Во 2024 година кај нас како и во минатите години, граѓаните онлајн најмногу купувале облека, вклучително и спортска облека, чевли или додатоци како чанти и накит, соопшти Асоцијацијата за е - трговија на Македонија која ги анализираше податоците објавени од Државниот завод за статистика за користење информатичко-комуникациски технологии во домаќинствата и од поединците во 2024 година, според кои се забележува пораст на направените онлајн купувања/нарачки за 10 процентни поени.

Дури 63,5% од македонските интернет корисници нарачале/купиле стоки или услуги преку интернет во последните 12 месеци наспроти 53,5% во истиот период минатата година.

Како што објави АЕТСМ, 90,2% од домаќинствата имале интернет пристап наспроти 88% во истиот период минатата година, додека 91,2% од Македонците на возраст од 15 до 74 години користеле интернет наспроти 85,3% во истиот период минатата година (Државен завод за статистика, 2024).

При тоа, 92,2% од мажите користеле интернет наспроти 90,2% од жените во истиот период. 76,4% од Македонците користеле интернет неколку пати во текот на денот, и тоа 78,3% од мажите и 74,6% од жените.

Македонците, како што се посочува, интернетот најмногу го користат за зборување, социјални мрежи и праќање инстант пораки. Дури 94,6% од нив го користат интернетот за телефонирање преку интернет/видеo повици (преку webcam; употреба на апликации, на пример, Skype, Facetime) наспроти 89,2% минатата година.

87,6% од Македонците користеле инстант-пораки, т. е. размена на пораки, на пример, преку Messenger, WhatsApp, Viber наспроти 75,2% минатата година. Учество во социјални мрежи (креирање кориснички профил, испраќање пораки или друго на Фејсбук, Инстаграм, Твитер/X итн. ) имале 84,2% од интернет корисниците спрема 76,9% минатата година.

Забележано е и зголемување на користењето на интернетот за скоро сите активности.

Намалување на користењето на интернетот има за информации поврзани со здравјето (повреда, болести, исхрана, подобрување на здравјето итн.), кое е намалено на 55,5% од интернет корисниците во 2024 година, споредено со од 67,7% минатата година.

Од друга страна пак, 53,2% од интернет корисниците праќале/примале електронска пошта (e-mail) наспроти 44% од интернет корисниците минатата година, 72,5% барале информации за производи/услуги наспроти 54,2% минатата година, а особено значајно е дека 13,7% од интернет корисниците учествувале во продажба на производи или услуги, преку аукции како што е на пр.eBay.com наспроти само 6,8% кои учествувале минатата година. Дополнително, забележано е зголемување користењето на интернет банкарство од 40% од Македонците, наспроти 32,8% минатата година.

Во однос на полот, жените повеќе сакаат да зборуваат и да праќаат инстант пораки, но и да бараат информации за производи и услуги поврзани со здравјето, додека мажите повеќе ги користат социјални мрежи, повеќе продаваат производи или услуги онлајн, на пр. преку аукции: eBay и повеќе практикуваат интернет банкарство.

Најновите податоци на Државниот завод за статистика ни покажуваат дека Македонците се повеќе го користат интернетот, но она што е важно дека е зголемено користењето на интернетот за праќање на е-пошта, за барање информациии за производи и услуги, и најважно, за онлајн продавање на производи и за интернет банкарство.Она што најмногу нѐ интересира е онлајн купувањето кое забележува пораст од 10 процентни поена, како и зголеменото купување на повеќе категории на производи. Зголемената понуда на атрактивни промоции и појавата на нови играчи на пазарот го раздвижува онлајн пазарот и се повеќе интернет корисници го користат интернетот за онлајн купување, истакна претседателката на АЕТСМ, д-р Нина Ангеловска Станков.

Пријавувањето за 21. издание на Виз Ер Скопски Маратон, кое ќе се одржи на 5 октомври, 2025 година почна денес. Заинтересираните можат да се пријават преку официјалната веб-страница на маратонот на линкот http://skopskimaraton.com.mk. 

Повторно ќе има четири трки: маратон, полумаратон, трка на 5 километри и штафетен маратон.

Првиот рок за пријавување по најповолна цена е до 10 февруари, 2025 година. Последниот рок за пријавување е до 19 септември, 2025, а сите учесници кои ќе се пријават до 29 август 2025 ќе добијат маица со логото на трката во својот стартен пакет.

Сите учесници кои ќе ја стартуваат трката на 5 октомври ќе добијат вредносен ваучер од 20 евра од генералниот спонзор на маратонот „Wizz Air“. 

Премиерот Христијан Мицкоски одговарајќи на пратеничко прашање во Собранието, во врска со тоа дали ќе се укине недела неработен ден вели дека неговиот став е дека или сите да работат со двојна или тројна дневница за работниците за тој ден или никој да не работи.

