Децата со наполнети 17 години ќе може да стекнат право за оспособување за управување со возило од Б-категорија, информираат од Републичкиот совет за безбедност на сообраќајот на патиштата (РСБСП) повикувајќи се на измените на Законот за безбедност на сообраќајот.

Како што информираат оттаму, досега Законот овозможувал со вакво право да се стекнат деца со наполнети 16 години, но таа одредба ќе претрпи корекција. Покрај тоа, децата кандидати за возачи со наполнети 17 години ќе нема потреба да имаат одличен успех и примерно поведение во последната завршена учебна година, како што досега предвидуваше Законот, ниту ќе има потреба да обезбедат писмена согласност од психологот и педагогот од училиштето во кое посетуваат настава.

Покрај условот што се однесува за возраста на детето, потребно ќе биде кандидатите да ги исполнуваат и следните услови: детето треба да поседува лична карта, да е здравствено и психофизички способно да управува со моторно возило, да има завршено најмалку основно образование и да има согласност од двајцата родители, законскиот застапник или старателот, заверена на нотар, информираат од РСБСП.

Како што соопштуваат оттаму, оспособувањето за управување со моторно возило на дете се врши со зголемен број наставни часови од практичниот дел на наставната програма за 30 отсто во однос на бројот на наставни часови од практичниот дел на наставната програма предвидени за другите кандидати за возачи.

Покрај тоа, дете што поседува возачка дозвола од Б-категорија не смее да управува со возило во патниот сообраќај во времето од 20 до 5 часот, освен ако во возилото го придружува родител, односно старател што седи на предното седиште, кој поседува возачка дозвола од Б-категорија и на кого не му е изрекувана прекршочна санкција забрана за управување со моторно возило.

Дете возач не смее да управува со возило со брзина поголема од 60 километри на час на јавен пат, односно со брзина поголема од 80 километри на час на пат наменет исклучиво за сообраќај на моторни возила ниту, пак, со брзина поголема од 100 километри на час на автопат.

Во однос на силата на моторот на возилото што смее да го управува дете возач, потребно е да се истакне дека јачината на моторот на возилото не смее да биде поголема од 77 kw. Исто така, дете возач не смее со возило да влече приклучно возило ниту, пак, да управува со возило надвор од територијата на Република Македонија.

Од РСБСП апелираат до сите учесници во сообраќајот што спаѓаат во категоријата дете возач да бидат максимално одговорни во сообраќајот и да ја почитуваат законската регулатива која се однесува на оваа категорија возачи.

Грчкото Министерство за здравство побара од полицијата да го засили казнувањето на граѓаните кои пушат во нивните автомобили или во присуство на деца.

Барањето е издадено врз основа на Законот за забрана за пушење цигари на јавни места.

Со Законот се предвидени казни од 1.500 евра за секој што ќе пуши во автомобил, а 3.000 евра казна за пушење во службен или државен автомобил

Во општина Карпош и натаму нема никакви ограничувања на паркинг просторот, па најавите за воведување на целосно зонско паркирање по примерот на општина Центар загрижи многу граѓани. Сепак, од општината предводена од Стефан Богоев, информираат дека таква одлука не е донесена и за промените на регулацијата на паркинг просторот ќе следи консултација со граѓаните. 

„Во контекст на тоа, факт е дека на неколку клучни локации во Општината постојат т.н. “тесни грла” во паркирањето. Станува збор, пред сé, за потегот долж улицата Рузвелтова (која што е неформална граница меѓу Општина Центар и Општина Карпош), како и за опфатот околу ТЦ Сити Мол.

Жителите на Карпош од зградите, но и од околните куќи на овие локации, имаат реален проблем со паркирањето поради фактот што возила од Општина Центар и други посетители ги паркираат своите возила на паркинзите наменети за станарите на Карпош, кои се бесплатни.

Но, исто така факт е дека поради ваквиот реален проблем граѓаните на Карпош од споменатите делови сé повеќе го актуелизираат прашањето за поставување некакви ограничувања на паркирањето од другите општини. За таа цел, дури во неколку наврати поднесоа иницијативи до Градоначалникот и до Општината, за воведување на зонско паркирање токму на посочените делови. Општина Карпош, како сервис на граѓаните има обврска да ги реши сите реални проблеми на жителите, вклучително и овој со паркирањето.

Локалната самоуправа останува на ставот дека во Карпош нема потреба од воведување на зонско паркирање на целата територија на Општината. Она што можеме како локална власт е да ги разгледаме иницијативите, да ја согледаме нивната оправданост и да изнајдеме најсоодветно решение.

Дали на тие потези ќе има зонско паркирање може да решат само мнозинството од жителите на овие делови од Карпош кои се соочуваат со проблемот, откако претходно тие сознанија ќе бидат добиени со спроведување на анкета и непосредно изјаснување. Но, никако со “декрет” или наметнато решение од Општина Карпош или како дел од програмите на Град Скопје, реагираат од општината.

