Меѓународен Балкански универзитет и Халкбанк АД Скопје со цел да помогнат во едуцирање на младите создадоа заеднички производ – Студентски кредит со 0% камата и со промотивна школарина од 1000 евра. Целта на оваа кампања насловена „Инвестирај во знаењето" е на студентите и нивните семејства да им се понуди уникатна можност да можат да одберат квалитетно и меѓународно образование, а со домашни услови на финансирање.

Во оваа кампања, Меѓународен Балкански универзитет ќе ја покрие каматата за студентскиот кредит, а студентот, односно родителите ќе ја плаќаат школарината кон универзитетот на 12 еднакви месечни рати без камата.

"Квалитетното образование е од исклучително значење за општеството во целина поради што создадовме производ кој може да го олесни студирањето на младите. На сите оние на кои ќе им биде одобрен студентскиот кредит, како дел од кампањата, МБУ и Халкбанк овозможуваат и добивање дебитна картичка која дава можност за подигнување готовина од сите банкомати од сите банки во земјата и странство, како и бесплатно електронско банкарство и бесплатна
мобилна апликација за истото, а истовремено бесплатно ќе биде и водењето на
трансакциската сметка, со што сметаме дека ќе го олесниме школувањето на идните студенти а воедно и идни двигатели на дигитализацијата", вели Атила Селим, директор на Дирекцијата за алтернативни канали за дистрибуција и платежни картички во Халкбанк.

За новиот кредит заинтересираните можат да аплицираат во било која филијала на банката во земјава.

"Успесите на Халкбанк во делот на работењето со физички лица се должи на тоа што секогаш навремено ги согледува и одговара на потребите на граѓаните со соодветни финансиски решенија. Со нашиот нов производ, субвенциониран кредит за студирање во соработка со МБУ, родителите или членови на семејството на студентот ќе можат да аплицираат за кредит за студирање со тоа што школарината би ја отплатиле на 12 еднакви месечни рати со можност за добивање грејс период за отплатата од 3 месеци. Каматата за целиот период би била субвенционирана од страна на универзитетот, а клиентите би имале обврска за редовно сервисирање само на главницата во договорениот период на отплата. Во една едноставна процедура за овој вид кредит нема да се наплаќа надоместок за апликација и одобрување, а за производот не се предвидени ниту трошоци за предвремена отплата согласно регулативата.

Процедурата е премногу едноставна, се разликува од било кој останат производ, а резултира со овозможување на иден студент да има квалитетна иднина", изјави Марко Поповски, директор на Дирекција за маркетинг на население.

Меѓународниот Балкански универзитет е најдобриот универзитет во Северна Македонија во областа на наставата и учењето според Шангајската ранг листа на универзитети, со најнов универзитетски кампус и со најмодерните стандарди на образование, каде наставата се одвива целосно на англиски јазик.

"Меѓународниот Балкански универзитет создава висококвалификуван кадар кој е конкурентен на меѓународните пазари на трудот. Доказ за тоа е што МБУ има над 90% на професионално ангажирани дипломци во првите 6 месеци по дипломирање, што е највисок процент во целиот регион. Нивото и квалитетот на образовниот процес што ги нуди овој универзитет се зголемува со програмите и договорите за студентска мобилност, односно можност за размена преку договори што МБУ ги има со над 150 универзитети во 40-тина земји од Европа и светот, преку европската мрежа Еразмус+ и турската програма за студентска мобилност Мевлана.

Создавањето интернационален кадар кој, според досегашното искуство, успешно се соочува со предизвиците на глобалните компании, е резултат и на силната и блиска соработка што Универзитетот ја има со компании од земјава и странство каде секојдневно се нуди квалификуваниот кадар произлезен од МБУ, подготвен да се соочи со секој работен предизвик. Горди сме што во нашето портфолио воведуваме ваков производ и пракса на општествено одговорна институција, пред се поради иднината на нашите студенти. Затоа, МБУ ќе ги
подмири каматите од студентскиот кредит, а семејствата на идните студенти ќе имаат можност безгрижно да го едуцираат своето дете во меѓународна средина", вели Висар Рамадани, генерален секретар на МБУ.

МБУ е составен од 7 факултети кои нудат 18 програми за додипломски и 10 програми за постдипломски студии. Универзитетот ја гради својата успешна приказна во нашата земја веќе 13 години и досега од него излегле 9 генерации од додипломски и 5 генерации од мастер студиите.

