Министерот Чулев информира дека ситуацијата со патните исправи ќе се стабилизира и се очекува порано од 24 март да пристигне првата пратка со патни исправи.

– Имаме најави за 7 до 10 дена да пристигне првата пратка со патни исправи и во тој дел состојбата со патните исправи ќе се релаксира, изјави Чулев.

На подрачјето на СВР-Битола има подобрување во процентот на откриени кривични дела освен во делот на опожарени возила кои се на територијата на ОВР-Прилеп и кои не се резултат на организирана група, е информацијата што ја добил министерот за внатрешни работи Наќе Чулев од СВР Битола, каде во рамки на работната посета беше брифиран за состојбите со криминалитетот и процентот на откриени кривични.

– Дадов насоки за преземање поинтензивни активности на терен, а со цел превенција и спречување на овој вид кривични дела, изјави министерот Чулев.

На средбата во СВР Битола се разговарало и за подготовките околу претстојните парламентарни избори, за што се дадени насоки за преземање широк спектар мерки за спречување на изборни нерегуларности на подрачјето на СВР-Битола. Посебен акцент, нагласи Чулев, бил ставен на поткупот на социјално ранливи категории граѓани, ромската популација, агитација на ден на избори или групно гласање, а се со цел да има фер и демократски изборен процес.

Реемитувањето на сите домашни и странски ТВ канали ќе биде прекинато на 2 март, вечерта на полноќ, соопштија денес од Здружението на информатичко-комуникациските технологии, кое ги обединува сите оператори. Единствено ќе може да се гледаат каналите на јавниот сервис: МТВ1, МТВ2 и Собранискиот канал.

Од Здружението на ИКТ наведуваат дека операторите по средбите со државниот врв се согласиле да го одложат датумот за прекин за 2 март 2020 година на полноќ, за да остават простор за изнаоѓање законско решение во интерес на граѓаните.

Во соопштението до медиумите тие повторуваат дека одлуката за прекин на реемитувањето е последица на последните измени на Законот за аудио и аудиовизуелни и медиумски услуги (ЗААВМУ), што Собранието ги донесе на 16 февруари.

„Операторите се принудени да го прекинат реемитувањето на програмските содржини за да избегнат прекршување на Законот поради активности кои не се под нивно влијание“, се вели во соопштението.

Операторите имаат поднесено и Иницијатива до Уставниот суд за поништување на спорните одредби во законот како неуставни и побараа донесување на времена мерка со која ќе се одложи примената на усвоените законски измени.

Во изминатите неколку денови Здружението на ИКТ ги информираше Претседателот на државата, претседателот на Собранието, претседателот на Владата, ресорните министри во Владата, АЕК, АВМУ, дипломатскиот кор, Делегацијата на ЕУ во земјава, Европската комисија, странските и домашните радиодифузери и домашната и меѓународната јавност, а беа одржани и средби во Владата и Собранието, со цел да се изнајде решение за ваквата ситуација, согласно регулативата, се вели во соопштението.

Во него се додава дека операторите се заинтересирани и подготвени, како и до сега, да го вложат целиот свој капацитет и знаење, во изнаоѓање на прифатливо решение во најкраток рок, со што би се избегнале натамошни штети за целата јавност.

„Заклучокот за прекин на реемитувањето на телевизиските канали ќе биде на сила сѐ додека надлежните институции не изнајдат прифатливо решение со кое ќе се стават вон правна сила спорните законски одредби кои го оневозможуваат нормалното работење на целата индустрија.

Како резултат на неспроведливоста на Законот, а со цел корисниците на ТВ услугите да не бидат оштетени, операторите нема да наплатуваат за ТВ услуги за периодот додека трае прекинот, се вели во соопштението од Здружението на информатичко-комуникациските технологии.

Добивањето отказ од работното место никогаш не е пријатно искуство, но новиот трансферен систем во Шведска ветува многу повеќе отколку само враќање во стабилна положба.

Една од најстресните нешта што може да ви се случат е добивањето отказ. Ако некогаш ви се случило, го познавате чувството на паника, грижа за кариерата, неплатените сметки и здравственото осигурување.

Но, што ако отказот е најдоброто нешто што ви се случило? Не благодарение на добра среќа, туку на ново создадениот систем кој има за цел да го отклучи вашиот потенцијал и да ви овозможи работа уште подобра од претходната.

Новиот трансферен систем во Шведска е услуга за социјална заштита на национално ниво за работници кои неодамна останале невработени поради технолошки вишок.

Компаниите плаќаат за „совети за безбедност на работното место“, кои обезбедуваат квалификувани тренери кои ги селектираат потенцијалите на вработените и според нив наоѓаат компатибилно работно место на пазарот. Постојат 16 вакви организации и секоја од нив опфаќа различен сектор од економијата и има задача да најде нови работни места за работниците кои го изгубиле работното место од економски причини.

Благодарение на овој систем, Шведска има најдобар процент на ревработување во светот – околу 90% од работниците кои добиле отказ добиле нова работа во рок од една година. Оваа бројка е драстично поголема од Франција и Португалија чиј процент е 30%.

Извор: Hybrid.mk

Европскиот суд за човекови права оцени дека земјава не го заштитила имотот на лицата кои не сакале да ја подмират фиксната сметка за топлинска енергија на исклучените станови од мрежата за централно греење, јави дописникот на МИА.

Тужителите Стрезо Стрезовски, Цане Николовски, Ацо Спасовски, Јосип Јуван, Зоран Костовски, Трајанка Накевска, Енвер Исени и Соња Налбанти – Димоска, кои се државјани на Северна Македонија, со место на живеење во Скопје, се пожалија дека биле должни според националните регулативи да им плаќаат на приватните добавувачи фиксна сума за затоплување на нивните станови, иако тие веќе не биле поврзани со мрежата за греење.

Сите тужители се сопственици на станови во станбени згради кои се поврзани со мрежа за централно греење, управувана од приватни добавувачи. Нивните станови беа исклучени од оваа мрежа или на нивно барање или на барање на поранешните сопственици пред 2012 година, датумот на влегување во сила на регулативата со која се обврзуваат корисниците кои веќе не се поврзани со мрежата да им плаќаат на приватните добавувачи фиксна годишна претплата.

Во 2013 година, Уставниот суд оцени дека одредбата од оваа регулатива е во согласност со Уставот, оценувајќи дека оваа фиксна наплата е цената, која што корисниците кои се исклучени од мрежата мораа да ја платат за топлината што ја примаа индиректно од другите станови во зградите загреани од мрежата.

Домашните судови, се посочува, го потврдија ова толкување и ги отфрлија граѓанските постапки на жалителите со кои тие ја сопреа наплатата на фиксната претплата за која се жалеа. Особено судовите сметаа дека, како индиректни потрошувачи, од апликантите се бараше да го платат фиксниот износ, без оглед на нивните индивидуални околности.

Во 2018 година, Врховниот суд го ограничи обемот на ова толкување со исклучување на плаќање на надоместокот за одредена категорија станови доколку се исполнети одредени услови.

Потпирајќи се на член 1 од Протоколот бр. 1 (заштита на имотот), жалителите тврдеа дека нивната обврска да ја платат спорната такса го нарушила нивното право на сопственост.

Според Судот од Стразбур, во овој случај имало прекршување на членот 1 од Протоколот 1 на Европската конвенција за човекови права. Притоа е одлучено на жалителите да им се исплатат следните суми: по 1.000 евра на Исени и Налбанти-Димоска за нематеријална штета, како и 320 евра на Стрезовски, 2.100 евра за Исени и 360 евра на Налбанти-Димоска за трошоци.