И сега е недела работен ден, но, само за одредени економски оператори. Напишано е кои се тие оператори, во законот дури се ставени во квадрат. На пример, работи еден трговски центар што го отваравте со фанфари. Значи, и сега има економски оператори што работат во недела. Моето лично мислење е или никој да не работи во недела, вклучително и тие што сега работат, или, пак, тие што сакаат да работат да им даваат двојна дневница на работниците, рече Мицкоски.

Бенџамин Франклин еднаш рекол: „Инвестицијата во образование враќа најголем профит.“ Поминаа години, но неговите зборови денес се порелевантни од кога било. Со постојаните промени на пазарот на трудот, клучот за да останете успешни и да ги дочекувате секогаш спремни тие промени, е постојаното учење. Ако се соочувате со застој во кариерата или се чувствувате заглавени во сегашната позиција, време е да се разбудите и да го смените патот по кој одите. Зошто стагнација во напредувањето е всушност пропаѓање.

Со чувството за стагнацијата во кариерата се соочуваат многу професионалци. Дали е тоа заради ограничените можности за напредување на вашата сегашна позиција; или се соочувате со недостаток на мотивација; или не сте решителни кој би требало да биде вашиот следен чекор, решението најчесто се крие во стекнувањето на нови знаења и способности. Постојаното учење не е само изветвена фраза – тоа е најбрзиот начин да ја унапредите кариерата и да си обезбедите успех. Еве како можете да започнете:

1. Направете проценка кон што би се стремеле во иднина и кои способности ви недостасуваат за тие цели да ги постигнете

Размислете каде сакате да бидете за пет години? И кои знаења или способности се потребни за остварување на тој ваш сон? Кога тоа ќе го сознаете, ќе направите план како да го премостите јазот. При тоа не заборавете: покажувањето иницијатива, мотивација и желба за напредување, не само што ќе го привлече вниманието на вашиот сегашен работодавец, туку ќе ве претстави и како можен кандидат за некои надворешни можности за ваше напредување.

2. Посетувајте обуки и стекнувајте сертификати

Без разлика дали започнувате нова кариера, посакувате унапредување или се префрлате во друга област, запишувањето на професионални курсеви може многу да придонесе. Работодавците ги ценат луѓето кои се проактивни во својот развој. Во LEORON Institute сме сведоци како обуките и стекнатите сертификати им отвораат нови врати на многу професионалци. Нашето искуство се темели на преку 50,000 професионалци од светот, кои секоја година нам ни ја доверуваат својата обука а чии што, подоцнежни, резултати говорат сами за себе.

3. Искористете го учењето за сопствено унапредување

Завршената обука не е само додавање на уште една цртичка во вашето резиме. Наученото на обуката, неминовно го трансформира начинот на кој размислувате, работите и придонесувате, воопшто. Со вашите нови знаења и способности, стекнувате статус на вреден човечки ресурс за вашата организација. А ако вашата сегашна компанија не го препознае тој ваш потенцијал, бидете убедени дека ќе има некоја друга компанија која ќе знае да ја цени вашата новостекната стручност.

Докажана формула за успех

Во изминатите 14 години LEORON Institute прерасна во водечка организација за учење и развој во светот. Нашите сертифицирани програми и еминентни предавачи, им помогнаа на безброј професионалци да ги остварат своите кариерни соништа и да се искачат на раководни позиции. А нашата деловна стратегија – која ја вмрежува канцеларии во Ријад, Дубаи, Скопје, Абу Даби, Мускат, Кувајт, Каиро, Манчестер и новите планирани локации – сведочи за силата и постојаното растење.

На своите работни места, нашите вработени, имаат пристап до илјадници е-училишни платформи, сертификациски програми и внатрешни можности за развој. Не е изненадување што нашиот тим од над 300 млади, амбициозни професионалци низ светот, постигна значајни успеси и во рамки на LEORON и надвор од него. Со новите канцеларии во Штип и Гостивар, продолжуваме да ги прошируваме можностите за раст и развој и низ Македонија.

Вашиот следен чекор

Па, што е следно што ќе превземете? Без разлика дали сте подготвени да започнете нова кариера, да барате унапредување или едноставно да ја подобрите вашата сегашна позиција, инвестирањето во вашиот развој е вистинскиот пат напред. Исчекорете напред, истражете го вашиот потенцијал и заземете водечка позиција во вашата област.

Ако сте заинтересирани како LEORON Institute може да ви помогне на овој пат, посетете ја нашата веб-страница за да дознаете повеќе за нашите програми или погледнете ги нашите најнови отворени работни места. Запомнете, вашиот напредокот во кариерата не е само достигнување на врвот – туку постојаното движење напред.

А најдоброто време за почеток? Токму сега!

Ви посакувам среќна и успешна 2025та година!

Ѓорѓи Груевски
VP Strategic Operations - LEORON