МојДДВ речиси две години успешно се спроведува и дел од парите на граѓаните, со скенирање на фискални сметки, повторно се враќаат кај нив. 

Повеќе од 440 илјади корисници редовно скенираат фискални сметки и учевствуваат во проектот на УЈП „МојДДВ“. До сега, според пресметките имаме вратено околу четири милијарди денари кај граѓаните и ќе продолжиме и во иднина, изјави директорката на УЈП, Сања Лукаревска.

Сакам да напоменам дека имаме законски рок од 60 дена по завршување на секое тромесечје да извршиме исплата на дел од ДДВ-то, кое граѓаните го имаат скенирано преку фискалните сметки, дополни Лукаревска.

Во декември лани, вработените во воздухопловен транспорт земале нето плати од 118.949 денари, објави Државниот завод за статистика. 

Во  секторот компјутерско програмирање, консултантски и сродни дејности нето платите изнесувале во просек 79.180 деанри, а информации и комуникации земале нето плати од 59.019 денари. 

Просечната месечна исплатена нето-плата по вработен, во декември 2021 година, изнесувала 29.943 денари.

Зголемувањето се должи, пред сѐ, на зголемувањето на просечната месечна исплатена нето-плата по вработен во секторите: Транспорт и складирање (13.1 %), Градежништво (12.6 %) и Трговија на големо и трговија на мало; поправка на моторни возила и мотоцикли (12.1 %).

Зголемување на просечната месечна исплатена нето-плата по вработен, во однос на претходниот месец, е забележано во секторите: Дејности во врска со недвижен имот (10.4 %), Финансиски дејности и дејности на осигурување (9.1 %) и Градежништво (7.6 %).

Владата на Република Македонија на денешната 16-та седница ја донесе Одлуката за посебни услови за трговијата на одделни стоки со која се замрзнуваат цените на дополнителни продукти како што се овошјето, зеленчукот и пченицата и се определува највисоката трговска маржа за да се елиминираат можностите за раст на цените по други основи.

Со оваа одлука се определува највисоката трговска маржа како посебен услов во трговијата со следните производи: леб, шеќер, сол, брашно – тип 400, сурово сончогледово масло и сончогледово масло за јадење; трајно млеко со масленост од 2,8%, 3,2% и 3,5%; свежо месо и сувомеснати производи, сирење и урда, ориз, јајца, тестенини, пченица, овошје и зеленчук.

На трговските друштва и трговците поединци кои учествуваат во трговскиот ланец на наведените стоки се утврдува трговска маржа до 5% на продажната цена пресметана во трговијата на големо, односно во вкупен износ до 10% на продажната цена пресметана во трговијата на мало. Кај трговците на големо, трговската маржа до 5% се однесува за сите учесници кои учествуваат во трговскиот ланец во трговијата на големо, информираат од Владата.

Кај трговците на мало во вкупниот износ на трговската маржа до 10% се вклучени рабатот и надоместоците кои трговецот на мало ги наплаќа од трговецот на големо и тоа за рекламирање и за изложување на стоките на рафтови односно полици (примарни и секундарни позиции).

Оваа одлука ќе се применува од 1 март 2022 година до 31 мај 2022 година, заради потребата да се ограничи растот на цените во следните три месеци, односно трговската маржа да нема значајно влијание во растот на цените по престанувањето на важењето на одлуката за определување на највисоки цени на одделни производи во трговијата на големо и трговијата на мало, порачуваат од Владата.

Голем број занаетчии алармираат дека поради неработната недела значително им се намалуваат можностите за остварување профит, поради што стравуваат од целосно затворање на своите дуќани. Некои од занаетчиите истакнуваат дека во согласност со законот, за голем дел од професиите нема никаква можност да работат во недела, ниту оние занаетчии што сами се сопственици и сами работат во својот дуќан, односно нема можност самиот газда да се пријави и да работи во недела.

Во согласност со законското решение и измената на Законот за работни односи, дозволено им е само на четири занаетчиски дејности да работат, и тоа производство на леб и слатки во свежа состојба (пекарници и слаткарници), фотографски дејности, печатење и издавање весници (печатници). За сите други дејности е забрането да работат во недела. Со тоа што на занаетчиските дејности како што се: пекари, слаткари, фотографи и печатари, не им се дозволува продажба на нивните производи туку само производство, што доведува до уште поголем револт. Тие се прашуваат зошто да произведуваат производ што не може истиот ден да го пласираат на пазарот, особено прехранбените производи што не траат повеќе од еден ден, како бурек, бели печива, слатки.

Од Занаетчиската комора посочуваат дека изминативе две години откако е почната кризата занаетчиите се соочиле со огромни загуби, поради што некои од нив биле принудени и да одјавуваат работници поради недостиг од финансии да ги исплатат. Оттаму додаваат дека со воведувањето на законското решение за недела неработен ден им се забранува на занаетчиите да работат во недела, што претставува уште еден голем проблем за нив, но и дополнително влијае кон опасноста од затворање на занаетчиските бизниси.Поради ваквите состојби, инволвираните потенцираат дека со овој закон се ставаат во нерамноправна позиција занаетчиите што работат за себе, кои немаат вработено работници, додека е овозможено да работат истите занаети ако се сместени во некои од затворените трговски центри во главниот град, каде што дуќаните може да се отворени и во недела.