Во 2019 година, македонските граѓани ќе имаат седум продолжени викенди. Од вкупно 11 неработни денови за сите граѓани, седум се поврзуваат со викендот, за разлика од годинава, која имаше четири продолжени празнични викенди.

Првиот продолжен викенд ќе биде за Божик, зашто неработен ден е 7 јануари, понеделник. Слична е ситуацијата и со христијанскиот празник Велигден, кој в година како неработен е на 29 април, понеделник. Неработниот ден за 24 Мај – „Св. Кирил и Методиј“, Ден на сесловенските просветители, е во петок, така што граѓаните ќе одмораат уште еден продолжен викенд. Продолжен викенд има и за Денот на Републиката – 2 Август, кој е во петок, како и за Денот на независноста – 8 Септември, кој е во недела, но неработниот ден се префрла за 9 септември.

Денот на народното востание – 11 Октомври е уште еден неработен ден што се врзува со викенд, бидејќи е во петок, додека 8 Декември – „Св. Климент Охридски” е во недела, а неработниот ден се префрла за понеделник, 9 декември.

За сите граѓани неработни денови се и 1 јануари (вторник), 1 Мај – Денот на трудот (среда), 4 Јуни (вторник) – Рамазан бајрам, и 23 Октомври (среда) – Ден на македонската револуционерна борба и 8 Декември.

Граѓаните од православна вероисповед најмногу ќе одмораат за големиот христијански празник Велигден, бидејќи за нив, освен понеделник, 29 април, неработен ќе биде и петок, 26 април. Продолжен викенд ќе имаат и за Духовден, петок, пред Духовден на 14 јуни.Неработни денови за православните верници се и Бадник на 6 јануари, недела, 19 јануари (сабота) и Успение на Пресвета Богородица, 28 август, среда.За граѓаните од католичка вероисповед неработни се и 22 април (понеделник) – Велигден, вториот ден на Велигден, 1 ноември – петок – Празникот на сите светци, како и 25 декември (среда) – првиот ден на Божик.За граѓаните од муслиманска вероисповед неработен е и 11 август (недела) – Курбан бајрам.

Програма на неработни денови за 2019 година

Во согласност со Законот за празниците на Република Македонија (Сл. весник на РМ број 21/98 и 18/07) во 2019 година неработни денови се:

За сите граѓани на РМ

– 1 јануари (вторник), Нова година, – 7 јануари (понеделник), Божик, првиот ден на Божик според православниот календар, – 29 април (понеделник), Велигден, вториот ден на Велигден според православниот календар, – 1 мај (среда), Ден на трудот, – 24 мај (петок) „Св. Кирил и Методиј“, Ден на сесловенските просветители, – 4 јуни (вторник), Рамазан бајрам, првиот ден на Рамазан бајрам, – 2 август (петок), Ден на Републиката, – 8 септември (недела), Ден на независноста, односно 9 септември (понеделник) е неработен ден, – 11 октомври (петок), Ден на народното востание, – 23 октомври (среда), Ден на македонската револуционерна борба, – 8 декември (недела), „Св. Климент Охридски”, односно 9 декември (понеделник) е неработен ден.

За граѓаните од православна вероисповед

– 6 јануари (недела), Бадник, ден пред Божик, – 19 јануари (сабота), Богојавление (Водици), – 26 април (петок), Велипеток, петок пред Велигден, – 14 јуни (петок), Духовден, петок пред Духовден, – 28 август (среда), Успение на Пресвета Богородица (Голема Богородица).

За граѓаните од католичка вероисповед

– 22 април (понеделник), Велигден, вториот ден на Велигден, – 1 ноември (петок), Празникот на сите светци, – 25 декември (среда), првиот ден на Божик.

За граѓаните од муслиманска вероисповед

– 11 август (недела), Курбан бајрам, првиот ден на Курбан бајрам.

За граѓаните припадници на албанската заедница во РМ

– 22 ноември (петок), Ден на албанската азбука.

За граѓаните припадници на српската заедница во РМ

– 27 јануари (недела), Свети Сава.

