Им смета кога сте среќни, децо. Сериозно, не се чудете. Има луѓе кои се алергични на вашата среќа. Не дај Боже во нешто да сте успешни. Не дај Боже некој за нешто да ве пофали. Не дај Боже да добиете некое признание или да освоите некоја награда. Тоа ќе предизвика да зовријат и да смислуваат како да ве дискредитираат, да ве понижат и обезвреднат. Ќе плукаат по вас, ќе измислуваат лаги ако треба. Ќе ви ги извртуваат мотивите. Ќе направат од вас страшила. Ќе користат зборови кои вам не би ви паднале на памет. Ќе се занимаваат со вас деноноќно. А бе нема да спијат ако треба. Немој да ве засега тоа децо. Штом толку се занимаваат со вас, сигурно страшно ве обожаваат. Сигурно имате нешто што тие го посакуваат.

Тие не знаат дека се што имате сте стекнале со напорна работа и многу одрекувања. Многу жртви. А тие не сакаат така. Секогаш оделе по линија на помал отпор. Лесно и без напор. Кога вие учевте цели ноќи, они спиеја или скитаа и се проведуваа. Кога вие читавте купишта книги, они си играа видео игрици. Им бевте смешни тогаш. Е, ама успехот е таков... си ги бара цврстите и вредни момци и девојки и со нив си прави екипа. Да децо, успехот е привилегија на истрајните. Секој успева во она во кое го инвестира животот. Пред нас имало великани на чии рамења стоиме. Луѓе исти како нас... мразени, исмевани и понижувани. Но истрајни. Посветени на својата цел. Што мислите, ако овие великани се откажеа заради кучињата што лаат по нив, дали сега ќе постоеше цивилизација? Старите имаат една изрека: Кучињата лаат, караваните си врват. Да го илустрираме ова со посовремени термини: Еден мерцедес поминува покрај контејнер, и неколку маалски кучиња што тарашкаат по ѓубрето се стрчуваат по него. Се осеќаат загрозени. Лаат до изнемоштеност. А мерцедесот смирено си продолжува по својот пат. По стотина метри, кучињата престануваат со потерата, сигурни дека го избркале. Што мислите, дали мерцедесот се засекира поради оваа ситуација? Дали се навреди? Дали отиде во гаража да плаче? Не. Мерцедесот е свесен дека е мерцедес. Работата му е да биде појава, неоспорна вредност и достигнување. Стил, елеганција и статус. Мерцедесот знае дека е врв. Знае дека во него е инвестирано премногу генијалност, напорна работа и идеја, за да се замара со маалски кучиња. Ме разбирате децо? Бидете мерцедес. Вашата мисија е да бидете најдобри во се. А кучиња ќе има секогаш. И ќе лаат. А и што да прават друго кога во тоа се најдобри.

Автор: Драган Таневски

Иако сега празниците ги прославуваме на поинаков начин, би било навистина прекрасно ако не го прескокнете Денот на сесловенските просветители, зашто писменоста денес, за жал, е сè помалку застапена, а е исклучително важна во процесот на зачувување на интегритетот на еден народ.

Писменоста е нераскинлив дел скоро од секој аспект на новото време кое го живееме, зашто таа не се однесува само на молив, гума и тетратка со тесни-широки линии, туку се трансформира според потребите и еволуцијата на човештвото.

Моментално, тргнувајќи од тоа дека скоро се е дигитално, повеќето услуги и производи се лесно достапни на Интернет, некогаш ја забораваме најважната работа, а тоа се нови вистински информации во било каква форма. Писменоста ни помага да стигнеме до тие нови информации, а способноста за самостојно распознавање на вистинитоста на тие вести се развива само со постојано проверување на фактите дури и од релевантни извори. 

Новите информации го стимулираат мозокот и создаваат простор за нови. 

Интернетот првично бил алатка во поглед на напредок на човештвото, моментално кај нас се користи за губење време во буквална смисла. 

Дигиталната и медиумската писменост се есенцијални вештини за опстојување на пазарот на трудот во вакви периоди. 

Распознавање на лажни вести, истражување пред да се искоментира или слично, соодветна реакција на типот на содржина која се сервира на публиката се суштинските елементи поврзани со добивањето на правите вести и информации. 

Разбивањето на бариерата меѓу публиката и вистинитоста на информациите кои таа публика ги чита кај нас се одвива навистина бавно. 

Во Рим во 869 година папата Адријан ги осветил словенските книги, што значи дека Римската Црква официјално ја признала словенската писменост.

Поминати се 1 152 години, а ние уште не сме ја завршиле оваа еволуирана верзија на мисијата на светите браќа. 

Нивото на писменост на одредена нација зависи правопропорционално од нивото на свест и способност за држење чекор со брзиот развој на светот.

