Папата Франциск ќе ја одржи мисата на плоштадот Македонија во Скопје во 11:30 часот на 7 ми мај.

Во литургискиот простор ќе можат да влезат само граѓаните со обезбедена влезница од Католичката црква и документ за лична идентификација и тоа само во периодот од 6 до 9 часот, по што пристапот на плоштадот ќе биде забранет. Ова се само дел од деталите за историската прва посета на Папата во земјава, кои денеска ги соопштија премиерот Зоран Заев, бискупот Киро Стојанов и државниот секретар во МНР Виктор Димовски.

Учесниците на мисата треба да пристигнат во Скопје најдоцна до 6 часот. Потребно е да се пристигне во ова време заради безбедносните прегледи кои ќе се вршат на патиштата, а од 7 часот улиците во централното градско подрачје ќе бидат затворени за сообраќај. Влезот во литургискиот простор ќе биде отворен од 6 часот, а до 9 часот сите пријавени учесници треба да се наоѓаат на плоштадот. Пред влезот во литургискиот простор ќе биде извршен полициски преглед, се вели во соопштението на сајтот за официјалната посета на папата Фрањо на Скопје papa.mk.

Присутните на литургијата не смеат да носат експлозивни направи, запалки, петарди…а забрането е внесување и на храна и пијалоци во метална и стаклена амбалажа, алкохол, чадори и знамиња.

Сите учесници со себе треба да имаат влезница и личен документ лична карта или пасош, здравствена книшка и историја на болеста за хронично болните, како и најпотребните лекови кои ги користат. Потоа вода и освежувачки пијалоци во проѕирна пластична амбалажа, а доколку носат храна таа треба да биде во картонска или хартиена амбалажа. Доколку врне бидејќи нема да биде дозволено внесување на чадори препорачуваме мантил за дожд, стои во правилата објавени од координативното тело.

Кога папата Фрањо ќе минува меѓу присутните не е дозволено фрлање на било какви предмети, дури ни цвеќе, а во текот на литургиската прослава не е дозволено ракоплескање.

169 милиони деца на глобално ниво не се вакцинирани против мали сипаници, тврди УНИЦЕФ. Ова се деца кои не примиле прва доза од вакцината помеѓу 2010 и 2017 година,пишуваат европските медиуми.

Според УНИЦЕФ, погрешните информации, скептицизмот во врска со имунизации и недостиг на пристап до вакцини довеле до ниско ниво на вакцинација на глобално ниво.

Според последниот извештај на УНИЦЕФ,САД се на врвот на листата меѓу високоразвиените земји каде 2 593 000 деца не се вакцинирани против мали сипаници. Во Франција нивниот број е 600 илјади,додека на трето место е Велика Британија со 527 илјади деца без имунизација. Во Нигерија бројката изнесува 4 милиони, а во Индија 2,9 милиони деца се невакцинирани против морбили.

Уште полоша е ситуацијата со втората доза од вакцината, тврди УНИЦЕФ. 20 држави во Африка воопшто ја немаат запишана оваа вакцина во календарот за имунизација, што значи дека повеќе од 17 милиони деца годишно се изложени на ризик од заразување.

Во исто време, податоците на УНИЦЕФ покажуваат дека во САД има рекорден број на заболени лица од мали сипаници. Во 2019 година бројот на пациенти бил највисок досега во однос на последните  25 години. Во Њујорк само за една недела се регистрирани 61 нови случаи, со што бројот на болните од почетокот на годината достигнал 667 лица. Во САД од неодамна вакцината против мали сипаници е задолжителна. Лекарите очекуваат бројот на пациенти да продолжат да растат. Малите сипаници се многу заразна болест која лесно се шири. Симптомите се јавуваат во рок од 12 дена.

За да бидат целосно заштитени, децата треба да добијат две дози од вакцината МРП. Првата доза од вакцината се прима по редовниот календар за имунизација кога детето има наполнето 13 месеци, втората доза од вакцината се прима кога детето ќе наполни 6 години.

Меѓутоа, во нашата земја поради прогласувањето на епидемија од морбили, се препорачува родителите да ги вакцинираат децата на шест месеци за да бидат заштитени.

Ви се случило ли некогаш да ја гледате фискалната сметка и да се чудите зошто повторно потрошивте толку многу пари во супермаркет? Има е ден трик кој ќе ви помогне да пазарите поразумно.

Станува збор за нешто лесно - кога ќе ја наполните количката и одите кон касата, застанете за момент, погледнете ги внимателно производите и вратете меѓу три и пет нешта кои не ви се толку потребни, советуваат експерти од оваа тематика за CNBC.

Така ќе заштедите помеѓу 5-10 долари.

Кога пазариме за подолг временски период и особено ако немаме список, е лесно во количката да ни се најдат и производи кои не ни требаат , а едноставно не искушиле во тој момент. Затоа и паузата пред касата е многу ефективна - дава време да размислиме повторно за нештата.

Ако се навикнете да го купувате само тоа што ви е потребно, брзо ќе почувствувате позитивен ефект за вашиот буџет.

Непочитување на мерките за безбедност при работа од работодавачите, но и од работниците, е најчеста причина за повреда на работното место. Лани во земјава се регистрирале околу 1.800 повреди при работа. Инспекторите за труд извршиле над 12.600 надзори. Од нив скоро половината се спроведени по претходна пријава.

Станува збор за тоа дека одредени пропусти се прават и од страна на снабдување од работодавачите кон работниците со опрема од една страна, а од друга страна и неупотребата од страна на работниците на опремата што им е дадена. Што значи дека сите треба да ја подигнат својата свест дека самата употреба на опремата и практикувањето на мерките значи заштита на себе, на целокупната средина затоа што не секогаш себе може да се повредите, туку некогаш повредувате некој друг кој што е невин во моментот. Значи, подигнувањето на јавната свест за имплементација и свеста на ртаботниците и работодавачите е клучна, вели Мила Царовска, министерка за труд и социјална политика.

Најчести повреди на работното место се регистрирани во градежништвото и рударството. Експертите велат дека закони има, но имплементација и надзорот потфрлаат.

Оние кои што се со висок ризик сектори се градежништвото, рударството, земјоделството, преработувачката индустрија, каде се најголем број од повредите при работа, што укажува дека токму таму се најбројни неправилностите. А, секако, и дистрибуцијата на работна сила и влезот на работниците таму каде што се, таму се најчесто неправилностите. Но, секако зависи од условите на работа и преземените мерки за превенција, вели Јованка Караџинска Бислимовска, претседателка на Националниот совет за безбедност и здравје при работа.

Освен поинтензивни инспекциски контроли на терен со цел поголема безбедност на работниците, Царовска најави интервенција во законската регулатива.