Четиристотини евра во денарска против вредност изнесува паричната казна која ќе ви ја наплати државата во судска постапка, плус кривична пријава за незаконско снимање, поднесена од секој поединец чиј идентитет ќе биде утврден во снимениот материјал кој е прибавен со било каков вид камера, поставена во автомобил или во станбена зграда. Ова дело е казниво според Законот за лични податоци на Македонија.

Секој, кој веќе поставил камера во возилото или во зграда, без да има одобрение, буквално, од сите станари во зградата, должен е веднаш, пред да биде казнет да ја отстрани опремата за видео надзор.

Сопствениците на современите возила кои имаат фабрички инсталирани видео камера во ретровизорите или во задниот дел од автомобилот имаат опција сами да побараат од овластен сервис да им ја деактивира направата, бидејќи во Македонија како и секаде во ЕУ, снимањето на личните податоци и идентитетот на граѓаните на јавно место е забрането и казниво.

Многу од граѓаните, велат експертите, понесени од разни видео клипови, кои ги прават аматери од цел свет, инсталираат камери во своите автомобили, надевајќи се дека еден ден, таа снимка ќе можат да ја искористат како „доказ“ доколку им се случи некоја непридвидена ситуација.

Но, согласно член 369 став (1)од Законот за безбедност на сообраќајот на патиштата („Службен весник на Република Македонија“ бр. 169/15, 226/15, 55/16, 11/18 и 83/18), само полицијата е овластена да постави уреди за снимање на јавни места на кои се одвива сообраќај и на кои може да се извршуваат прекршоци од областа на сообраќајот на патиштата, согласно со закон.

Се подготвува измена на регулативата за работењето на менувачниците. На предлог на Царинската управа и во соработка со Народна банка, ќе се менува потврдата за купување и продавање на ефективни странски пари и чекови што ги издаваат менувачниците. Со корекцијата, Царината треба да добие поголема контрола во изнесувањето девизи, пренесува Независен.

Конкретно, ќе се наложи идентификација на лицето што менува пари и во потврдата ќе се воведе нова рубрика - час на издавање. Документот за сменети пари што ќе го издаде менувачницата ќе мора да го содржи единствениот матичен број на граѓанинот и времето на трансакција. Царина потврдува дека имало многу случаи кога граѓаните се обиделе да изнесат поголема сума девизи од дозволената при излез од државата и биле фатени. Но, во натамошната постапка, граѓаните со потврда од менувачница извадена отпосле, тврделе дека имаат покритие за девизите што се обиделе да ги изнесат. На ваков начин многу одземени пари пак им биле вратени на граѓаните, иако направиле прекршок.

Според закон, резидентите можат слободно да изнесат од Македонија девизи и чекови до 2.000 евра, а за износите меѓу 2.000 и 10.000 евра треба кај цариникот на излез од земјата да се пријави износот и за него да се поседува потврда за купени девизи од овластена банка или менувачница или дека се подигнати од сопствена банкарска сметка. Над 10.000 евра не смеат да се изнесат. Од Царината велат дека во досегашното работење 99 отсто од потврдите биле од менувачници, а само еден отсто од банки.

Поради летниот распуст, од вчера не важат бесплатните средношколски билети. Од ЈСП информираат дека од вчера тие се исклучени од интегрираниот тарифен систем.

Инаку, средношколците по повластени цени може да купат месечен билет за јули и август по цена од по 600 денари.

Сите граѓани кои во текот на годината имале приход до 720.000 денари (по 60.000 денари месечно во просек) ќе плаќаат персонален данок на доход со стапка од 10 отсто, додека за сите приходи кои се над 720.001 денари данокот ќе биде 18 отсто за делот на доходот над овој износ. Фактор објавува дел од работната верзија на новиот Закон за персонален данок на доход со кој Владата од 2019 година воведува прогресивни стапки на оданочување. Во приходите кои се оданочуваат спаѓаат тие кои граѓаните ги добиваат од заработената месечна плата на работа, од самостојна дејност, од авторски и сродни права и продажба на сопствени земјоделски производи.

Но ова не е единствената новина во законот. Според нашите информации за доходот од интелектуална сопственост, закуп и подзакуп, капитал, капитални добивки, игри на среќа и осигурување ќе се плаќа данок по стапка која е единствена, односно по 15 отсто.

Исто така се предвидува граѓаните и фирмите да плаќаат данок на каматите кои ги добиле од своите заштеди во банките, ако добивката изнесува над 15.000 денари годишно.

Прогресивното одначување на приходите беше најавено во март годинава, а тоа беше и дел од програмата на сега владеачката партија СДСМ. Министерот Драган Тевдовски тогаш најави дека ќе се оданочуваат со стапка од 18 отсто сите приходи на граѓаните кои заработиле повеќе од 1.000 евра месечно, што сега веќе е преточено и во подготвителната верзија на законот. Другите новини не беа навестени.

Инаку Македонија во моментов има рамен данок односно се плаќа десет отсто на сите приходи кои се остваруваат во текот на годината. Но, во земјва низ историјата имало и прогресивни даночни стапки за „персоналецот“.

Од 1994 до 2001 година имаше прогресија од три стапки. Од 2001 до 2004 година доходот остварен во износ до 360.000 денари се оданочуваше по стапка од 15 отсто, доходот над 360.000 денари со стапка од 18 отсто. Од 2005 до 2006 година оданочувањето на доходот на граѓаните се врши повторно на три нивоа. Доходот до 360.000 денари се оданочува со стапка од 15 отсто, доходот од 360.000 до 720.000 денари со стапка од 18 отсто додека доходот над 720.000 денари по стапка од 24 отсто. Од 1 јануари 2007 година се воведува пресметување на персоналниот данок со пропорционална даночна стапка односно со рамен данок.