Ако порано требаше да се посветиме само на азбуката за да постигнеме ниво, сега процесот на личниот развој е многу посложен и бара фокус. 

За да го испочитуваме нивното дело, треба да се придржуваме до нивната идеологијата - описменување на народот без разлика на сè. 

Тогаш имало притисоци против ваквата мисија под изговорот дека се работи за ширење ерес, сега владее само игнорантноста кон релевантноста на описменувањето во која било форма. 

Никогаш не е доцна да се покаже дека писменоста вдахнува моќ. 

Сигурно сте го гледале филмот The Italian Job. Откако украдоа 35 милиони долари, експертот за експлозив Лево Уво ги прашува останатите од екипата што ќе прават со парите. Со други зборови, сега се богати, како ќе се промени нивниот живот?

Одговорите се движеа од наједноставен (голем стерео систем) до најсложен (куќа во Шпанија во кој има библиотека со сите први изданија на најпознатите автори и посебна соба за чевли). Како што следат одговорите може да се забележи дека сите освен еден одговор содржат купување на материјални работи. И ако сакаме да бидеме искрени, сигурно тоа би бил и нашиот одговор на прашањето, што кога ќе станете ултра богати?

Што би одговориле?

Еве еден можен одговор.

Она што навистина не можеме да го контролираме е времето. Кога би биле богати, она што би го направиле е елиминирање на сите обврски околу работа со полно работно време така што ќе остане многу слободно време во текот на денот. Дури и да уживате во тоа што го работите, би било супер самостојно да одлучувате што ќе правите со сопственото време. Постојанно сте преплавени од низа активности и немате слободно време, така што она што вие би го „купиле“ е слободното време за вашите омилени активности. 

Патувањата се друга работа која би сакале да ја „купите“, доколку имате доволно слободно време и тоа не толку заради разгледувањето на нови градови и држави, туку заради надлетувањето со авион над прекрасните пејсажи. Патувањата се одлични ако сакате да почнете да гледате на работите на поинаков начин. 

Она што не би го купиле се прескапи коли и куќи кои навистина нема да бидат доволно искористени доколку се потсетите дека сакате многу да патувате. Доволно е да промените одредени нешта во домот кои практично ќе ви донесат поголема функционалност. 

Што би направиле вие во случај да се стекнете со големо богатство? 

Ќе ја потхранувате мегаломанската карактеристика која неминовно ја поседува секој човек или  сепак ќе останете приземјени со тоа што богатството ќе го искористите на практичен начин?

Сите ние трагаме по практични решенија за нашата иднина на работа. Сепак, што е она што треба да промениме во нашата психа за да бидеме успешни?

Живееме во свет каде сите сакаат да бидат победници. Дури и децата, уште додека се мали се натпреваруваат за внимание во нашите семејства, за оценки и нови пријатели во училиштето и за победи во спортoвите кои ги тренираат. Подоцна, како што влегуваме во светот на бизнисот, ние повторно учиме како да ги победиме другите. Литературата за успех е полна со инструкции за тоа "Како да ги победите клиентите", "Како да победиме во бизнисот" или "Како да победиме на берзата". Во бизнисот, политиката и воопшто во животот , победата е многу послатка од загубата.

Создаваме простор каде никој нема да види дека сме изгубиле

Со децении, секогаш сме барале стеснување на просторот во кој може да изгубиме и тоа да го видат многу луѓе. Нашата опсесија да победиме, прави да се намали нашата ефикасност додека вршиме некоја важна работа и истовремено да не прави помалку фокусирани. Сепак, општеството каде што само оние кои ќе склучат најдобра зделка се победници, а сите други мораат скапо да платат за услугата, според експертите е пропаднато општество. Во општество каде сите ја знаат цената за нешто а малкумина ја знаат вредноста на истото, сите сме осудени на пропаст и грешни вредности.

Како да успееме иако сме изгубиле?

Она што треба да го направиме е да создадеме системи, начини и поддршки кои ќе ни дозволат да се пронајдеме себеси дури и тогаш кога сме губитници. Најважно е секој од нас да разбере која е неговата функција во дадена ситуација и што треба да извлече од ситуацијата било да е победник или губитник. Да признаеш дека си изгубил е голема доблест и дава нови погледи кон тоа како да одиграш наредниот пат. Клуч на ваквото сфаќање е фокус на твојот живот, на твојата позиција и локацијата каде се наоѓаш. Многу е погрешно кога се огледуваме на некој друг кој има други услови, други мисли и позиција и токму поради тоа на крајот завршуваме како губитници. Сепак на крајот секогаш размислете за вашите длабоки човечки желби и социјалната еднаквост, а не само минливите задоволства на клиентите или пак вашето богатство.