Вработените во Google би можеле да се соочат со намалување на платата доколку изберат да работат од дома поради пандемијата на корона вирусот, пренесува Reuters.

Имено, британската агенција имаше увид во калкулаторот за плата на Google. Tоа е експеримент што се случува низ Силициумската долина, и кој често поставува трендови кај другите големи работодавци.

Компаниите Facebook и Twitterвеќе ги намалија платите на вработените кои работат од дома, и кои се преселија во области каде што трошоците за живот се пониски.

Сепак, алатката за плати на Google - која им овозможува на вработените да ги видат ефектите од преместувањето - сугерира дека вработените кои работат од дома, особено оние што патуваат на долги растојанија, може да се соочат со намалување на платите дури и ако не се преселат.

„Нашите пакети за компензација секогаш се одредуваа според локацијата и секогаш плаќаме најголеми суми на локалниот пазар врз основа на тоа од каде работи вработениот“, рече портпаролот на Google, додавајќи дека платите ќе варираат од град до град и од земја до земја.

Вработен во Google, кој побара да остане анонимен од страв од казна, обично патува во канцеларија во Сиетл од блиската област, и ако работи со полно работно време од дома, најверојатно ќе се соочи со намалување на платата од околу 10 проценти.

Вработениот размислуваше да работи од далечина, но сепак одлучи да продолжи да оди во канцеларија - и покрај двочасовното патување на работа.

„Висината на намалувањето на платата е еднаква на зголемувањето што го добив со последното унапредување. Не вложив толку многу напор залудно да напредувам, за на крајот да се соочам со намалување на платата“, рече тој.

12 август се одбележува како Меѓународен ден на младите. Голем број политички функционери денеска  упатија честитки порачувајќи дека младите во македонското општество се визијата, идејата, мотивот, силата.

За жал, младите не го делат ова мислење. Нивниот став е дека не го имаат местото кое го заслужуваат во општеството. Во прилог на тоа говори и најновата студија.

Две третини од младите (64,8%) во земјава се незадоволни од своето место во општеството, покажува студијата „Социо-политичко учество на младите: Нееднаквост, неизвесност и различни очекувања“, изработена во соработка со Фондацијата за демократија на Вестминстер.

Студијата покажува дека 58% од младите би се иселиле, доколку им се укаже можност. Од нив, само 6,9% би се вратиле назад во земјата.

Речиси 8 од 10 млади (77,3%) луѓе сметаат дека властите делумно или воопшто не се грижат за нив и нивните потреби.

Пандемијата не ги одмина младите, речиси на 15% им се намалила платата во текот на кризата, додека 6% ја изгубиле работата. Во поглед на образованието, младите кои се во образовен процес даваат просечна оцена 3 за квалитет на наставата за време на пандемијата.

Дефинитивно младите луѓе во потрага за подобар живот се подготвени да се иселат. Социолозите наведуваат дека една од причините е што апатијата со години се таложела, а придонес има и сликата која ја гледаат младите во своите и семејствата од околината. Затоа, како што велат дел од стручните лица, младите наједноставниот излез го гледаат во иселување.

Електричните автомобили се иднината на целиот свет, а во поразвиените земји тие се и сегашноста. Колку и да изгледаше невозможно, бројот на овие автомобили расте и кај нас.

Ова е за пофалба, вели Харис Муратовиќ, претседател на Асоцијацијата на овластени застапници и дилери на автомобили во Стопанската комора на БИХ, но треба да се направи многу повеќе за да има ситуацијата барем слична на земјите од регионот.

Испративме иницијативи и порано, и го направивме повторно, со барање за намалување на царините за увоз на електрични автомобили. Моментално имаме царина од пет проценти за електрични и 15 проценти за хибридни автомобили. Бараме за електрични автомобили оваа должност да се укине и да се намали од 15 на 5 проценти за хибриди, рече Муратовиќ за Кликс.ба.

