско учество има и Општината Карпош.

Премиерот Зоран Заев изрази, како што кажа, воодушевување од овој Спортско – адреналискиот парк. За Адреналинскиот парк, кажа дека, станува збор за модерна атракција која може да конкурира на вакците паркови во другите земји.

-Овој современ простор ќе даде одлична можност за релаксирање на љубителите на авантуризмот и адреналинските спортски доживување, рече Заев посочувајќи дека ќе можат да го користат не само Скопјани туку и граѓани од целата земјата и туристи.

Владата, како што рече премиерот, останува на определбата за поддршка на локалната самоуправа и да поддржува политики кои се однесуваат на создавање подобри услови на граѓаните.

Заменик претседателот на Владата задолжен за економски прашања, координација на економските ресори и инвестиции, Фатмир Битиќи информираше дека Андреланскиот парк е реализиран во рамки на проектот за „Локална и регионална конкуретност“ кој е во вкупна вредност од 21 милиони евра, а е поддржан од Делегацијата на ЕУ и Владата на РСМ. Ова е еден од 57-те подпроекти што се одвиваа изминатите години во десет туристички дестинации низ државата, а со кои директно се влијае на атрактивноста на нашата држава како туристичка дестинација и за домашните и за странските туристи.

-За реализација на овој потпроект беше одобрен буџет од 907 илјади евра, од кои прекку проектот се обезбедени 85 отсто од средствата или 770 илјади евра, додека Општина Карпош партиципира со околу 140.000 евра, истакна Битиќи.

Првиот човек на градот Петре Шилегов,  изрази задоволство што главниот град добива вакво место кое ќе биде не само за Скопјани, туку и за туристите што ќе го посетат.

-Продолжуваме посветено да работиме на унапредување на животната средина на нашите сограѓани и што ќе значи истовремено и повеќе зеленило и повеќе содржини за спорт и рекреакција што се неоподни услови за водењето на здрав живот во вакци услови, рече Шилегов.

Градоначалникот на Општина Карпош Богоев информираше дека за Адреналинскиот парк задолжен е субјектот Адвенчр сајд и нивните претставници се дел од Спортско – качувачката федерација, а поминаа и посебна обука со цел правилно функционирање и поголема безбедност за сите посетители на Адреналинскиот парк. За другите делови од паркот, како одбојкарското и фудбалското игралиште ќе бидат задолжени од општинското оделение за спорт.

-Сите заинтересирани граѓани ќе можат да закажуваат термини преку мејл и телефон што дополнително ќе бидат објавени. Реализацијата на овој проект е потврда за нашата заложба за зелен Карпош, рече Богоев.