За граѓаните припадници на ромската заедница во РМ

– 8 април (понеделник), Меѓународен ден на Ромите.

За граѓаните припадници на влашката заедница во РМ

– 23 мај (четврток), Национален ден на Власите.

За граѓаните припадници на еврејската заедница во РМ

– 9 октомври (среда), Јом Кипур, првиот ден на Јом Кипур.

За граѓаните припадници на бошњачката заедница во РМ

– 28 септември (сабота), Меѓународен ден на Бошњаците.

За граѓаните припадници на турската заедница во РМ

– 21 декември (сабота), Ден на наставата на турски јазик.

Управата за јавни приходи ги повика граѓаните кои не ја исполниле својата обврска да се регистрираат на системот е-Персонален данок бидејќи крајниот рок за пријавување истекува на 31 овој месец.

Од УЈП информираат дека покрај шалтерите во Регионалната дирекција во Скопје, отворени се и дополнителни шалтери во општините. Така, шалтери на УЈП се отворени во зградата на урбаната заедница Ѓорче Петров кај полициската станица и во општинската зграда во Аеродром и тие ќе работат од 8 до 18 часот до 31 декември. Шалтери се отворени и во општините Кисела Вода, Гази Баба и Чаир со работно време од 8 до 16 часот.

Регионалните дирекции на УЈП во Скопје, Штип, Тетово и Битола ќе работат од 7 до 21:30 часот, освен на 31 декември кога работното време ќе биде до 16:30 часот. Регионалните дирекции ќе бидат отворени за граѓаните и во последните две саботи од месецот, односно на 22 и 29 декември со работно време од 8 до 14 часот.

Од УЈП информираат дека функционира и „Мобилен даночен шалтер“ којшто ги посетува оние населени места во Скопје каде Управата за јавни приходи нема постојано даночни канцеларии. Вонредниот возен ред на овој Мобилен даночен шалтер може да се најде на линкот http://ujp.gov.mk/mk/otvoreni_povici/pogledni/400. 

Од следната година жените во Србија ќе мора да работат дополнителни шест месеци за да отидат во пензија, објави Министерството за труд, вработување и социјални работи.. Жените ќе се пензионираат од 62 години и шест месеци, а  со најмалку 15 години стаж.

Мажите и следната година може да се пензионираат со 65 години и најмалку 15 години стаж. Сите осигуреници со 45 години стаж, без оглед на нивната возраст, имаат право на старосна пензија.

Кога станува збор за предвремено пензионирање, мажите во 2019 година можат да постигнат со 57 години и шест месеци од животот и најмалку 40 години стаж.

Жените следната година го остваруваат правото на предвремено пензионирање доколку имаат 57 години и 38 години и шест месеци осигурување.

Ако сакаат да се пензионираат според прописите кои се применуваат оваа година, вработените мора да поднесат барање за остварување на своите права до надлежната филијала на Републичкиот фонд за пензиско и инвалидско осигурување заклучно со 31 декември.

Нето плата од 14 710 денари во октомври земале вработените во секторот производство на кожа и слични производи од кожа. 

Тие се најслабо платени во земјава. Слични примања имаат и оние кои работат во секторот услуги поврзани со одржување на згради и дејности на уредување и одржување на животната средина и природата. Тие имале нето плата од 14 676 денари. 

Просечната месечна исплатена нето-плата по вработен, во октомври 2018 година, изнесува 24 817 денари.

Според податоците на Државниот завод за статистика, индексот на просечната месечна исплатена нето-плата по вработен, во октомври 2018 година, во однос на октомври 2017 година, изнесува 106.3. 

Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Рударство и вадење на камен (22.2 %), Информации и комуникации (18.7 %) и Преработувачка индустрија (11.0 %).

Зголемување на просечната месечна исплатена нето-плата по вработен, во однос на претходниот месец, е забележано во секторите: Рударство и вадење на камен (5.1 %), Административни и помошни услужни дејности (3.9 %) и Други услужни дејности (3.8 %)