Според податоците достапни во оваа асоцијација, во Србија се добива субвенција од 5.000 евра за набавка на електричен автомобил, додека 3.500 евра се добиваат за plug-in хибриди (оние со електричен полнач) и 2.500 евра за обични хибриди. Во Хрватска, вели Муратовиќ, за оваа година се обезбедени 65 милиони куни за субвенционирање електрични возила и хибриди.

Пресметавме дека е околу 9.000 за електрични автомобили и 5.000 за хибриди. Словенија дава 7.500 евра за електричен и 4.500 за plug-in хибрид. Црна Гора дава 5.000 евра за електричен автомобил и 2.500 евра за хибриден автомобил. Албанија ослободува од ДДВ. кој е 17 проценти, и царината која варира во зависност од кубниот капацитет, а имаат и пониски трошоци за регистрација за 70 евра. Северна Македонија нема посебни стимулации, но тие плаќаат данок за моторни возила при увоз на автомобили, тоа е од нула до 20 отсто. Електричните возила се ослободени од тој данок. Единствените две држави од поранешна Југославија кои немаат никакви придобивки за електричните возила се Косово и БиХ, рече Муратовиќ.

Сепак, Муратовиќ смета дека климата за ова прашање се променила кај оние што донесуваат одлуки во изминатиот период и се надева дека некои прашања треба да почнат да се решаваат оваа година. Еден од нив е инфраструктурата на електрични станици за полнење.

Актуелните мерки за патување во Грција, односно задолжителен документ за ковид-19 и пополнет PLF формулар, продолжени се за уште една седмица, до 19 август, согласно новата министерска одлука „Предуслови за влез во земјата за да се ограничи ширењето на ковид-19″, што утрово стапи во сила, јави дописничката на МИА од Атина.

Северна Македонија и понатаму е на листата трети земји за кои не важи забраната за влез во Грција, отворени се сите копнени гранични премини, а за патување во Грција потребен е сертификат за вакцинација или негативен ПЦР/ рапид тест или потврда за прележан вирус, заедно со пополнет PLF формулар.Поконкретно, сите посетители, „независно од државјанството и начинот на влез во земјата” имаат две опции и една алтернативна можност, во однос на документите што треба да ги приложат и се поврзани со ковид-19, а МИА детално ги пренесува сите предуслови за патување во Грција.

Првата опција е целосно да ја имаат завршено вакцинацијата 14 дена пред патувањето и да достават сертификат за вакцинација на грчки, англиски, француски, германски, италијански, шпански или руски јазик, издаден од јавна установа и да ги содржи податоците: име и презиме, како што се заведени во пасошот, вид на вакцина и бројот на дози, заедно со датуми кога се примени.

Втората можност е со негативен тест: или ПЦР направен во последните 72 часа пред патувањето или антигенски (брз) тест направен 48 часа претходно. И за двете опции, тестирањето треба да биде во одобрена од државата на потекло приватна или државна лабораторија, а потврдата да биде на грчки, англиски, француски, германски, италијански, шпански или руски јазик, а исто како и за сертификатот, треба да ги содржи и името и презимето на лицето кое патува, онака како што се заведени во пасошот.

Алтернативно, како што пишува во официјалната одлука, посетителите на Грција, може да достават потврда за прележана болест по лабораториско тестирање со ПЦР или антигенски (брз) тест, а сертификатот се издава 30 дена по првиот позитивен тест и неговата важност е до 180 дена подоцна.

Документот треба да биде од јавна установа или од лаборатории одобрени од државата на потекло, да ги содржи податоците од пасошот и повторно, може да биде на неколку јазици, односно на грчки, англиски, француски, германски, италијански, шпански или руски јазик.

Европскиот дигитален ковид сертификат е уште една алтернативна можност за влез во Грција.

Конкретните обврски за патување важат за лица со наполнети 12 години.

Сите посетители на Грција, независно од земјата на потекло, може да бидат подложени на тестирања, а селекцијата се врши согласно здравствениот алгоритам и со помош на кодот од PLF формуларот.