Вкупно 10 милиони евра одобрува владата за набавка на клими инвертори за семејства од Тетово, Битола, Кичево и Скопје. Владата соопшти дека се одобрени по 1.000 евра за набавка на инвертери. Целта е да не се користат енергетски неефикасни уреди за греење на тврдо и фосилно гориво, со што сериозно влијаат на загадувањето на воздухот.

За остварување на оваа мерка владата му препорача на Управниот одбор на АД Електрани на Северна Македонија (ЕСМ), во рамките на акумулираната добивка, да донесе одлука за обезбедување средства во висина од 618.000.000 денари за субвенционирање на граѓаните за набавка на високоефикасни инвертер клима уреди, како и да донесе одлука за обезбедување средства за јавна едукативна кампања за придонесот од имплементација на мерката за здравјето на граѓаните и за начинот на кој таа ќе биде спроведена – соопштија од Влада.

Од владата го поканиле Советот за соработка со и развој на граѓанскиот сектор, за да номинира две граѓански еколошки организации да бидат вклучени во имплементација на мерката.

Во меѓувреме, веќе почна грејната сезона, а граѓаните набавуваат дрва.

Претседателот на Република Северна Македонија, Стево Пендаровски вчера се сретна со претставници на иницијативата „Стоп за извршителите“.

На средбата, тие во детали ја образложија ситуацијата во којашто се наоѓаат како и нивните иницијативи за разрешување на состојбите во насока на времен мораториум на извршувањето на долговите кон физички лица, ревизија на работата на извршителите, почитување на постапката на застареност на долговите согласно законот за облигациони односи и постоење на lex specialis, т.е. закон за бришење на долгови.

Претседателот Пендаровски на состанокот искажа поддршка на основното барање на иницијативата „Стоп за извршителите“, односно дека е потребно да се изнајде решение за оваа категорија на граѓани на Република Северна Македонија во најскоро можно време.

Исто така, претседателот Пендаровски се заложи дека од надлежните институции ќе побара што поскоро детално да ги разгледаат барањата на иницијативата „Стоп за извршителите“, со цел да се утврди на кој начин би се дошло до конечно решение на нивните проблеми.

Државните институции и оние што не се формирани од Владата треба да направат анализа, која ќе биде основа за трансфер на вработените од јавниот во приватниот сектор, рече. Министерот за информатичко општество и администрација Дамјан Манчевски. Тој кажа дека Владата на денешната седница ги задолжила органите на државната управа и им укажала на институциите кои не се во нејзин состав да направат функционални анализи, кои ќе ги покажат главните проблеми во постојната организациска структура, по што ќе следат конкретни мерки за подобрување на работата во институциите.

„Во овој процес имаме поддршка и од Европската Унија преку ИПА проект. Резултатот од вертикалните функционални анализи ќе биде основа на дефинирањето на деталите за трансфер на вработените од јавниот во приватниот сектор. Целта на анализата е да ги идентификува што од организациски и функционален аспект може да го отежне или попречи остварувањето на надележностите и задачите на соодветната инстутуција“, рече Манчевски.

Тоја кажа дека со анализите ќе се покаже и подготвеноста на институциите да ги спроведат потребните реформи и ќе се даде целосна слика за расположливоста со кадровски, просторни, технички и информатички ресурси, меѓу кои најважни ќе бидат човечките ресурси.

Овие анализи ќе бидат преточени во документ, а наодите и препораките ќе помогнат во редизајнирање на приоритетите и структурата на самите институции за да се подобри нивната работа. Министерството обучи 15 претставници, кои на институциите ќе им помагаат да ги направат потребните анализи, рече Манчевски.

Тој рече дека врз основа на функационалната анализа направена кај инспекциските служби бил изработен и Законот за инспекциски надзор.

Анализата покажа дека треба да има вкупно 12 инспекциски служби, од кои 11 државни инспекторати и една агенција, место досегашните 28 инспекциски служби. Околу оваа анализа и натаму ќе се дебатира во јавноста и ќе биде запознаена со деталите. Избрзани решенија на долг рок може да предизвикаат дополнителни проблеми, рече Манчевски.

Тој кажа дека анализите ќе ги прават самите институции, а крајниот предлог за новата организациска поставеност на институциите треба да ја дадат меѓународни експерти, кои се вклучени со ИПА проектот.

Очекуваме на почетокот на следната година да понудиме трансфер на вработени од јавниот во приватниот сектор, секако останува да ги консултираме стопанските комори, синдикатите, рече Манчевски.

