Италијанските власти ги казнија авиокомпаниите „Ryanair“ и „Wizz Air“ за нивната нова политика за кабински багаж.

Првата компанија ќе мора да плати 3 милиони евра, а втората 1 милион евра.

Агенцијата за заштита на конкуренцијата во земјата (AGCM) објави дека давачките од 5 до 25 евра, кои авиокомпаниите им ги наплаќаат на патниците, ако сакаат да земат поголем куфер во кабината на авионот е кршење на законот.

Новата политика стапи на сила на 1-ви ноември минатата година, а еден ден подоцна, италијанските регулатори забранија привремено да се спроведуваат во земјата.

Според нив, „Ryanair“ ги задолжил своите клиенти да платат куфери со тежина до 10 кг, што претходно било бесплатно.

Според новите правила на „Wizz Air“, секој патник има право да носи во кабинскиот простор еден бесплатен рачен багаж (40x30x20 см), а оние кои ќе го купат „WIZZ Priority“, ќе можат да качат во авинот и багаж со тркалца (55х40х23 см).

„Рачниот багаж е суштински елемент од услугата и неговото пренесување треба да им биде дозволено без наметнување на дополнителни трошоци“, гласи одлуката на „AGCM“.

Агенцијата смета дека двете авиокомпании треба да ги вклучат во цената на билетот таксите за поголеми куфери, за да бидат во целосна согласност со правилата во Европската унија.

До платежната агенција поднесени се 1.164 барања за сума од 33 милиони евра од последниот повик за добивање на средства од ИПАРД 2 програмата за рурален развој од мерките 1 и 3.

Рокот заврши пред две недели и сите мерки ќе се исплатат во време кога корисниците имаат најмногу потреба од овие субвенции, а целта е подобрување на генетскиот потенцијал што ќе влијае врз зголемување на продуктивноста на сточарското производство.

– За мерката еден „Инестиции во материјални средства за земјоделски стопанства" пристигнати се 1.099 барања за добивање на финанскиска поддршка од 17,1 милион евра, а од мерката три „Инвестиции во материјални средства за преработка на земјоделски и рибини производи" пристигнати се 65 барања со вкупна побарана финансиска поддршка од 15,9 милиони евра. Од претходниот повик од ИПАРД 2 програмата склучени се 953 договори со побарана сума од 22,4 милиони евра. Реализирани се барањата за 667 повратни средства, а висината на средства кои треба да се вратат е 6,6 милиони евра. Од овие барања исплатени се 158 инвестиции кои биле реализирани во овој период и износот на вратени средства кај инвеститорите е два милиони евра, посочи директорот на Агенција за финансиска поддршка во земјоделството и руралниот развој (АФПЗРР) Николче Бабоски на денешната на прес-коференција.

Тој објасни дека за мерката директни плаќања за обележување на грла на овци се исплатени 2.768 корисници со 507 милиони денари.

– На 2.053 одгледувачи на кози исплативме 59 милиони денари, за 13.024 одгледувачи на обележани грла на говеда исплативме 344,5 милиони денари и на 60 одгледувачи на несилки исплативме 71,7 милиони денари. Во рок од десет дена на земјоделците, лозарите и сточарите вративме 25 милиони евра. Пред почетокот на производствената сезона ги исплативме субвенциите за лозарите. Вчера и денеска се исплатија околу 16 милиони евра за 17.905 сточари за мерките за обележени грла на овци, кози, говеда и одгледувачи на несилки, појасни Бабоски.

Државниот секретар во Министерство за земјоделство, шумарство и водостопанство, Нефрус Челику истакна дека на 28-ми овој месец истекува рокот за јавниот повик за набавка на приплоден добиток за последниот квартал од 2018 година.

– Ги повикувам сточарите да го запазат овој рок со цел Платежната агенција да ги обработи барањата за да може навремено да се изврши исплатата. Во новата програма за рурален развој оваа година токму за оваа мерка вкупната финансиска поддршка ја зголемивме од 14 милиони денари на 90 милиони денари. Дополнително, по барање на фармерите ги променивме и критериумите за ова мерка со што државата покрива 50 отсто од трошоците за набавка на приплоден добиток, посочи Челику.

