Најголемиот аеродром на светот ќе профункционира задутре. 

Во турскиот град, Истанбул во понеделник ќе биде отворен најголемиот аеродром во светот. Тој е трет аеродром во милионскиот град.

Турскиот претседател Реџеп Таип Ердоган в понеделник во Истанбул свечено ќе го отвори аеродромот.  Него го градеа над 30.000 работници. 

Новиот аеродром „Istanbul Yeni Havalimani“ е изграден на европската страна на Истанбул, на 35 километри северно од градот, во округот Арнавуткој. Изградбата почна во јуни 2014 година, а сега е завршена првата од вкупно четири фази на изградба. Во првата фаза аеродромот ќе може да прими 90 милиони патници.

На новиот аеродром ќе биде изграден и најголемиот светски трговски комплекс без царина.

Се очекува до 2030 година аеродромот да можат да го користат 150 милиони патници годишно, кога ќе биде завршена последната фаза. 

Се проценува дека кога ќе биде завршен, аеродромот ќе има 225.000 вработени. Оттука ќе се лета на 350 дестинации ширум светот, во соработка со стотина авиокомпании.

Најфреквентниот аеродром во светот „Хартсфилд Џексон“ во Атланта, САД во 2017 година имал 105 милиони патници. Шесте аеродроми во Лондон даваат услуги на 150 милиони патници годишно.

Изградбата на аеродромот чини 10,5 милијарди евра. Ќе покрива површина од 7 659 хектари што е околу 76 квадратни километри и ќе има шест писти. 

До крајот на годината, вработените во приватниот сектор, ќе добијат регрес за годишен одмор попознат како К-15 во износ од минимални 9.610 денари.

Според податоците за движењето на нето/бруто платата по вработен, К-15 за оваа година ќе се движи од 9.610 денари (40 отсто од износот на просечната нето плата во последните три месеци) до 14.090 денари (40 отсто од износот на просечната бруто плата во последните три месеци). 

Вработените во јавните институции се уште немаат право на него бидејќи истиот не е пропишан со нивниот Колективен договор од 2010 година.

Износот на К-15 зависи од висината на просечната нето и бруто плата по вработен во последните 3 месеци пред датумот на исплата. Минималниот износ треба да изнесува најмалку 40 проценти од висината на просечната нето плата, а максималниот до 40% од висината на просечната бруто плата.

Жените во Европската Унија заработуваат 16,2 отсто помалку пари од мажите.

За својата работа тие се платени до 3 ноември, а потоа до крајот на годината работат бесплатно, објави денеска Европската комисија. 

Таканаречниот Ден на еднакви плати ден е прогласен за да се предупреди на фактот дека жените во ЕУ заработуваат помалку од мажите, дури и кога вршат иста работа на исто работно место.

Се бара европратениците и државите-членки да ја одобрат иницијативата која ја предложи извршниот орган на ЕУ со цел надминување на родовиот јаз во платите, на пример со подобрување на правата на вработените родители.

Податоците објавени денеска покажуваат големи разлики помеѓу мажите и жените на породилно отсуство.

36 проценти од мажите во ЕУ велат дека не сакаат да земат породилно отсуство, а истиот одговор го дале 19 отсто од жените.

Само четворица од десет лани зеле родителско отсуство или планирале тоа да го направат. 

Жените во 27-те земји-членки на ЕУ заработувале просечно 17,5 отсто помалку отколку мажите, и ова е податок објавен во март 2011 година. 

Ноќеска во 3:00 часот завршува летното сметање на времето и почнува зимското, при што со поместување на часовникот за еден час наназад времето во 3:00 часот ќе се смета како 2:00 часот, информира Бирото за метрологија.

Часот што поради поместување на стрелките за еден час наназад се појавува два пати помеѓу 2:00 и 3:00 часот се означува – првиот пат како час 2А, а вториот пат како час 2Б, соопшти Бирото за метрологија.

Одлуката за денот и моментот на завршувањето на летното сметање на времето во 2018 година е објавена во Службен весник на Република Македонија број 52 од 22 март 2018 година.

Стрелките вечерва ќе се поместат и во земјите на Европа, каде што, пак, неодамна е усвоена одлуката да се укине промената на времето, според која, последното поместување на стрелките ќе се случи во октомври следната година. Според предлогот, секоја членка на ЕУ до април 2019 година треба да одлучи дали ќе остане во зимско или летно сметање на времето. Последно задолжително поместување на времето на летно сметање ќе биде на 31 март 2019 година, а членките што сакаат да се вратат на зимското сметање на времето би можело тоа да го направат уште еднаш на 27 октомври 2019 година.

Македонија го следи процесот и по усвојување на предлог-директивата претстои усогласување на националното законодавтво на РМ и определување на начинот на транспонирање на директивата.

Причина за поведување на иницијативата во европските земји за укинување на промената на времето беа негативните последици по човековото здравје, земјоделството и безбедноста во сообраќајот. А спроведената анкета покажа дека 84 проценти, или 4,6 милиони Европејци не сакаат да им се поместуваат стрелките на часовникот.

Промената на времето во Западна Европа е воведена во почетокот на 1970 година со образложение дека со тоа се продолжува денот, се овозможува заштеда во потрошувачката на електрична енергија, се зголемува продуктивноста, го подобрува приспособувањето на луѓето и работниот ден се прави поефикасен.

Преминот од летно во зимско време првпат е забележан во 1916 година во земјите на Северна Европа, а досега е воведен во околу 70 држави, главно на северната хемисфера.

Во Македонија зимското и летното сметање на времето се воведени во 1996 година.