Државјанство на маил за 150 денари, со новата дигитална услуга ќе се спречува корупција на шалтерите. Граѓаните ќе можат да добијат по електронски пат уверение на веб страната uslugi.gov.mk.
Дигитализација и поврзување на институциите би требало да ги намали гужвите по шалтерите каде се издаваат лични документи.
Додека министрите промовираат побрз начин да се дојде до државјанство, илјадници граѓани кои живеат на 185 улици чие име е сменето од градските власти, се соочени со проблем да обноват лични документи.
Од закажан термин на шалтерите на МВР ги враќаат граѓаните со образложение дека сами треба да извадат уверение во Град Скопје за новото име на улицата. Иако не по нивна вина, ова ги чини плус пари, време и пропуштени термини. Но и оваа потврда можат да ја добијат откако ќе извадат нов имотен лист. Постапката трае со недели, а од МВР и покрај тоа што имаат сознание дека се направени вакви промени, велат не се надлежни да утврдуваат законитост на одлуките на градските власти.
Од март, граѓаните веќе плаќаат повисоки такси за вадење лични документи и ова е само дополнителен трошок за нив. Поскапувањето според Спасовски е незначително, а било направено поради повисоките цени на репроматеријалите.
До следната 2024 е рокот за промена на личните документи со нови кои ќе го содржат уставното име на државата. Едно лице, ова ќе го чини најмалку околу 2700 денари. Дополнително МВР одлучува дали за кратенката НМК на регистарските таблички возачите ќе треба да ги променат за 1.500 денари или проблемот ќе се реши со едноставна налепница.