Претходно на обидот на Градски паркинг да воведе зонско паркирање во Карпош се спротиставија жителите на општината и екс градоначалникот Стевчо Јакимовски.

Со Законот за изменување и дополнување на Законот за персоналниот данок на доход, од 1 јануари 2018 година се воведе нов начин на пресметување и плаќање на персонален данок на доход, со поднесување на Електронска пресметка (е-ППД) до Управата за јавни приходи преку системот е-Персонален данок е-пдд.ујп.гов.мк.

Треба да поднесат електронска пресметка граѓаните за приходи од издавање на имот на друго физичко лице до 10-ти во месецот кој следи по месецот во кој е склучен договорот или по месецот на издавање. Во случај на склучен договор за цела година, се поднесува електронска пресметка (е-ППД) за цела година, односно за времетрањето на закупот.

Од УЈП посочуваат дека на пример, кога граѓанин издава стан на друго физичко лице за цела 2018 година се поднесува една пресметка е-ППД за период од 01.01.2018 до 31.12.2018 година.

Доколку времетраењето на закупот е пократко од 31 ден во еден месец, односно се издава преку веб страни боокинг, аирбнб и сл. се поднесува по една електронска пресметка (е-ППД) за секој поединечен остварен приход.

На пример кога граѓанин во текот на еден месец издава стан по неколку дена на повеќе закупци се поднесуваат пресметки е-ППД за секој остварен приход, односно за секој различен закупец за соодветниот период на престој во станот.

Се поднесува електронска пресметка и за капитални добивки од продажба на хартии од вредност, недвижен имот и учество во капиталот до 10-ти во месецот кој следи по месецот во кој е извршена продажбата или во кој е заверен договорот за купопродажба. До 10-ти во месецот треба да се поднесе електронска пресметка и за приходи од странство остварени во претходниот месец, лични примања од дипломатски, односно конзуларни претставништва на странски држави, кај претставници и службеници на такви претставништва кои имаат дипломатски имунитет и за кои даночниот обврзник сам го утврдува и уплатува данокот и други приходи остварени со е-трговија преку специјализирани интернет страни, приходи од интернет маркетинг услуги, приходи остварени со продажба на корисен цврст отпад, исплатите на име специјализации, постдипломски студии.

Опфатени се за пријавување и приходите од продажба на сопствени земјоделски производи на физички лица надвор од продажни места на зелени пазари.

Од УЈП повикуваат секој граѓанин да се регистрира на системот е-Персонален данок e-pdd.ujp.gov.mk заради пријавување на приходите и задолжително поднесување на Електронска пресметка (е-ППД) до Управата за јавни приходи.

Од УЈП напоменуваат дека странско физичко лице, односно нерезидент на Република Македонија, се регистрира како корисник на системот со ЕДБ доделен од УЈП.

Појаснуваат дека постапката за регистрација на е-Персонален данок е лесна и едноставна. Единствен услов за регистрација на системот е да имате валидна е-пошта, која ќе биде корисничко име за ваша најава на системот е-пдд.ујп.гов.мк и ќе ви служи за комуникација со Управата за јавни приходи. На најавната страна на системот е-Персонален данок има дел за регистрација на нов корисник на системот, во кој треба задолжително да ги внесете своите идентификациони податоци.

Врз основа на внесените податоци, автоматски се генерира Барањето за регистрација на системот е-Персонален данок, кое треба да се  испечати и да се поднесе лично во надлежната даночна канцеларија на УЈП. Службено лице од УЈП ќе ја верифицира  регистрацијата на системот е-Персонален данок истиот ден, по што треба да се најавите на системот.

Од УЈП посочуваат дека доколку е обврзникот регистриран во системот е-Даноци како овластено лице за потпишување за ПДД, автоматски е регистрирани и како корисник на системот е-Персонален данок е-пдд.ујп.гов.мк.

Ако вие или избраниот полномошник не сте евидентирани како даночен обврзник во Регистарот на даночни обврзници на УЈП, потребно е претходно да се регистрирате како даночен обврзник, со поднесување на Пријава за регистрација УЈП-РДО и доставување на документ за идентификација на увид во даночна канцеларија на УЈП.

По одобрување на Електронската пресметка (е-ППД) од УЈП, електронски се доделува Фолио број и се издава Рекапитулација за утврдување на аконтација на персоналниот данок на доход со статус „Одобрена“ и Налог за плаќање на персонален данок на доход, односно налози за плаќање на месечни аконтации на персонален данок на доход.

Налогот за плаќање на месечни аконтации на персонален данок на доход обврзникот е должен дао го плати најдоцна до 15-ти во месецот за претходниот месец.