Наместо домашните издавачки куќи да конкурираат со учебници за наставните предмети од домашни автори, Министерството за образование и наука само објавува конкурси на кои избира автори и ракописи кои подоцна ги печати како учебници, односно се однесува како издавачка куќа. Вака обвинуваат издавачките куќи од каде за Фактор тврдат дека оваа практика трае подолг период. Дополнително издаваштвото на учебниците се проблематизира откако беше воведена Кембриџ програмата.

Од издавачкитекуќи велат дека во МОН објавуваконкурси до домашни автори да поднесуваат ракописи за разгледување и одобрување. Откако одреден учебник ќе се одобрел се распишувал тендер за печатење на тој учебник и сите авторски материјални права за учебникот, Министерството ги откупува од авторот и ги печати во потребниот број примероци. Велат дека тоа значи дека домашните издавачки куќи немале никакво право да поднесат учебник по одредениот предмет изготвен од домашни автори.

Се тврди дека ситуацијата уште повеќе ја искомплицирало тоа што со воведувањето на наставните програми на Кембриџ по предметите Математика и Природни науки од прво до петто одделение, како и по предметите Математика, Хемија, Физика и Биологија од шесто одделение до деветто одделение, издавачките куќи имале можност да поднесат ракописи за одобрување само издадени од странски издавачки куќи, напишани од странски автори како домашни автори и домашни издавачки куќи во Македонија да нема.

„На распишаните тендери за учебници се одобрија ракописи од тукушто формирани издавачки куќи, а останатите издавачи кои дотогаш издаваа учебници со искуство и традиција беа исфрлени и се одобрија учебници со буквални преводи од англиски на македонски јазик, несоодветно преведени, несоодветно усогласени со наставната програма којашто исто така беше превод од англиски јазик и во пракса се покажаа како несоодветни со низа пропусти и недостатоци така што многу генерации останаа без своите елементарни знаења. Беше донесен и закон за да се одобрува само еден учебник за еден предмет што е спротивно на сите европски закони. Со ова се погазува правото на конкуренција која носи подобар квалитет и пониски цени, велат издавачите.

Тврдат дека забрана за издавачи да конкурираат со ракописи од домашни автори е преседан. Инаку домашните автори по останатите предмети што не се по програмата Кембриџ имале досега можност да ги дадат своите ракописи до МОН, но сето тоа било тешко и неизводливо без соодветен издавач, Затоа, како што велат нашите извори поради тоа дошло до неквалитет, а  учебниците ги нема никаде каде да се купат.

„Издржаните автори во Македонија се откажаа од поднесување на своите ракописи што резултираше во поднесување и одобрување ракописи од автори кои за првпат пишуваат учебници. Оттука следуваа и голем број недостатоци и грешки, па дури и дојде до повлекување на одредени учебници од употреба. Во нашето образование, а посебно во Законот за учебници во Македонија, потребно е здрава реконструкција и измени, односно бришење на стариот закон и изготвување нов, велат од издавачките куќи.

И последната учебна година почна со старата програма, а малку од реформите кои беа најавени се спроведуваат, се чека уште и на новиот закон. Во моментов нема учебници и по странските јазици од шесто до осмо одделение. Издавачите прашуваат кога ќе им се врати правото да издаваат учебници.

Извор - Фактор

Минималната плата годинава нема да биде над 13.000 денари. 

Ако се подобри економијата, ќе се зголеми минималната плата, вели министерката за труд и социјална политика, Мила Царовска. 

Таа не кажа колку ќе изнесува минималната плата, но потврди дека е обезбедена финансиска поддршка за да можат помалите компании да го издржат притисокот. 

Премиерот Зоран Заев на почетокот на годинава најави ново едно зголемување на минималецот, но не кажа за колку. Анализите на Министерството за труд и социјална политика,  покажале дека е можно минималната плата до крајот на 2019 да се зголеми за дополнителни 1.000 денари.

Владата пред една и пол година изгласа минимална плата од 12.000 денари.