Во скопската гимназија „Орце Николов“ за упис на нови средношколци имало 285 слободни места, но се пријавиле дури 330 со сите петки, потврди директорот Митко Димовски, на состанокот со одговорните од Министерството за образование и наука.

Во првиот уписен јунски рок има убедливо најголем интерес за оваа гимназијата и сите ученици кои се пријавиле имале одличен успех. Токму поради тоа, ова средно училиште ќе биде единственото кое ќе воведе полагање на квалификационен тест за да се направи селекција. Ваквиот критериум се во ведува за прв пат после многу години.

Вчера е донесена одлука тестирањето да се спроведе во петок, откако ќе се направи ранг листа, и на наставнички совет ќе се утврди фактичката состојба. Учениците со сите петки во петок ќе полагаат македонски јазик и математика, а тестовите ќе ги прави Министерството за образование и наука заедно со Бирото за развој на образованието. Резултати ќе се објават истиот ден.

Ако имаш некој познат, многу полесно и побрзо ќе завршиш работа. Ова „правило“ се уште важи кога станува збор за функционирањето на државните институции, покажува последното истражување спроведено во рамки на проектот „Граѓански ориентиран пристап при испорака на јавни услуги“.

Граѓаните се задоволни од квалитетот на јавните услуги, но не и од брзината со која институциите им ги испорачуваат. Сметаат и дека цената на некои од услугите треба да се намали, особено во здравството.

Граѓаните, од друга страна, не се подготвени за целосна дигитализација и електронско комуницирање со институциите (доставување барања и апликации, добивање решенија, потврди, документи). Над 85 отсто преферираат одење и чекање по шалтери.

Анализата покажува и дека на преку 50 отсто им треба повеќе од еден пат да отидат до некоја институција за да добијат информација околу соодветната услуга и постапката за нејзино добивање.

-Граѓаните се жалат на нееднаков третман. Велат, ако имате познати во институциите, полесно ќе завршите работа. Ова е една од работите што секаде во светот биле надминати со диготализација на процесите. Со дигитализацијата во голем дел ќе биде исклучен човечкиот фактор што значи и поголема достапност, како и еднаквост во добивањето на услугите, изјави Искра Белчева Ристовска од Центарот за управување со промени кој го спроведува проектот.

Според неа, граѓаните најмногу користат здравствени, образовни и услуги од социјалната сфера. Повеќето се жалат дека на институциите им треба време да одговорат на нивните барања. Сепак, не се подготвени да платат повеќе за јавната услуга да им се испорача комерцијализирано, преку приватна компанија. Исто така, би сакале да видат и намалување на цената на добивањето на јавните услуги, најмногу на здравствените.

Дигитализацијата не е ништо страшно. Граѓаните треба да сфатат дека тоа се прави за нив, да губат помалку време и енергија, но и средства за да ја добијат бараната услуга, да го избегнат редот на шалтерите, да им овозможиме поквалитетни и подобри услуги, да можат истите документи да ги користста во правниот промет како хартиените, рече заменик-министерот за информатичко општество и администрација, Александар Бајдевски.

Користењето на автопатиштата низ Србија од 1 јули ќе биде поскапо за 12 проценти.

Според новиот ценовник на јавното претпријатие „Патишта на Србија“,  патарината од Белград до Ниш за возила од прва категорија ќе се зголеми од 800 динари или 7 евра на 896 динари, а од Белград до Прешево ќе скокне од 1.090 на 1.220 динари.

Од Белград до Шид наместо за 370 динари од следниот месец ќе се вози за 414 динари, од Белград до Нови Сад од сегашните 210 динари ќе се вози за 235, а од главниот град на Србија до Суботица од 560 динари цената се зголемува на 627.

Србија е една од 13 земји во Европа во кои патарината се пресметува според поминати километри, покрај Македонија, Хрватска, Босна и Херцеговина, Грција, Турција, Италија, Шпанија, Португалија, Франција, Норвешка, Ирска и Полска.

И покрај посакупувањето, од „Патишта на Србија“ тврдат дека возењето низ Србија е најевтино во Европа и чини 0,036 евра по поминат километар. Во Турција цената е 0,039 евра, во Грција и во Италија по 0,05 евра, во Хрватска и во Португалија по 0,06 евра итн.

Со комплетирањето на автопатот од границата со Македонија до Белград низ Грделичка клисура, Србија во моментов има 826 км автопатишта, а во план е проширување на автопатната мрежа на 1.154 км.