Само тројца студенти апсолвенти и 36 професори кои им предавале се најдоа на таблото на Факултетот за ветеринарна медицина.

Ова значи дека годинава на Факултетот за Ветеринарна медицина при Универзитетот „Св. Кирил и Методиј“ во Скопје дипломирале само тројца студенти.

Фотографијата од таблото стана популарна на социјалните мрежи, а од Факултеот за Канал 5 изјавија дека  фотографијата не ја отсликува реалната состојба со студентите. Велат дека тројцата апсолвенти се студентите кои во генерацијата од 30-ина најдобро напредувале и се нашле на таблото од завршната студиска година.

Преку проектот „Мој ДДВ“ кај граѓаните за четири години се вратени 6,6 милијарди денари или 107,5 милиони евра, информира директорката на УЈП, Сања Лукаревска.

Таа со медиумите сподели податоци по повод четиригодишното постоење на проектот мој ДДВ, нагласувајќи дека е поддржан од луѓе на различна возраст. 

Според нивни податоци, регистрирани корисници на мој ДДВ низ годините имало различен број. Па само во 2019 имало 213.055 корисници, во 2020 нови 149.753, следната 2021 нововклучени се 74.668 корисници, додека пак, лани новопријавени се 70.314 корисници. Оваа година, досега се вклучени 31.129 лица, со што вкупно овој период има 538.919 корисници. 

Лукаревска сподели и податоци за исплата на мој ДДВ по години. Така во  третото и четвртото тримесечје во 2019 година биле исплатени 155.344.780 денари, во 2020 година 1.270.015.383 денари, во 2021 година 1.787.906.568 денари, во 2022 година 2.164.342.418 денари и прво тримесечје 2023 година 1.235.036.033  денари.

Според структура на корисници на Мој ДДВ, 293 348 се жени и 245.571 маж. До 18 години се 2.596 лица со вкупно над два милиона скенирани сметки, од 19 до 30 години се 99.749 со над 156 милиони скенирани сметки, од 31 до 50 години се 243.202 корисници со вкупно над 508 милиони скенирани сметки, од 51 до 61 година се 93.673 корисници со вкупно над 203 милиони скенирани сметки и над 61 година се 78.278 корисници со над 150 милиони скенирани сметки. 

Топ 10 градови со граѓани со најмногу скенирани фискални сметки се Штип, Валандово, Кичево, Битола, Велес, Скопје, Прилеп, Кочани, Неготино и Гевгелија. 

Најмногу скенирани сметки се од ланци маркети и бензински пумпи. 

Лукаревска нагласи дека проектот позитивно се одразува и врз подигнување на даночниот морал, досега биле поднесени 5.632 претставки за неиздадени фискални сметки. Со тоа, посочи, се намалува нелојалната конкуренција и сивата економија. Таа повторно се осврна и на начинот на кој може да се стане дел од овој проект и да се скенираат сметки. Засега, најбројни се корисниците што скенираат сметки, од 31 до 50 години.

Фото: МИА

Секторот за внатрешни работи Скопје во текот на вчерашниот ден (01.07.2023) продолжи со контролите во областа на сообраќајот. На територија на град Скопје изречени се вкупно 302 мерки, меѓу кои за возење повеќе од дозволената брзина 128 санкции, 26 мерки за возење без возачка дозвола, 11 санкции за управување возило под дејство на алкохол, шест мерки за прекршоци што ги чинат возачи на моторцикли.

Изречени се четири санкции за минување на затворен сигнал - црвено светло, 11 санкции за користење мобилен телефон при управување возило, 13 мерки за некористење сигурносен појас...

Сообраќајните контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта.

Од денеска, 1 јули 2023 година, целосно се забранува продавањето на пластични ќеси и оксобиоразградливи ќеси, односно тоа се оние кеси кои во маркет се продаваат за 15 денари. Дозволени ќе бидат само биоразградливи ќеси.

Оваа одлука следи откако беше усвоен новиот Закон за управување со пакување и отпад од пакување. Според истиот ќесите од 2 поскапеа на 15 денари пред година и пол.

Претставници на производителите на последната средба со министерката за животна средина, Каја Шукова, кажаа дека материјалот за изработка на биоразградливите кеси е тешко достапен за македонскиот пазар и дека се соочуваат со потешкотии во континуираното призводство на овие кеси. Предложија да се ревидира законската регулатива и да се направат поголеми напори за да се обезбедат еднакви услови на пазарот, односно да се спречи нелојалната конкуренција со нудење на бесплатни пластични кеси. Побараа и намалување на надоместокот за биоразградливите пластични кеси, кои би се продавале после 1 јули 2023 година.

Голем дел од фабриките ставија клуч на врата по владината одлука една ќеса да се продава по 15 денари. Според информациите од производител кој беше на средба со министерката, од 32 фирми, дваесетина веќе затвориле.

Сепак за овошјето и зеленчукот и во маркетите и на пазарите се уште се користат пластичните кеси. Податоците на Државниот завод за статистика покажуваат дека лани компаниите во земјава произвеле околу 5.000 тони пластична амбалажа, вреќи и ќеси.

Од Министерството за животна средина тврдат дека употребата на пластичните кеси е за 10 пати намалена, а особено намалување има во маркетите и тоа за околу 85%.

Земјите-членки на ЕУ веќе почнаа да забрануваат употреба на пластика за еднократна употреба, како цевчиња, чепкалки за уши, чинии, чаши и пластичен прибор за јадење за еднократна употреба. Во некои земји пластичните кеси се целосно забранети, во други се даночат, а во трети се наплаќаат. (Крај)

извор: Макфакс фото: архива