Вакви анализи веќе се направени во Министерството за информатичко општетство и администрација и во Министерството за труд и социјална политика.

Предупредување стигна од Светска банка до властите во земјава, да внимава со зголемувањата на платите во јавниот сектор, но и на минималната плата, бидејќи кога тоа е поврзано со намалена продуктивност, може да ја загрози конкурентноста на економијата. Ова укажување од Светска банка го испорачаа во својот најнов извештај за земјава.

До јуни, реалните нето плати се зголемија за над 2 проценти на годишно ниво, делумно како резултат на зголемувањето на минималната плата, како во јули 2018, така и во април годинава, како и поради зголемувањето на платите на јавните службеници на почетокот од 2019 година. Највисоките зголемувања на платите беа во здравството, образованието и социјалната заштита, во транспортот, градежништвото и во земјоделството. Континуираниот тренд на зголемување на платите особено во трудово интензивните дејности, заедно со намалувањето на продуктивноста на трудот во повеќето сектори ја загрозува конкурентноста на економијата, бидејќи единечната цена на трудот се зголемува, пишува во извештајот на Светска банка.

Според светските банкари, зголемувањето на минималната плата мора да биде придружено со зголемување на продуктивноста, инаку на среден рок економијата ќе се соочи со намалена продуктивност. Затоа е неопходно внимателно да се анализира и мудро да се донесе одлука за висината на минималната плата.

Клучната порака е не да не се зголемува минималната плата, туку тоа да се прави на мудар начин, изјави на денешното презентирање на извештајот Марко Мантованели, директор на канцеларијата на Светска банка во Скопје.

Издашноста на Владата за зголемени плати, пензии и социјални расходи, доведе до повисок долг и дефицит.

Годинава се зголемија јавниот долг и фискалниот дефицит како резултат на порастот на тековните расходи поради зголемувањето на платите, пензиите и на субвенциите и покрај умерениот раст на приходите. Расходите се зголемија за 8,4 проценти на годишно ниво, како резултат на зголемувањето на пензиите, платите, субвенциите и на здравствените расходи. Капиталните расходи, иако се зголемуваа, и понатаму во голем дел остануваат нереализирани. Ревидираниот дефицит за 2019 година се проектира на 2,5 проценти од БДП, што претставува зголемување во однос на 1,1 проценти во 2018 година. Кога ќе се додаде дефицитот на Јавното претпријатие за државни патишта, вкупниот дефицит се проценува на 2,7 проценти, укажуваат од светска банка. 

Додаваат дека ребалансот на буџетот доведе до натамошно зголемување на субвенциите за плаќање на придонесите за социјално осигурување, за да се поттикне пријавувањето на платите што се исплаќаат во готово. Потоа, влијание има зголемување на субвенциите за земјоделството, како и 15 процентен поврат на ДДВ на граѓаните со поднесување на фискалните сметки, за да се подигне даночната дисциплина. 

„Јавниот и јавно гарантираниот дол се очекува да се зголеми од 48,5 проценти во 2018 година, на 51 процент како резултат на интензивирањето на задолжувањето на Владата за да ги изврши претстојните обврски,  додека гарантираниот долг се зголемува со забрзувањето на јавните инвестиции во патиштата“, пишува во извештајот.

Натаму од Светска банка додаваат дека се очекува да продолжи фискалната консолидација иако побавно како резултат на новите програми за трошење. Владата воведе две нови програми за борба со неформалната економија, која се проценува на 30-40 проценти од БДП, а годишниот трошок за тоа се проценува на 0,8 проценти од БДП. Иако овие програми се предвидени во рамките на планираниот дефицит за 2019 година како резултат на пониските капитални расходи, на среден рок тие треба да бидат амортизирани преку други расходи или мерки на страната на приходите за да се избегне зголемувањето на фискалната ранливост. 

Иако овие напори се наменети за справување со неформалниот сектор кој е главен кочничар на економијата, тие веројатно нема да бидат успешни освен ако не се проследени со зајакнување на даночната администрација, поголема ефикасност на инспекциите и подобрување на давањето на јавните услуги и на законите што влијаат врз деловното опкружување. 

Иако 2019 е предизборна година, можното отворање на претпристапните преговори за ЕУ бара Северна Македонија да остане на курсот на структурните реформи за да ја поттикне конкурентноста, да го подобри управувањето и да ја подобри успешноста на јавниот сектор. Зајакнувањето на политиките за конкурентност и рационализирањето на државната помош би ги унапредило растот и фискалната одржливост, велат светските банкари.   

Извор - Фактор.мк