Од година во година, финскиот образовен систем се прогласува за еден од најдобрите во светот.
Образованието игра клучна улога во човечкиот, социјалниот и економскиот развој. Тоа се смета за човеково право, а истото поттикнува рамноправност помеѓу половите, мир и го зголемува квалитетот на животот на поединецот.
Но, луѓето во неразвиените земји речиси и немаат пристап до квалитетното образование, додека оние во развиените земји имаат повисока стапка на писменост и подобро образование. Со самото тоа, граѓаните подоцна имаат можност да добијат подобро платени работи и да си обезбедат подобар животен квалитет.
За да се види како поединечни земји се рангирани кога станува збор за образовниот систем, секоја година се вршат неколку различни истражувања, а Финска редовно се наоѓа на самиот врв.
Во што е нивната тајна?
Чести курикуларни реформи
Конректно во нивното школство, на секои 4 години се спроведуваат курикуларни реформи. Имено, на образованието му се придава големо значење и се следат резултатите од “PISA” тестирањата, а потоа се осмислуваат реформите. Иако се спроведуваат на национално ниво, тие се прилагодуваат и на локално ниво, а наставниците посебно се плаќаат за работата на тие реформи.
Опуштена атмосфера и забава
Иако образованието се сфаќа сериозно, како што се наведува на веб-страницата на Финската национална агенција за образование, програмата се темели на учење низ игра, за децата што помалку да бидат изложени на стрес. Токму затоа, наставата често се одржува во природа и голем дел од времето поминато на училиште е посветено на игра, забава, дружење и спортски активности. Исто така, по секој училишен час кој трае 45 минути, следува одмор во времетраење од 15 минути.
Наставниците се ценат и имаат слобода
Во Финска, наставниците имаат плата во ранк на адвокат или доктор, а во нивната професија им е допуштена максимална слобода. Сепак, тоа не значи дека не мора да се придржуваат до реформите и општите насоки. Освен тоа, му се придава важност на секој ученик поединечно и наставниците се дополнително платени за, на оние кои им е потребно, по наставата да им се дадат инструкции по предметите со кои тие имаат потешкотии.
Но, работата на наставниците постојано се надгледува и доколку истата не е задоволителна, следуваат санкции.
Помалку домашни задачи
Не е вистина дека тие не постојат, но децата во Финска генерално имаат помалку домашни задачи во однос на нивните врсници во другите развиени земји, што им остава повеќе време за игра и забава кога ќе дојдат дома, пишува “World Economic Forum”.
Дигитализација
Во Финска, дигитализацијата не ја гледаат како нужно зло и го прилагодуваат образовниот систем на времето во кое живеат. Она што може да се научи преку таблет или лаптоп, така и се учи, а на децата им се овозможува бесплатна технологија која им е потребна за учењето.
Исто така, на сите ученици сè до факултет им е обезбеден бесплатен оброк, но и учебници и други школски материјали.