Електронската наплата на патарините како да е невозможна мисија во земјава, проект рамен на пробивање на Суецкиот канал или испраќање на човечка мисија на Марс. И по пет години откако се обезбедени парите за оваа наменаа, македонските, а и странските возачи, не можат да ги почувствуваат ефектите од возење по автопат без застанување на секои 30- 40 километри за да платат патарина.

Последните најави се дека годинава ќе биде пуштена во употреба електронската наплата на 5 патарини по Коридорот 10- Сопот, Отовица, Петровец, Романовце и Миладиновци. Но, вакви најави имаше и во претходните години, па останува само да се надеваме дека ќе се исполнат.

Тоа што е непроменето, се огласите за вработување во ЈП за државни патишта. Директорот Зоран Китанов вели дека не станува збор за нови вработувања туку дека се огласени веќе постоечките работни места, бидејќи договорот на определено им истекол на вработените и повторно се пополнуваат истите места.

Инаку, целта на воведувањето на системот за електронска наплата на патарините е намалување на чекањето и застоите кои се создаваат на рампите, особено во одредени делови од годината, како што е летниот период, кога има голема фреквенција на сообраќај. Системот на електронска наплата веќе функционира во соседните земји, како Србија, а наскоро ќе биде воведен и во Бугарија, кој ќе мора да ги укине вињетките и да воведе наплата на патарината според поминат километар, онака како што предвидува европската регулатива.

Инвестицијата за автоматизацијата на наплатните рампи чини 17,8 милиони евра, од кои 15 милиони евра беа обезбедени преку Европската банка за обнова и развој, а остатокот од буџетот. Електронската наплата ќе се извршува преку микробранови транспондери, односно еден вид налепници и со смарт картички, а електронскиот систем ќе врши и категоризација на возилата. Налепниците се специјални лепенки со сериски број, кои ќе се ставаат на предното ветробранско стакло., при што како што ќе се приближи возилото, од далечина, системот на рампата ќе го отчитува бројот и автоматски ќе ја отвори рампата. Смарт картичките ќе бидат по можност при пеид и пост пеид, а ќе се продаваат на наплатните станици, на бензиските пумпи и други малопродажни објекти или ќе се купуваат преку интернет.

На почетокот, патарината ќе се наплаќа како и досега, во кеш и со картичка. Истовремено, ќе има неколку рампи со електронско плаќање и полека како граѓаните ќе се привикнуваат на новиот систем, така ќе се зголемува нивниот број.

По Коридорот 10, автоматизација на рампите се планира и на автопатските делници на Коридорот 8.

Од денес, во Бугарија, електронските вињети се купуваат од шалтерите на големите бензински пумпи, поголемите супермаркети и во Бугарската пошта. Електронските вињети се исто така достапни преку специјализираната страница bgtoll.bg, мобилна апликација и терминали за самонаплата.

Инаку, на терминалите за самонаплата, покрај бугарски јазик, може да се избере опција на англиски, германски, романски, српски, грчки, турски и руски, но не и на македонски јазик, иако голем број Македонци патуваат кај источниот сосед, особено во зимските и бањските центри.

Се очекува до крајот на месецот терминали за самонаплата и каси да има и на сите гранични пунктoви, како на банкоматите за подигање пари. Шефот на агенцијата за патишта, инж. Светослав Глосов, изјави за БНР дека на повеќе од 4.500 места ќе можат да се купат вињетки.

Поради тешкотиите и грешките при подигнувањето на системот, од агенцијата „Патна инфраструктура“ најавија дека до 15 јануари ќе биде во сила грејс период во кој возачите без вињети нема да бидат казнети, туку ќе им се објаснува како да ги купат.

Германија ја забрани продажбата на „ајфон“ 7 и 8 откако „Квалком“ го победи „Епл“ на суд. Овие мобилни телефони, како што смета „Квалком“, прекршуваат неколку нивни патенти за заштеда на енергија, што упеаа и да го докажат на суд на крајот од 2018 година. Тогаш судот пресуди дека овие уреди веќе не смеат да се продаваат во Германија, а одлуката стапи во сила оваа недела, јавуваат агенциите.

Според германските закони, во вакви случаи се бара од тужителот да уплати депозит. Овие пари се чуваат и можат да се искористат за исплата на надомест на штета на тужениот во случај пресудата да биде поништена на повисок суд.

„Квалком“, очигледно, е толку сигурен дека нема да биде успешна жалбата на „Епл“, па веќе во првите денови на годинава уплати 1,34 милијарди евра депозит, со што автоматски ја активира забраната за продажба на „ајфонот“.

МВР набавило 240.000 бланко обрасци за пасоши со името Република Македонија кои се во царинското депо и истата вест ги вознемири грчките медиуми.

Алфа ТВ при објавувањето на информацијата прашува зошто министерството за внатрешни работи се одлучило за ваков потег кога за десетиона дена се очекува да се изгласаат уставните измени во согласност со Преспанскиот договор.

Од ресорот ја потврдиле информацијата со тоа што дале објаснување дека сепак е потребно да помине долго време за да дојде до промена на официјалните податоци на личните документи како што налага Спогодбата од Преспа.

- Дури и да бидат изгласани уставните измени на 15-ти јануари, потребен е временски период за менување на процедурите и законските промени, како и за стапување во сила на измените, велат од Министерството за внатрешни работи.